7天的麗江婚照之旅終於完結了，好唔捨得呀~~~
麗江真係一個好靚的地方，雖然d人話已經比以前商業化咗好多，但那份悠閒憩靜的氣氛跟城市仍有好大分別。身處麗江，真係會令你relax，我地都好鐘意
，走個陣已經plan緊幾時再去!!!
整個拍攝過程是超級順利
由接送、選衫、討論、化妝、拍攝，每一個部分都有很多人在照顧你，深深感受到品果真的做到服務至上的承諾，給你們大拇指
。
尤其記得剛到達成都時，我們為電話卡充值的問題苦惱，打算請教品果的職員哪兒可以買到充值卡，一位高高瘦瘦的男職員二話不說主動帶我們去一間小士多買卡，又幫我們電聯客服攪充值，更幫我們確定話費夠用，才安心地離開，讓我們很不好意思呢
(麻煩到人家丟下工作幫我們)，可惜離開成都時他不在店裡，又沒問到名字，未能親身多謝他啊。
拍攝當天，非常感恩
，大晴天!!! 攝影師李剛真的很專業，每次他給我們看play back，靚到呢~~~我地都覺得好彩是全包檔案，否則買相一定買到破產；化妝師嬌嬌set頭技術很厲害!!我都知道九姑娘頭好難set，但她很快手已經set好了一個9成似的復古髮型，跟我帶去的旗袍好襯
；助手吳廸好攪笑，多謝你陪主人玩，令佢緊張無晒，pose都自然番晒。而且呢隊crew好好人，肯幫我地影埋古城夜景，害佢地要加班工作，好唔好意思。
在此我要多謝品果上上下下的員工，沒有你們一路的幫忙，我們的婚照之旅一定不會如此順利和快樂!!
特別多謝：電郵聯繫的張蓓和張晨、成都接待的慶芳、成都店超熱心的高高瘦瘦男職員、禮服師馬曉芳和冉光光、攝影師李剛、化妝師嬌嬌、助手吳廸、司機。
經驗分享當然唔少得：
- 羅亞禮服店真係有好多好多好多衫揀，多到根本無可能每件都看實物才試，但禮服師好厲害，只要你形容一下想要的顏色和外形，佢地就會係唔知邊到拎到d差唔多的款俾你試，所以唔怕揀唔到衫，連一向以為男禮無咩好揀的主人都試到不亦樂乎。而且d衫好新好乾淨，非常放心穿著。
- 男士，尤其瘦瘦仔，最好自備恤衫和西褲。主人瘦(著44碼)，配唔到啱身的黑西褲，好彩佢有帶咋。不過真係無都得，d褲全部有得校褲頭鬆緊，唔會甩褲嘅，只係個脾位會好鬆囉。
- 禮服係試完即改再fitting，如果覺得唔啱身可以要求再改。我就係無要求到，件婚紗好鬆，係咁移位。
- 品果會用佢地的喼裝禮服，如果超重唔過RMB100，都可以向佢地claim番。我有超重，不過地勤哥哥無收我地錢，所以點claim錢真係唔知了。
- 麗江天氣早晚溫差大，約早上10度左右，去到中午卻有20幾度，長袖tee加外套已經可以，著太多反而要除底拎住仲麻煩，我帶去的冷衫一件都無著過。強烈建議去到買條圍巾，夠厚又大條，非常保暖，才RMB10~15，我地買咗之後日日用住，自己帶去的冷頸巾都無用過lu。
- 麗江天氣非常乾燥，濕度比氣溫仲要低!!! 要日日敷mask，我就係咁先keep到最好狀態上粉，記得帶多d去。
- 高原地區UV超強!!! 記得搽防曬，面、身都要搽，我搽咗SPF50 PA+++都晒黑咗少少(因為化咗妝補唔到)。建議買支防曬噴霧，方便化咗妝都可以補防曬。
- 記得彩印定一份想拍咩景點、feel等等的資料，討論時俾攝影師和化妝師睇，減少溝通出誤會，你都知，大家第一次見面，真係你肚入面條蟲咩。
- 記得帶girdle同著打底褲，因為係街換衫的。
- 我的皮膚易敏感，所以自備了化妝掃、粉卜、自己用開的粉底，減少出事機會。
- 記得帶鏡，街上轉頭時自己可以照下，唔啱心意可以叫化妝師立即改，我買咗卻唔記得拎去
- 著波鞋最好，高踭鞋免了，因為好多時要琴高琴低，而且影唔到鞋，我帶咗去都無換到。
- 可以帶定D首飾，化妝師準備的款式比較簡單。
- 花球、公仔都可以帶去，但我拍到它們的機會好少。
- 帶定水(附飲管)、餅、朱古力等乾糧，無時間lunch都有d野頂下肚。我地好好彩，有時間食lunch，結果送晒俾crew members。
- 成都、麗江主要都食辣野，好食得辣的人先頂得住，所以我地咩都叫「少少少少少辣」，或者叫「唔辣」，再按自己喜好加少少辣粉。
- 基本上每日都有一餐係打邊爐，又食辣野，真係好熱氣，帶定清熱酷、以羅果子鹽、牛黃解毒片等等啦，未影前食到爆瘡瘡就慘了。
(我地只影1日，無上雪山，以下呢d係同行有上雪山的品果之友的comment)
- 買氧氣筒，因為攝影師會要求新郎又跑又抱起新娘，體能大考驗。
- 貼暖包
- 男仔著打底褲，西褲勁入風
- 去城外一間叫東X藥房買口服裝紅景天，RMB38有10支，食定!!
化絮、遊記就要等我整好d相先有得睇了(影咗好鬼多呀~~有排攪)
化絮將會private、遊記就public。想睇的JM可以留言我add你(只限有相有內容又攪緊結婚的blog友)
by笨豬小慧simple
留言列表
笨慧廚房 (3)
