簡單就是愛 - 笨豬小慧simple's blog

望穿秋水，Le Creuset Wyndham flagship shop 3rd Anniversary Sale 終於到喇~~~
只要身份證號碼有"3"字，立即享有5折!!!
(28/6~14/7/2013，只限3件貨品及未折扣前總值不超過$12000)
唔洗早起，唔洗迫開倉，顏色、款式、size任揀!!! 通通5折!!! 聽到都興奮呀~~~
2013年7月6日(六)
約咗敗婦好友少女A去「襯墟」，其實大家都無咩嘢特別想買(而且減價已經做咗一個星期，心諗有好嘢都賣晒啦)，但難得大家身份證都有"3"字，唔去八吓又好似對唔住自己囉。
去到時，真係同預期一樣，無咩好買/賣，因為呢日無補貨!!!! 真係一個惡耗呀~~~T^T (明明之前日日都補貨gum ma)
枱面、貨架、display 通通都好吉，乜都畀人掃乾掃淨。
有點心動的煲煲已經sold out Y_Y，想睇吓摸吓真身都無，嗚嗚......唯有安慰自己，今日得我一條友，力士主人唔跟身，有煲買都抬唔到回家云云
但千辛萬苦爬山過海嚟到，無理由空手而回。少少o地，都敗咗2樣嘢=p

24cm steamer，半價後$384，真係好抵買呀~~~而且開倉唔會有!!! 我恨咗好耐ga la~~好彩仲有last one^0^
petit casserole是跟少女A分贓的^^

粉紅+紫系，一套三件，少女A糾結只想要兩隻，剛好我又想要一隻，我o地兩個一拍即合，皆大歡喜^罒^

steamer跟上次開倉買的24cm round組合起來了~~~好型啊~~
雞、蟹可以原隻放入steamer蒸，碟都慳番，極度方便^^

裡面最多可以放3個petit casserole。satin pink迷你飛心和剛入手的cassis迷你煲變成好朋友喇~~~
燉蛋、茶碗蒸，我嚟喇~~~

敗完家，再食個all day breakfast，爽丫丫
敗後感：
今年的週年慶減價，真係好好好墟陷!!!
首天on sale，開門前2小時，已經有人排隊等敗，到開門o個時，條人龍有成100人!!!
係facebook見到d人的現場直擊報導，真係嚇c我 @0@
(上年的週年慶我係放工先去，去到7pm，無咩客，可以慢慢揀仔細問)
所以今日去，已經抱住乜都敗唔到的心態了，幸好都係「敗得精」的原則下，買到一件唔錯的東西啊~~(自覺執到寶，haha)
(如果排隊俾錢可以再快d會更加好，地方細人又多，屈咗係個死角成半個鐘先埋到cashier)
香港的LC fans增長數目飆昇驚人!!!! 睇嚟9月開倉又會有場腥風血雨~~~唔知o個時我仲有冇氣力財力敗敗敗囉~~
anyway，敗得開心，煮得開心，食得開心，才是真正的cooking theory吧~~~
各位靚太敗婦們，共勉之。
by笨豬小慧simple

(繼續閱讀...)

笨豬小慧simple 發表在 痞客邦 留言(5) 人氣()

早排天氣炎熱又潮濕，身體積聚好多濕氣，攪到有d肚痾tim~~又成日夜瞓，骨火上昇，又係時候煲個老火湯袪濕下火。
問過媽咪，佢教我煲「土伏苓粉葛赤小豆湯」。
煲起有少少杰，啖湯好濃好甜啊~~~粉葛、豬骨又食得~~飲完d肚痾好番好多tim~~very good!

