簡單就是愛 - 笨豬小慧simple's blog

2011年8月6日(六)

今日再北上五方家居的紅櫻桃，主要confirm所有傢俬的設計、用料等。

(1) 衣櫃

(2) 鞋櫃

(3) 窗台櫃 (用嚟放電視機)

(4) 書架連枱

(5) 吊櫃

(6) 飾物架

門把手柄就揀咗呢d款。估唔到門柄都有咁多種，邊個櫃用邊種都諗咗好耐.......

鞋櫃用一粒"的"的門柄，內間格係雙層的

衣櫃抽屜的拉手，唔凸出嚟，咁又慳位d

窗台櫃用呢種一條通的拉手，唔凸出嚟感覺型仔d，呢款原本要加錢，後尾講價唔洗加。

吊櫃、書架用呢種「一字形」門柄

料都係用番上次confirm個d

但d用色就exchange咗，依家變咗吊櫃和房的衣櫃用暖白色；廳的所有櫃用薰衣草色+mix一部份係黑色。

而且，用幾多隻色的木，都係一個開料費，差d俾主人嚇死，以為只可以全屋用晒一個色tim。

價錢方面，我地講價唔算成功，一蚊都減唔到，但d櫃就比原先預算的尺寸做大咗，咁主人都話佢無因為大咗而加錢，都算抵番晒啦~~~

confirm咗26/8 d櫃可以完工，約好27/8下午送貨，28/8安裝。yeah~~~

依家要開始努力抹屋，執好d位等擺傢俬!!!

by笨豬小慧simple

2011年7月31日(日)

2pm左右完成度尺，見有時間，順度去附近的DSC走走，因為要確定床架的高度啊~~上次買的時候唔記得咗度。

點知買咗2樣傢俬。

雲石紋玻璃面4人餐枱(可延長)連4張櫈 $2250 (有9折)

兩座位連貴妃位真皮梳化 $3999

貴妃位可以揭起儲物，左邊的單座位有彈校ga~~(主人好鐘意)

揀咗比陳列品深色少少的淺杏色。(iphone影起有色差，現場睇無咁黃ga)

買埋呢d，小小小豬欄的傢俬只剩吓床褥未買jar~~yeah!!
(o係DSC見到一張喜居樂的太空棉床褥好心動啊~~~但比心儀的海馬床褥厚了一點點，剛剛會頂住衣櫃門，而且價錢比海馬貴一倍，但又好舒服喎，點算好啊~~~好難決擇!!)

送咗張$100的coupon，用嚟買晒d清潔用品遲d要抽時間去抹屋了。

by笨豬小慧simple

2011年7月31日(日)

約咗紅櫻桃的師傅今日上門度尺，食完個brunch就出發去新居。

(相關閱讀：北上訂造傢俬)

我地一共要造6件傢俬：鞋櫃、書架連枱、吊櫃、衣櫃、飾櫃、電視几(窗台櫃)

每樣傢俬師傅都好仔細咁度尺

師傅仲俾咗好多意見我地，例如呢樣傢俬可以造幾大，尤其個吊櫃和衣櫃，吊櫃因為天花有一半係木板，所以要比平時造大d；衣櫃因為要就個窗台同埋床架，要改做拉門了，仲有要計一計床架連床褥會唔會高過個窗台，唔係會頂住隻衣櫃門。

原來造傢俬都咁多學問。

依家就等張生email設計圖俾我地，唔知幾時會出到圖呢???

by笨豬小慧simple

多謝未來老爺連續4天不停開工，小小小豬爛的牆身全部掃好油了。

(廳) 揀咗米黃色，原來同上手業主一樣的顏色

(房) 比天花黃少少，感覺間屋光猛得嚟唔會橙眼

近窗的橫樑上手業主裝咗分體式冷氣機，拆走後甩晒d灰水，未來老爺忟平番喇~~

老爺真係一個superman萬能俠!!! 勁!!

主人快d學野啦。

by笨豬小慧simple

前日收到B2B的通知，casablanca全線專門店做

清倉大減價，2折起!!

抵到飛起，緊係要去掃貨喇!!

