簡單就是愛 - 笨豬小慧simple's blog

過大禮已經告一段落，可幸都算順順利利，但並不算順心順意。

因為呢排媽咪同d親戚反咗面，我的過大禮唔會好似妹妹上年咁請食飯，媽咪初時仲發爛話預咗我BD當日出門無人嚟飲茶，什至連女主家吉晒，佢都唔希罕。

我當時真係好唔開心，傷心到喊!!

媽咪你係唔係想揀我大日子同佢地開片玩野呀?? 咁我點呀? 其實你有冇諗過我的立場呢??

雖然話唔請食飯，但通知人地一聲我過大禮喇(即係準備收炸彈)，禮貌上都係應該做嘅。

但得到的答案係，d親戚都唔讓步，堅持要我媽咪上門派帖，仲要道歉!!! 否則，佢地唔會出席我的婚禮。

哈哈~~~係唔係玩野呀???

廿幾年的恩怨，都好難講邊個啱邊個錯，要媽咪單方面道歉，真係有d過分!!! 我亦唔想因為我的婚禮要人出席，就委屈媽咪。

依家都好嘅，班親戚早d話我知唔到，總好過BD當日先放我飛機，依家仲有時間俾我慢慢安排個seating plan和guest list。

touch wood女家主家坐得半圍人囉，蝕唔起咩。

前幾日仲打電話俾我，探我口風係唔係媽咪會親自派帖俾佢地，呢回我「拖字訣」，實行「皇帝唔急太監急」政策，耍番班衰親戚一輪先算。

其實帖我一定會派俾佢地，派餅食飯個d我都會做足，媽咪唔做咪我做囉，至於佢地點諗，佢地嚟唔嚟我都唔care了，我只可以做好本份，問心無愧!!!

諗通咗之後，個人輕鬆晒~~~

by笨豬小慧simple