粉葛，下火退熱，生津止渴，用於脾虛泄瀉，性質較寒涼。
買的時候，記得叫菜檔阿姐刨皮和切大件，粉葛非常硬，用專用刀才能處理，一般菜刀劈到手軟都攪唔掂

土伏苓，解毒除濕，可助降血糖，性質平緩，愈新鮮藥效愈佳。
中藥材店有售，買新鮮的最好，記得要求切片，好硬自己切唔到ga~~如果無新鮮，買乾身已切片的都ok
赤小豆，深紅色，比紅豆長d和窄身d，利水除濕，和血排膿，消腫解毒，可治水腫、腳氣、瀉痢，性平味甘酸。
雜貨店有售。
土伏苓粉葛赤小豆湯
材料：(2~4人份)
新鮮土伏苓 -- 半斤 (切薄片)
粉葛 -- 1斤
赤小豆 -- $1.5 ($3一包，我用咗一半份量)
豬骨 -- $30 (約300g)
蜜棗 -- 1粒
鹽 -- 1~2茶匙
水
做法：
1. 赤小豆浸水最少15分鐘，瀝乾水備用。粉葛沖一下水。土伏苓浸水一會兒後，沖淨泥沙，瀝乾水備用。
2. 煲沸一湯碗水，下豬骨汆水，過冷河，備用。
3. 所有材料放入大煲，加水至蓋過材料，大火煲沸後，轉小火煲30分鐘，再放入真空煲燜2~3小時。
4. 取出翻煲至水沸，落鹽調味，即成。
貼士：
1. 此湯比較寒涼，所以一定要搭肉來煲，寒底人士不宜多喝。
2. 如果服用中藥，就唔好飲住喇~~~怕會撞啊~~
by笨豬小慧simple

(繼續閱讀...)

笨豬小慧simple 發表在 痞客邦 留言(1) 人氣()

(2013年都過咗一半，我先寫2012年的紙婚之旅.....真係太懶之過.....)
2012年12月9日(星期日)
期待已久的京阪之旅~~~終於起行喇~~~ \^0^/
今次遠門為慶祝紙婚啊~~~yeah~~~結婚一週年喇~~~~
(出發當天實為結婚後一年零十九天)
選乘了開業才一年的樂桃航空(PEACH Aviation)，無他，因為平!!!
(加插少許介紹。樂桃航空(PEACH Aviation)是ANA其下的子公司，專營廉價機票，於2011年尾開業，只有香港<>大阪的航班(如果由日本出發就好多選擇)，以淨機票發售(連10kg以下手提行李，即happy peach的價錢)，不包括飛機餐和寄倉行李，但可加錢購買)
我o地的購票如下：
出發$988(happy peach)+$1288(happy peach plus)、回程2張$1088(happy peach plus)
連機場稅、保安費等雜項，才需要 @HK$24XX，就能買到來回香港<>大阪的機票喇~~~實在抵到無朋友!!!
詳情：http://www.flypeach.com/hk/home.aspx
當然，平價機票喎，就唔會係最好啦，凌晨機、T2登機口、機細、人多........
唔知係唔係因為冬天，機倉開行暖氣，攪到非常非常乾燥，加上人多、空氣唔流通，又熱又乾，4個鐘的機程搭得好辛苦，主人話佢完全瞓唔到，我就瞓吓醒吓咁。好彩我已經早有準備，帶定sleeping mask和樽裝水，才不致乾到個人龜裂!!!!
如果budget夠，下次都係坐CX或ANA吧......

幾經辛苦捱完4個鐘，終於到關西空港喇~~~
我o地又係T2落機，雖然係細d，但人唔多喎，好快就拎到行李，撇得!!

要先坐suttle bus去T1，才能坐JR Haruka去京都市。天都未光呀~~~
跟住路牌的指示(和其他路人)，好快就搵到JR WEST的客服中心 (認住呢個綠色門牌)

我o地要買JR WEST 1 DAY PASS，@2000yen
因為咁樣坐JR Haruka抵好多ga~~~(單買Haruka要over @3000yen，仲只可以坐呢一程，買1 day pass，就全日任坐!!! 之後去其他地方都可以用)
出示passport，同職員講JR WEST 1 Day pass，填好表格，俾錢，攪掂!!!
本來想買埋嵯峨野小火車的票，但要趕6:30am o個班JR Haruka，所以都係飛奔去月台吧!!!
(miss咗呢班Haruka，下一班要等成個鐘呀~~~)