戰利品：

同leaflet一樣款的530針全綿印花系列，加大雙人床笠+枕袋 $170、雙人被袋 $210
(可惜紅色個set無晒被袋，唔係買埋)

50%雙人羊毛四季被 $199 (抵呀~~~~)

天然大豆冬季厚被 $499 (後尾阿姐介紹，頭2日仲未做特價ga~)

加咗$99換的乳膠枕

咁又倒咗千幾蚊水但仍然仲差一套紅色的被套床笠。

by笨豬小慧simple

2011年7月23日(六)

今日我短週，主人又咁啱編到放假，當然要把握時間，北上尋傢俬。

我地今日的主要目的地就是到五方家居，找師傅‧造傢俬。

羅湖火車站可轉乘地下鐵到田貝站，走5-10min就到。但今日不知怎的地下鐵等入閘都打晒蛇餅，所以轉陣打的，RMB23。

原來有專車來回羅湖火車站的，但班次太疏，時間夾唔到。

五方家居的店舖擺位好清晰，一樓(地下)專賣廚廁和瓷磚等建材；二樓賣燈飾、窗簾；三樓賣客飯廳和睡房的傢具。

我地先上三樓，找朋友介紹的紅櫻桃傢品店。(因為看過朋友造的全屋傢俬質素很高，度尺準、用料紮實、價錢實惠啊~~)

地址：深圳市羅湖區太寧路211號五方家居裝飾廣場三層E3019舖
TEL：86-755-25685983
emal：sunxiaojing20089@163.com

負責人張先生接待我地，態度都幾熱情咖。

我地立即將小小小豬欄的平面圖、一些我手繪的傢俬立體圖(前一晚捱夜畫ga)俾張生睇，好彩佢都睇得明。佢好仔細咁逐樣同我地傾，睇住我地間屋的size計每件傢俬的尺寸，俾咗好多意見我地可以點做，仲即席手繪咗d傢俬設計圖出嚟~~~wow~~

最後訂造咗共6件傢俬：衣櫃、電視几、鞋櫃、吊櫃、書架連枱、飾物櫃。

原先無諗住訂鞋櫃ga，但見到佢地有d啱心水的尺寸，又可以改成我地喜歡的款式，所以就訂埋啦~~~但睇完佢地的油壓床架，真係好後悔咁急係DSC買咗床架呀~~佢d床架是1/3造抽屜、2/3是大的儲物空間，香港賣的只可任選其一，要不油壓、要不抽屜，但2合1咁樣整實用好多啊~~~依家我要煩唔夠抽屜用tim

料方面暫時confirm咗呢3隻，廳用米白色的木、房用薰衣草色拼黑色的木。

約好了30/7師傅上門度尺，之後我地要再上嚟一次confirm設計和用料。

但...............我好失敗呀....................計完total數，唔記得講價，其實想講，但又唔知點開口(殺佢幾多好呢？)，主人又唔出聲，我以為佢ok就乖乖咁科水落訂，事後主人話唔算好抵喎.........唉.............你又唔即時出聲..........依家睇吓度尺0個時講價得唔得啦.....(朋友話可以試吓喎)

攪掂晒後，就落咗2樓八卦吓d燈，睇中咗一戔，不過未睇中其他(我想換晒房同廳的燈，上手留底的真係太舊款，好樣衰)，等下次北上，我地去田貝四路的燈飾店再睇。不過原來d燈都幾貴

再落埋地下八卦吓人地d廚廁demo，呵呵，搵到個啱我地的浴缸呀~

正確d講佢係一個浴盤!!

因為小小小豬欄的浴缸被上手業主拆走了，變成一個石屎地台的企缸，但我地都好想有浴缸呀~~~但又無錢炸咗個廁所整過，有呢個浴盤就解決晒啦~~~盤底有去水位，唔洗倒水ga~~wakakaka

店員仲話可以訂造(大陸真係無奇不有，乜都有得造)，呢個52"X28"盛惠RMB1800(未包運費)，雖然買個浴缸呢個價算貴，但點都平過炸咗個廁所(格過價最平都貼$30K)

可以考慮吓

買完野仲有得玩遊戲贏獎品

d道具好認真ga~~~我張單可以玩3次，最後贏咗............................1條紙巾!!!!

