簡單就是愛 - 笨豬小慧simple's blog

2011年9月14日(三)

你地無睇錯，我亦無打錯字，我地擇咗14/9入伙，同日亦係主人生日的正日!!!

有諗過揀第2日ga，但就會早到4/9，我地都怕唔夠時間攪間屋；再唔係就要29/9，又好似太遲了，唔想主人白供樓呀。

所以最後都係14/9啦。

13/9

去我家將7箱雜物搬竇!!!

可惜尋晚玩得太夜，瞓到中午先識起身，攪一大輪已經3pm了，原來呢段時間係好難call車ga!!! call咗成個鐘都無van仔!!!

主人不枉「黑仔王」的榮譽，call咗10幾間雞記都無一間有車!!! wakaka

最後都要豬小慧出馬，成功call到一位只走大埔線的伯伯，佢好好人ga~~收得幾平tim!

搬完上樓+炸箱已經夠鐘dinner，大家累斃了。
(點知發現漏咗一箱書係娘家......唯有遲d慢慢再逐少逐少再搬去新居啦)

14/9

今日我請咗半日假，原本打算整蛋糕，可惜買完d零星家品之後已經無咩時間了。都係執執間屋，準備入伙儀式。

我地唔拜神，只係簡單將d硬幣放屋企的四角，再開爐煲水就完成儀式了。

因為咩煮食工具都未有，dinner都係落街食jar~

由今日開始，我地就晚晚會係呢度過夜了^^諗起都好開心，因為終於有個「家」!!! 最重要係終於結束「兩頭滕」的生活了。

其實呢排大家為間屋奔波勞累，理應好快瞓著，點知我地都失眠!!!!唔係因為太興奮，而係生保床瞓唔到!!! 唔知點解，一d屋企的感覺都無，反而有d似去宿營.........(但我地去宿營去外地旅行，又唔會因為陌生環境瞓唔到喎...)成間屋的感覺好陌生啊~~~真係住咗係度嗱!?感覺太唔真實了。

攪間屋期間，我同主人鬧咗好多次交，可以講係攪成個結婚過程中，吵得最金的時期!!!主人覺得我樣樣野都好高要求，攪到佢唔敢隨便落決定，下下要問準我咁，令佢覺得d野拖慢晒(忟)；我反而睇唔過主人唔想抹屋，做咩都好似求求其其咁，間屋係自己，上心d啦。我地小至搬d咩入去，大至買咩傢俬，都嘈嘈嘈嘈嘈。

有一剎那，我真係唔知自己為咩要買樓，為咩要結婚，真係好X煩呀!!!

老實講，攪間屋的2個幾月，我真係好唔開心，有幾次好想發脾氣，但見大家都開始嬲嬲地，主人黑晒口面，我都忍住唔發火..............

去到後期，仲差個幾星期就入伙，我先開始睇開d，個人開心番d，仲漸漸期待入伙呢一日快d到，因為我知道我就快到岸脫苦海喇~~~yeah!! 主人呢個時候已經謝晒，hahaha，唔好咁啦，捱多陣到ga la。

入伙後第2日，主人突然同我講咗句「對唔住」，佢話攪間屋期間，成日發我脾氣，攪到我唔開心.............其實我老早原諒咗佢啦。但收到佢的sorry，個心好甜呢。

我都要同主人講「對唔住」

我知你有時做野做到好累又忟晒，我都仲push你做呢樣個樣，又成日三心兩意攪到你的plan亂晒，要你重頭再度過，不過間屋依家都算靚靚仔仔啦~~~有好多野，住落先知點咁嘛，relax~

送你一碗我煮的愛心公仔麵啦~~

賀　入伙成功!!!!