JR閘口就係客服中心前方。認住係藍色!!! 隔離綠色係難波電鐵，去大阪市中心的，唔好入錯閘呀!!!
去到月台，要選「自由席」的車卡上車(我上咗最近exit個卡車, 5番)

車程約1.5小時左右，真係好快~~瞓醒一覺，就到京都了~~~
(Haruka的總站係京都啊~~中間會停天王寺、新大阪，會去此兩處的朋友也可選乘呢~~)

Haruka車，幾型^0^

京都駅的月台上，有幾幅京都名勝景點的浮雕畫。估唔估到呢幅畫係邊度呢?

京都駅好大好大，是一個交通樞紐(JR、市地鐵、巴士)，又有shopping mall、地下街，食、買、搭車都無問題~~

到埗後，先去酒店放底個喼

我o地揀咗呢間「HOTEL VISTA KYOTO」
位置非常perfect，就對正京都駅的八條西出口(近新幹線)
(京都的酒店最好揀番近京都駅，因為坐車真係好方便啊~~)

雖然房間唔算大，但非常乾淨整潔，基本的淋浴用品都有齊呀~~
(再住埋大阪o個間，我堅係覺得呢間酒店係最好!!!)
攪掂晒check-in，好肚餓，搵食!!

去了京都JR駅內的coffee shop吃了個洋食早餐，約@200yen
杯咖啡偏酸，呢間味道一般般
(小tips：日本室內沒有禁煙ga~(但一路行一路食煙係犯法)，入去餐廳，侍應都會問你要smoking或non-smoking area，如果好介意煙味如我，識揀啦)

食飽飽，開始今天的行程^^
原本想去奈良和宇治，但我o地係飛機上都瞓得唔好，仲好累，所以近近地，先去稻荷吧。

善用 1 day pass，當然坐JR啦~~ 去稻荷，選「奈良線」「宇治‧奈良 方向」的普通車，坐2個站就到喇~~
(如果去奈良和宇治，坐「みやこ路快速」(橙色字)就最短時間到達了)

一落車，就見到呢幅大banner，哈~~我o地要去嘅就係呢度喇~~
(死.....好多人落車tim.....係喎，今日係星期日...囧)

出閘後行5mins左右，就到達了~~

伏見稻荷大社
入場費：無料(免費)

我又學佢起飛腳XD

入到門口，已經見到紅葉了~~~yo~~~

呢度應該香火鼎盛，好鬼大呀~~~~
(門口好有清朝feel的建築呢)

日語漢字中，稻荷=狐狸，一位負責穀物收成的神
係好多卡通片中都有出現ga~~~佢最鐘意食油豆腐
同中國的狐仙好唔同ga~~(中國的狐仙係迷惑人求偏姻緣的)

主廟宇

紅葉處處，非常優美

鳥居繒馬，巧令令啊~~

狐狸繒馬，d人畫得好攪笑呀 XD

行咗一陣，已經到稻荷神社的「戲肉」>> 千烏居

一個緊接一個的鳥居，排到密密麻麻，好似走入時光隧道咁，真係好壯觀呀~~~

後面刻了邊年邊日邊個捐錢築起鳥居

有大有細，任君選擇~~~最大size有2樓咁高，都只係HK$10K!!! 抵啦~~~

行完神社主樓和鳥居隧道，就來到一個花園，有湖有貓有紅葉，好靚的景色呀~~~好寫意

每間神社都有的手信品店，可以買回家排番個迷你鳥居陣!! 唔拜神的話，都可以買個面咁大的狐狸餅try吓 =p
行完神社，再去附近的商店街逛吓

京都名物「聖護院八之橋」，原來係賣肉桂味的蛋餅，um.....not my cup of tea

少少餓又吹風吹到凍凍地，去茶喫店hea吓。
呢間店古色古香，又提供暖氣，又warm又comfort
吃了紅豆湯年糕，勁甜~~~~加埋掃上醬油燒的年糕，成碗又咸又甜，OMG!!! >~<
紅豆湯年糕 - @150yen
玩咗一個上午，個人warm up咗，精神d喇~~~
我o地決定去遠d!!!
原本行程plan下午去清水寺的，依家就改去嵐山!!!
而且有 1day pass，我o地要用盡佢，有咁遠去咁遠!!!