本來係一pack可樂嚟ga~~~好彩派晒，唔係都唔知點拎走。

攪掂晒已經3pm，又累又餓，打的去笋崗文具批發廣場附近食KFC，之後再去立興幫人買茶具和格吓回禮小禮物的價錢。

攪掂晒我地又順手去埋家之福(立興係街頭，家之福係街尾)

原來家之福有3間，頭2間(裝修門面靚d)和好百年一樣，賣的都係國內品牌傢具，樣樣都好大件，真係千呎大宅先放得落，小小小豬欄無福消受，而且價錢都唔算平。

最後一間家之福裝修門面都差d，當然賣的檔次都平民d啦，尺寸都比較貼近香港人的要求，我地仲見到一對香港人買緊梳化，不過聽個價錢，似乎係香港買都差唔多，除非一次過買好多件傢俬，share番運費可能會平少少卦(但咁大張梳化，運費都平極有限)

行到腳仔軟，得個梳化側架算係比較啱用。

是日任務完成，yeah~~~!!

by笨豬小慧simple

明天就要北上訂傢俬，臨急抱佛腳地畫了小小小豬欄的平面圖

仲加埋我地之前plan好的傢俬擺位

畫好晒就方便同師傅傾要造咩傢俬了(始終有圖好d啦，口講有時真係幾難明，其實我都唔係好明主人同我講的裝修野)

雖然我平時畫開圖，但要咁樣畫真係要好多時間，呢個免費室內設計軟件令我一晚畫好

http://www.floorplanner.com

你都嚟挑戰一下!!

by笨豬小慧simple

本來今日約好朋友去海灘暢泳，可惜天公不造美，雷暴+大雨，只好取消，難為主人仲特登拎假早走。唔想浪費難得一起共渡的週末，決定去睇傢俬!!

其實早於6月未收樓時已經睇緊傢俬，奈何一日未度尺一日都唔敢買啦，唔啱用/擺唔落咪閉!?

今日終於可以睇啱就買。

JNC 32" Full-HD LED iDTV $3390 (超特價貨，抵呀~~~)

北極牌雙門雪櫃 $2380

Samsung上揭式轉筒洗衣機 $1780 (用coupon減咗$100)

54" X 75" 側揭式油壓床架(胡桃木色) $2609 (有9折)

全部係DSC買齊!!! 爽!!!

不過，咁就倒咗$10K的水................大出血

BY笨豬小慧SIMPLE

2011年6月27日(一)

本來今日我和主人各自有個重要的飯局，因為突如奇來可以收樓，所以我地都唯有「放飛機」啦~~~少女麻甩們，唔好意思呀~~

層樓早於前年購入(依家升到咁，點買呀!!)，多謝未來6299係首期上的支持，否則，我地要遲多成年先結到婚啊~~~所以我唔會要求佢地買金俾我了，我地覺得呢份結婚禮物已經好重手!!! 比舊金仲要金@0@

因為仲有成年幾先會住，所以搵人同我地供住樓先。

幾個月前已經通知個租客我地要收樓，等等等，等到6月中佢都未搵到地方搬，真係好擔心呀>~~<(仲攪到我有一晚失眠tim~~平時我係好快訓到死豬咁咖)，突然又係6月尾話可以搬走，真係峰迴路轉=v="

個租客keep得間屋好好呀~~仲新淨過我買佢番嚟個時，又抹乾淨晒間屋先退番俾我。

佢真係一個好好好的租客，交租都算準時，因為外牆維修要整d乜，佢都無托手踭咖，仲幫我跟埋手尾。如果唔係結婚要收番嚟住，我都仲想繼續租俾佢啊。希望佢搬到去新地方一樣有個好業主，生活開心愉快!!

-----------------------------------我是分隔線-------------------------------------

早前的7.1長假期，我地仲度埋尺，可以開始物色各種傢俬電器。

小小小豬爛啊~~~~就快住得喇，真係好期待好興奮!!

by笨豬小慧simple

前日病咗請了sick leave，見精神D，就同主人去咗睇冷氣機，因為真係好趕住要裝。

其實年幾前已經買咗樓，慶幸自己上車上得快，當時樓價都只係搭緊高速升降機，仲未坐火箭，亦要多謝未來6299係首期上的支持，否則可能我地要遲多年幾先結到婚。

收樓之後，大廈就話外牆要維修，一整就整咗年幾。(基本上係由收樓到現在)

呢排去昅昅個進度，好似就快攪掂要拆棚，係時候裝番個新冷氣，因為無鋁架，怕拆棚後至裝會收得好貴安裝費。

行咗3~4間，終於係老闆的介紹下，揀咗AKAI的匹半窗口式冷氣機，算係平價d又有一級能源標籤的日本機。

本來約好26號裝機，點知送貨遲咗，諗住要過年後先可以裝啦，突然間師傅又話ok喎，真係呢。

終於安裝好，點知，個冷氣唔work，過到電但無風出，唉..................乜咁玩我呀。

by笨豬小慧simple