攪完呢個搬屋大project之後，我發現，我手臂上的老鼠仔返咗嚟呀~~~

by笨豬小慧simple

2011年9月11日(日)

今日又係我倆一齊放假的日子(主人的工作要輪班，所以唔係每個週末都可以一齊放假ga)，決定今日再一次北上，為新居購買物資。

首先去mc win介紹的位於東門華佳廣場的窗簾舖造窗簾

我地今次試吓搭深圳地鐵去，由羅湖站坐去大劇院站轉車，到湖貝站落車，B出口出再向住東門窗簾廣場方向行，後面個座華佳廣場就係我地的目的地。

湖貝路都幾污糟，地下好多污水

或者係老街站C出口出，行晒成條東門購物街，過天橋後就到(我地係咁樣回程)

只花了半小時就揀好晒窗簾布。

全部RMB25/米，另外加埋反光布(RMB4~5/米)

本來睇中其他ga~~但太貴喇(RMB32~48)，最後cheap精上身揀咗平野

講價後total RMB700，我地因為無時間返轉頭拎，所以加咗RMB50運落香港。

(update：14/9早上就收到窗簾，諗住拎去洗衣店洗，先知加咗反光布唔洗得，因為乾衣個時反光布會爛........所以下次都係唔加好了)

之後行去老街站搭地鐵，去田貝四路的家合居買燈。

今次唔洗轉車，搭到去田貝站落車，D出口直行15min就到了。

原來之前去的五方家居都係同一個地鐵站出，只係行相反方向呢。

家合居比五方家居仲要大，主要買家居建材，一樓是廚廁用具、二樓是木地板水喉、三樓是燈飾、四樓是傢俬。

我地一到就直上三樓睇燈。d燈真係好靚，d款仲好新潮，但多數的潮款都用米膽，聽聞米膽好易燒，所以我地都主力睇可以用到慳電膽的款式。

行咗3~4間已經搵晒心水了，都算快手啦。

好鐘意水晶啊~~~~

因為書枱位和客廳係同一間房，所以想襯埋一set。

呢戔燈係另一間買ga，估唔到又幾襯。

連埋慳電膽只是用了RMB1200!!!我諗香港呢個價錢只係買到1戔燈咋~~

原來買燈都有好多學問，燈膽有分大細頭，主要睇個款燈的燈膽座要用邊種，普遍是水晶燈會用細頭燈膽，買燈時要問清楚sales，買錯燈膽就晒錢錢了。當然火數(W)愈大，個燈膽就愈大個，有時可能過唔到個燈罩入口，或者會突晒出嚟唔好睇，所以咪一味貪火數勁呀~~~

講價方面，我地真係無咩點講，sales一開個價已經係「優惠價」而又符合我地的budget，我地仲因為帶唔夠錢(笨小慧呢期記性好差呀~~出發前諗住禁錢但最後唔記得咗Orz)，買燈的set price都計到好盡，啱價都費時講價了。

可惜帶唔夠錢錢，無買到

攪掂晒已經5pm (d燈等攞貨都等咗好耐，起碼個幾鐘)

2個人拎住4箱燈，長征去福田口岸站，過關+坐火車回港。

(主人死都唔肯去羅湖站，明明近d，佢話怕人多，d燈會被人迫爛喎.....其實明明係佢自己唔鐘意迫就真。)

雖然買好晒燈，但要等未來老爺得閒先至安裝，不日使用。

by笨豬小慧simple

2011年9月9日(五)

今日輪到主人做「等送貨吉祥物」了。

今日約好送：(1)床褥、(2)電視、(3)安裝寬頻

個電視櫃高度造得啱啱好，依家水平視線睇電視，嘆~~~

寬頻亦係4pm前攪掂埋，未來老爺仲買定router，依家可以WiFi上網了~~~yeah~(但申請咗寬頻先知，隔離屋個WiFi無lock，早知偷線算啦)

上次塞咗的水喉，未來老爺都攪掂埋喇(佢買個支通渠水真係堅)，洗衣機用得了~~但仲未買晾衫架=.="

放工後我去買了枕頭。

不過都照用算了。

傢俬已經全部到位，只欠少量家電傢俬要添置，不過呢d可以入伙後慢慢再買。

等13號放假搬屋，我地就可以脫苦海，慢慢再攪結婚野了。

加油呀~~~~

by笨豬小慧simple

係床褥呢個item上，朱小慧一直猶豫不決，患上咗極少病發的「選擇困難症」!!