先在稻荷駅坐「奈良線」「京都 方向」的普通車，坐回頭車返京都駅
然後轉乘「嵯峨野(山陰)線」「龜岡‧園部‧福知山 方向」的快速車or普通車，在「嵯峨嵐山駅」下車就ok喇~~
(時間表上，橙色字的係快速車發車時間，如果時間夾唔到，坐普通車都可以到，只係慢d je)

半個鐘左右就到喇~~~ 車站的decoration都好古典啊~~
我o地係南口出閘，因為要去買觀光小火車的票

行咗大約15~20mins就到達了，沿途都好多路人行同一個方向，唔識路的話跟住人行都唔會迷路的。
呢個其實係舊的嵯峨嵐山JR火車站，至從電力化火車後，以前的蒸汽火車就改裝成觀光火車了(嵯峨野トロッコ列車)~~ 站名亦改名做トロッコ嵯峨駅

12點幾嚟到，嵯峨>>龜崗的尾班車(16:07發)已經可以買票喇~~@600yen
旅遊書、blogger遊記都教買5號車卡，但天氣實在太凍，5號車卡係無玻璃窗ga~~~
我唔想食西北風食死，都係揀番1~4號車卡有玻璃窗好d，至於單數位定雙數位，我都無得揀，賣飛阿姐幫我劃位的，而且雙人咁買，只可以平排咁坐，唔可以兩個人都坐窗邊囉......

買完車票已經1點幾，好肚餓呀~~~搵食搵食
都知嵐山係旅遊區，食嘢唔會太便宜，而且又餓又凍，我o地行番出大街，就是旦揀咗呢間「黑兵衛」try吓

lunch便當set，賣相好精緻ga~~~but味道就一般般，份量少，又凍冰冰，我想食熱嘢呀!!!
lunch - 約共3000yen

餐廳的對面馬路就係天龍寺喇~~~
入場費：本寺+庭園套票 @600yen

入到嚟，真係好開心呀~~~因為有好多紅葉呀!!!

反而我對寺內參觀真係興趣一般，一)我已經嚟過啦、二)著住對勁單薄的襪行係凍冰冰的tatami上面，我真係想快快行完囉~~~凍到腳都痺>~<
最慘個靚靚湖d紅葉落鬼晒，d樹光禿禿咁，無晒嘢睇，快快步行吧啦。

反而著住鞋，行吓庭園仲開心啊~~d紅葉真係靚到呢~~

行吓行吓，我o地誤打誤撞咁，行咗去竹林，上次我無行呢邊呀~~~
一排排竹樹包圍的步道，好有詩意啊~~~

沿住人群，我o地又行咗去野宮神社
可能就快大考，好多後生仔女嚟呢度參拜啊~~~(野宮神社出名求學業運)
相對另一邊求安產的就靜好多了。

之後又跟住人群行番出大街，先發現有好多又平又好食的餐廳，嬲呀>~~<

沿路再行，就到渡月橋
今日勁大風，吹到我眼都睜唔開，好好好凍呀~~~連河兩旁的紅葉都無咩心機欣賞，只想有咁快得咁快行完
係橋頭，仲見到一pair新人影緊pre-wedding，我o地都好佩服個新娘可以穿露背婚紗，又冷又大風，仲笑得出!??勁!!
因為實在太凍，龜岡公園都唔行喇，快快回程算了(又係渡月橋吹多次風>~~<)

而且，夠鐘坐小火車喇~~~
唔知係唔係尾班車，勁多人!!! 月台迫爆!!!
好彩早買定車票，真係怕企都企唔入架火車呀~~

一邊坐小火車，一邊欣賞保津川的景色
沿途司機用日文廣播介紹一下d風景，不過我唔識日本，一句都聽唔明.....
12月的嵐山，紅葉開始落了，河兩旁只有好多光禿禿樹，一入隧道我就想瞓了 zzzz

車程約1小時，到達總站トロッコ龜崗駅
車站係一間小木屋呢~~~~外面的黃昏景色好靚啊~~~

雖然唔算好有趣，但都叫坐過吓啦~~~
(我反而對o個3支手信啤酒有d興趣，但見唔到有得賣....)

トロッコ龜崗駅除咗小火車，無其他交通工具了，好彩附近都有JR馬堀駅

沿住田邊，步行約15mins左右，就到JR馬堀駅
中途起勢食大風，我用條頸巾包頭阿叉婆咁行都頂唔順，凍到我邊行邊尖叫~~~~
其實田邊的景色好優美，還有夕陽西下啊~~~但我凍到唔想拎隻手揸機影相>^<
回程就坐「嵯峨野(山陰)線」「京都 方向」普通車，坐到總站，唔洗煩=p

終於又返番嚟京都駅，傻仔主人同京都tower合照，呢座塔遠睇真係好似蠟燭XD
(應該改名叫Candle Tower XDDD)
玩咗成日，又餓又累，唔想再坐車去搵食，就去了京都駅相連的地下街Porta搵食了~~
裡面好大好大啊~~有fashion、drug&cosmetics、靴下、food，真係包羅萬有!!

係廿幾間食肆中迷失的主人，就由小慧決定食炸豬排啦!!!
我o地叫咗炸蠔定食和招牌厚切炸豬排定食，共約5000yen
d蠔好新鮮呀~~~蠔味勁重!! 外脆內juicy~~~豬排真係招牌菜，肉質鮮嫩，炸到脆卜卜咁，真係好好食呀~~~
(依家打緊blog又好想再食了=d，真係好好好味ga!)
食飽飽，好滿足，又周圍行吓，當消化嘛~~

京都駅穿過巴士總站後，就見到Yodobashi
日本電器、影音、藥妝有齊，買呀~~~~~
是日筋疲力盡，回到酒店立即瞓zzzzz
by笨豬小慧simple

(繼續閱讀...)

笨豬小慧simple 發表在 痞客邦 留言(4) 人氣()

煮飯時，最頭痛就係剁蒜蓉，花時間，剁完d手指又成陣味，仲要洗好多次手都洗唔走!!! << 各位靚太有同感嗎??
最近同事幫我買咗個「神兵利器」，從此剁蒜蓉唔再係苦差喇~~~
佢叫做「萬用攪拌器」，個名好威威啊~~~
一舊簡單的膠，分開3個parts，主外殼連兜、手柄連研磨部份、半圓扣

主要將d食材攪碎或揸汁，可以用的食材都好廣泛：蒜、薑、花生、杏仁......等等

蒜頭去皮，太大粒就切細少少，放入個「兜」度，然後用d力轉動手柄

蒜蓉就輕易「攪」晒出嚟喇~~~yeah~~~
用完之後，拆開所有parts，沖一沖水，晾乾之後就無晒味喇~~~
最重要隻手唔洗再臭嘛>0^
之後我又試過磨薑汁，又好成功呀~~~唔似以前磨到手軟，仲要差d連自己隻手指都磨埋=.="
「萬用攪拌器」，才HK$3X，推薦各位靚太敗的好用物^^
by笨豬小慧simple

(繼續閱讀...)