床褥真係好難揀呀~~~價錢唔算平，動輒幾千蚊，而且一瞓就可能十年八年先會換，真係要謹慎選擇，深怕一子錯，滿盤皆落索。

主人一早言明，咩床褥佢都無所謂，因為佢瞓開硬野(一張好似木板咁薄咁硬的床褥)，買張cheap野佢都瞓到。

朱小慧就比較有要求，因為細時唔小心整襯條腰，攪到有風濕舊患，床褥唔可以太硬亦不能太軟無承托力，否則晚晚腰痛無覺好瞓就慘慘了。

其實我瞓開海馬床褥，條腰無咩問題，價錢又經濟實惠，所以都算心水之選。但後來係DSC見到喜居樂的太空棉床褥後，個種軟棉棉又唔係林吱吱的感覺真係好正啊~~~但價錢要$4XXX，係海馬的一倍幾!!!唉，心大心細唔知買邊張好。

最後我決定................海馬床褥+喜居樂太空棉床墊

另外加咗$90買張衛生床墊，再加$79送貨，埋單$1759。

網上找到的用家意見，喜居樂太空棉床墊係舒適的來源，只售$1000左右，只是唔會好似買床褥咁送埋枕頭床單，但我已經買好晒枕頭床單，送俾我都無用，所以都係唔好貪了。

依家分開買，我仲慳到超過$1300，呵呵，我好精明呀~~(忍唔住要讚吓自己)

by笨豬小慧simple

2011年9月3日(六)

因為主人要返工，所以今日得我一個做「等送貨吉祥物」，可幸未來老爺唔嫌煩悶，陪我一齊等。

今日約好送：(1)床架、(2)梳化、(3)餐枱、(4)洗衣機

最遲個件約咗9pm前送到，間送貨死都唔肯6pm前送，真係好衰，點解唔可以同一個時段送晒d野嚟咖???希望唔好真係等到9pm啦，會死人ga。

食埋lunch都未有電話到，仲有時間買埋櫈仔等收貨，唔洗好似上次咁企成日。

2:30pm，傢俬開始陸陸續續送到。

顏色好夾間屋呀~~~~好開心無揀錯!

因為廁所位有d窄，又要勞煩未來老爺和師傅夾手夾腳抬起部機逗入去。

其實收呢部機我真係嬲嬲地，上星期六放飛機後，星期一就打俾DSC要佢地跟跟佢，佢地只係同我講搵咗供應商，要等個邊call我。好啦，等到星期四都無電話，打俾DSC佢就只識叫我等，我真係忟晒，我同DSC講，如果供應商又好似上次咁機又唔到電話都無個，我又係屋企齋等呀，唔好浪費我時間啦。DSC就話，最遲聽晚有電話，我話無咁點先，我可以搵邊個投訴呀，你地扯晒貓尾啦，DSC最後無奈俾個直線我用嚟投訴。好彩呢個直線電話最後無用到，供應商都真係打咗嚟(不過係星期五晚上九點)，我就同佢講上次你地放飛機喎，佢竟然話今次係第一次約送貨!!! 真係好笑，我張單寫明27/8送貨ga。

不過點都好，總之終於收到貨。

但試機時發現d水喉塞塞地，去唔到水倒流番去個洗手盤度，又要勞煩未來老爺買野嚟通渠。唉，真係一波三折。

依家小小小豬欄的傢俬已經八八九九了，只差床褥和電視。

定好咗14/9入伙!!! 當日亦係主人生日的大日子!!! 雙喜臨門!!

要開始pack野搬去新居了，又一艱巨任務。

by笨豬小慧simple

2011年8月28日(日)

今日紅櫻桃有師傅上嚟組裝尋日送嚟的傢俬。

師傅好準時，話10am真係10am嚟到新居。(攪到我地都陪佢地早起，我仲好眼瞓呀~~~)

一入屋就開工!!

攪到一地都係紙皮，不過係我叫師傅咁做嘅, 因為唔想刮花木地板。

由10am攪到4pm，終於砌好晒d櫃了。

初時以為無底板，點知係有(只怪我地傻吓傻吓咁無睇清楚張設計圖啦)，所以遮住咗d電制(剛剛好係櫃門後面)。師傅見狀，即時開電鋸cut窿，你都咪話唔堅!!!

呢個無難度啦~~

師傅都話我地醒，整個衣櫃放係窗台，慳番好多位ga~~只可惜窗台牆身唔係垂直，所以有少少漏光，呢d未來老爺會幫手執漏。

度尺真係好準，fit晒呢個三角位，掂!!

呢個item有d麻煩，造得太淺放唔得d咩野，做得太深又怕唔穩陣會跌落嚟，而又好衰唔衰，呢個位的天花有一半係木板(假天花).....問咗度尺師傅的意見，佢話不如造深少少，可以打螺絲上天花，咁就安全d。

但最終吊櫃的深度係剛剛好到真假天花的接駁位，即係唔可以打螺絲上天花了.....

加上天花和牆身唔係完全垂直水平，裝咗個吊櫃之後有d空隙出現.......

所以又要拜託未來老爺幫手執漏了。

呢個櫃都裝咗好耐，尤其下面個6格鞋架，用就易但原來好難安裝ga，師傅要零空單手托住個架，另一隻手就上螺絲，成個架係實木，好重ga，真係力的表現。

組裝晒d櫃之後，就係成屋的紙皮、木碎、灰泥、螺絲釘等等......個戰場真係亂得好驚人(唔記得影底)，花咗2個鐘先收拾好殘局，散晒.......

櫃的品質、度尺、安裝都好好，只係個吊櫃有d唔滿意(關幅牆唔平的事，無計)，同埋有d後悔個鞋櫃揀咗深色而唔係白色，視覺上好怪咁，希望餐枱送到後感覺會和諧d啦。

by笨豬小慧simple

2011年8月27日(六)

好緊張好緊張，今日就是小小小豬欄開始有傢俬的日子。

今日約好送：(1)雪櫃、(2)洗衣機、(3)紅櫻桃的訂製傢俬

放工即刻仆番新居，又好黑仔咁搭咗架壞的巴士，全程蟻躝咁慢，最後仲要係鑽石山跪底咗=.="，攪到我用咗1.5hr先返到新居，氣!!!!

不過趕都無用，d傢俬電器等到4pm才陸陸續續送到，難為早到的未來老爺等到變化石了。

但剪綵後，發現漏送保養證，唉.....又要打去DSC追追了

紅櫻桃亦送咗傢俬組件嚟，total有37件!!!

明天早上師傅上嚟安裝，期待ing。

等等等到6pm，洗衣機都未見影，頂，放飛機!!!!有冇攪錯ga!!加埋個雪櫃的手尾，DSC的service真係好唔得咁，唉希望之後送嚟的野唔會咁多甩漏啦。

by笨豬小慧simple

由收樓到現在都無唞過，星期一至日都有野做，而且大部分要做嘅野都同間屋有關。雖然好累，但見到小小小豬欄漸漸成形，都好開心咖。

最近兩個星期的任務就係抹屋!!!

highly recommand大家抹窗用玻璃水，又快又乾淨，唔洗大大力捽，又唔洗過水，慳好多功夫咖。

頭一日抹窗唔記得買膠刮，隻手唔夠長抹d高的地方，新居位處高層又無窗花，我地真係唔夠薑伸個人出去抹窗呀~~~我唔想做飛天豬啊~~~~

個兩把刮刀係未來老爺買的，用嚟刮走d食得好死的漬，初頭唔識用，以為佢無料到，原來要好似剃鬚咁，捽咗d泡泡，再用刮刀刮，d漬就不費吹灰之力KO晒^^

我地貫徹DIY精神，打蠟都係自己嚟!!! 其實比想像中簡單，最緊要一粒塵都無的時候做，所以打蠟前要先拖地，再用水過一次，乾咗之後就可以打蠟了。真係將d蠟水直接倒落地板，跟住用地拖捽勻，攪掂!!!

不過，d蠟水真係好臭好難聞，記得戴口罩，仲要收工前先好做，做完即撇。

我都好乖，去吉之島$10店入定d家品，遲d仲要再去多幾次掃貨!!

晚晚dinner後就去抹屋3小時，再加上星期六日再各抹5小時，咁大運動量，我覺得自己輕盈咗，呵呵呵呵

遲d傢俬到齊後又要抹一次，睇嚟我仲大把機會操fit自己，haha

(可惜掛住抹，唔記得影底主人好男人的英姿)

by笨豬小慧simple