笨豬小慧simple 發表在 痞客邦 留言(2) 人氣()

呢期老公唔知做乜成日話要食荷蘭豆，見佢咁想食就煮俾佢食啦~~~
其實荷蘭豆清甜爽脆，真係幾好味ga~~~大人細路都鐘意食。
XO醬炒豬頸肉荷蘭豆
材料：(2人份量)
荷蘭豆 -- 1飯碗
豬頸肉 -- 1塊(約200g)
薑 -- 2片
蒜 -- 1粒(菜刀拍至散開)
XO醬 -- 1湯匙
糖 -- 1茶匙
醃料：
生粉 -- 1茶匙
鹽 -- 半茶匙
生抽 -- 1茶匙
老抽 -- 半茶匙
油 -- 少許
做法：
1. 荷蘭豆撕走筋(搣走部分尖尖位再向下拉，就能搣走條筋，唔搣食起會有渣)，洗淨及瀝乾水，備用。
2. 豬頸肉切片，下醃料醃15分鐘。
3. 鑊下油燒熱，下蒜爆香，然後撈走，下豬頸肉炒至8成熟及燶邊(無須撈起)。
4. (將豬頸肉堆埋一邊)下荷蘭豆炒幾下，下糖，炒至軟身，下XO醬快炒兜勻全部材料，即成。
貼士：
1. 豬頸肉又名豬青肉，肥肥地肉質有咬口，適合用來煎、炒、燒，凍肉店有售。
2. 荷蘭豆亦可用蜜糖豆、西芹、燈籠椒等代替。
3. 我唔食得太辣，所以只加XO醬，如果食得辣又想香口d，可以爆香蒜頭時加埋辣椒一齊爆香，咁就非常惹味。
by笨豬小慧simple

(繼續閱讀...)

笨豬小慧simple 發表在 痞客邦 留言(0) 人氣()

夏天到喇，真係好好好熱啊~~~
想煮飯，但又唔想係廚房熱咁耐，冷盤就係一個好煮意^^
整醉雞翼就啱晒~~烚熟雞翼(烚的時候只要set timer，咁個人就唔洗留係廚房啦~~)，然後浸酒雪藏，簡單快脆唔洗熱，YEAH!!
早上煮，雪佢一個下午，晚上就有得食喇~~~好夠酒味，YUMMY =d
醉雞翼
材料：(4~5人份量)
雞中翼 -- 2磅
杞子 -- 1湯匙
花雕酒 -- 1杯(約200mL)
糟鹵 -- 1支
薑 -- 2~3片
蔥 -- 1棵
鹽 -- 1茶匙
做法：
1. 雞翼解凍洗淨。蔥洗淨切段。杞子用半碗水浸泡。
2. 鑊/大煲加水到一半滿，加入薑、蔥大火煲至水滾，然後加入雞翼、鹽，烚至雞翼全熟。
3. 雞翼即熟即撈起，放進一大湯碗的冰水裡，浸泡至雞翼轉涼(咁做d雞皮才會爽口)。
4. 雞翼瀝乾水，放進食物盒/闊口盤子，加入花雕酒、糟鹵至浸過雞翼面，最後加入已揸乾水的杞子，輕輕攪勻汁料。
5. 將(4)放入雪櫃冷藏最少4小時，雪過夜就更入味啦~~
貼士：
1. 熟的雞翼會浮起，而且近骨的肉會縮水所以骨會外露。仍不確定的話，可稍稍擘開雞肉，中間沒血水流出就肯定全熟了。
2. 糟鹵是酒糟的副製品(詳看此)，有酒香、咸味、辛味，非常適合做浸泡的肉類冷盤。
我在街市的南貨店買了這款糟鹵，$30支，一次用了大半支啦~~~剩下的mix埋浸完醉雞的汁，雪櫃冷藏就可以下次再用。
3. 糟鹵也可改用李錦記醉雞汁，味道有咩分別，真係要試過先知=p
4. 唔用花雕酒，也可改用紹興酒，但我自己覺得花雕酒同雞夾d呢
by笨豬小慧simple

(繼續閱讀...)

笨豬小慧simple 發表在 痞客邦 留言(2) 人氣()

愛上煮飯，愛上LC，之後，一定愛上任何靚靚餐具。
但，動輒幾百元的瓷器餐具，我真係唔捨得買，打爛咗真係好好好肉赤ga~~~
(my nickname is MANDY，意思係「萬跌」，乜都跌得落地咁解=.=")
邊度有D又平又靚樣的餐具賣呢??
首選：AEON living plaza

(繼續閱讀...)

笨豬小慧simple 發表在 痞客邦 留言(4) 人氣()

好耐以前係酒樓食過，覺得咁整鮑魚好好味，今日又買到新鮮鮑魚，又試吓咁蒸。
朋友食完話比清蒸更惹味=q
(相關閱讀：清蒸鮮鮑魚)
蒜蓉豆豉蒸鮑魚
材料：
新鮮鮑魚(中式湯匙的size) -- 8隻
果皮 -- 半塊
蔥 -- 1棵
蒜 -- 2~3瓣
豆豉 -- 1茶匙
豉油 -- 1湯匙
油 -- 1湯匙
做法：
1. 果皮用半碗水浸軟(要浸大約半小時)，方便出味。
2. 鮑魚用牙刷/百潔布刷洗外殼，去腸，洗淨瀝乾水，備用。
3. 蒜剁成蓉；豆豉浸一浸，用刀背拍扁；蔥洗淨，切段；果皮揸乾水，切幼條。
4. 蔥墊碟底，上面放鮑魚，殼向下，碟邊和鮑魚間的空隙放果皮。灑上蒜蓉和豆豉。
5. 煲一大鑊水， 水滾後放入(4)，隔水蒸約6分鐘。
6. 鮑魚熟後，倒走碟內的水。
7. 燒滾油，淋在鮑魚上，再淋上豉油，即成。
貼士：
1. 蒸的時間如果唔sure，最好問一問魚檔阿姐，包無錯!!
by笨豬小慧simple

(繼續閱讀...)

笨豬小慧simple 發表在 痞客邦 留言(0) 人氣()

街市有新鮮即開生蠔賣，為食小慧最鐘意蠔喇~~~
雖然好新鮮，但生食都有d怕，就整焗蠔啦~~~
蠔味好夠，夠大隻所以焗起仲好juicy，yummy =d
$12/隻，差唔多手掌咁大隻ga~~大埔墟街市d海鮮真係平靚正!!!

(繼續閱讀...)

笨豬小慧simple 發表在 痞客邦 留言(1) 人氣()

我敢講，呢個餸可以叫做「中式沙律」，wahahahaha~~~
酸酸甜甜咁，幾開胃ga~~~依家夏日炎炎真係啱晒呀~~~
我好鐘意食^0^
涼拌手拍青瓜
材料：
起釘青瓜(大) -- 1條
蒜 -- 半個 (切蓉)
鎮江醋 -- 2湯匙
生抽 -- 1湯匙
糖 -- 1 1/2茶匙
豆板醬 -- 1茶匙
麻油 -- 1茶匙
做法：
1. 青瓜浸水最少半小時，用以去走沾在瓜皮上的農藥、泥、有機肥料等。
2. 青瓜切頭尾，用來打圈磨瓜身，直到起泡。頭尾唔要，洗走泡泡。
3. 青瓜打平切半，用鐵匙羹挖走瓜囊和種籽。
4. 青瓜一開二~三，放入大的保鮮袋，用菜刀或碌麵粉的木棒拍打至碎開成一口的size。太大舊的，可再切細。
5. 將(4)倒入大碗，加入餘下材料，拌勻，醃15分鐘。
6. 雪凍後吃會更美味。
貼士：
1. 青瓜要選用起釘那種日本青瓜，表皮滑溜溜的中國青瓜口感無咁爽脆啊~ 選用溫室青瓜就生吃都安心
2. 鎮江醋酸中帶甜又有酒香，最適合作涼拌菜；次選是紹醋；浙醋、白醋卻太酸了，不太適合呢。
3. 每次煮青瓜，都要記得磨瓜身到起泡，才能去走澀味。
4. 青瓜入袋再拍，就可免瓜汁四濺，整完要猛抹廚房就無謂啦^罒^
5. 原食譜是用辣椒油的，但我不太能吃辣，改用了豆板醬。
by笨豬小慧simple

(繼續閱讀...)

笨豬小慧simple 發表在 痞客邦 留言(3) 人氣()

我非常喜歡吃勝瓜，清清甜甜的味道，好好味。但主人唔喜歡食勝瓜，又話硬又話有銀........=..=
不過我唔理得佢咁多，照煮XD(廚房係我嘅，煮乜食乜我話事，wakakaka)，至多搭d菇，等佢都有得夾吓啦
上湯浸什菇勝瓜
材料：
勝瓜 -- 1條
雞脾菇 -- 2棵
薑 -- 2~3片
蒜蓉 -- 1茶匙
史雲生清雞湯 -- 250mL
水 -- 1碗
做法：
1. 勝瓜洗淨，切去頭尾，切走每條凸起的尖尖位，斜切成半吋闊的厚片。
2. 雞脾菇洗淨，切成半吋闊的厚片。
3. 下少許油燒熱鑊，爆香薑片和蒜蓉，再下勝瓜和菇快炒一會兒。
4. 下清雞湯和水，水滾後轉小火，煮5分鐘，加蓋熄火浸約5~10分鐘，至勝瓜變軟即可。
貼士：
1. 揀勝瓜有d技巧，太輕身、外皮太硬的太老了，會有好多銀；要揀墜手、表皮乾燥，上下"發"勝瓜時仲有韌度的才新鮮啊~
2. 煮當日因為雞脾菇便宜，所以用了雞脾菇，其實咩菇都得，例如：金菇、秀珍菇、草菇、白蘑菇、啡蘑菇、大啡菇、雪耳、雲耳等。
3. 用魚湯都得ga~(當然用濃湯寶就快靚正啦)，但怕腥就唔好了。
4. 其實呢味餸可以有好多配搭和變化，例如轉湯底、改瓜類、加瑤柱、蝦米、粉絲等，變化出屬於自己的食譜^^
by笨豬小慧simple

(繼續閱讀...)

笨豬小慧simple 發表在 痞客邦 留言(0) 人氣()

某天的一人晚餐，唔想落街食就炒烏冬啦，咁啱雪櫃有泡菜和豬肉片，忽發奇想可以整韓式泡菜炒豬肉喎~~~
好好味呀~~~=d
韓風泡菜豬肉片炒烏冬
材料：(1人份)
即食烏冬 -- 1包
泡菜 -- 半碗
洋蔥 -- 半個
薄切豬肉片 -- 4~5塊
韓式BBQ甜辣醬 -- 2~3湯匙
鹽、糖 -- 適量
醃料：
生粉 -- 1茶匙
生抽 -- 1茶匙
鹽 -- 半茶匙
油 -- 少許
做法：
1. 豬肉片下醃料醃10分鐘。洋蔥去皮切大塊狀。
2. 易潔pan下少許油燒熱，下豬肉片炒至轉色。
3. 下洋蔥炒至開始變軟，下少許鹽、糖調味。
4. 下烏冬，用筷子快手摷散，炒至烏冬變軟，下泡菜炒。
5. 最後下韓式BBQ甜辣醬，炒至所有材料沾到醬轉做紅紅的顏色，即可上碟。
貼士：
1. 如果可以，加d醃泡菜的汁會更好味(我有加呀~~~因為食埋呢轉d泡菜就食晒喇，所以加埋d汁唔好嘥，hahaha)
2. 鐘意食辣、好食得辣的，可以加埋辣椒粉或切碎的辣椒，我唔太食得辣，所以唔加喇。
3. 豬肉片用打邊爐的薄切黑豚肉片就最啱，快熟，又唔會鞋口。

(繼續閱讀...)

笨豬小慧simple 發表在 痞客邦 留言(0) 人氣()