簡單就是愛 - 笨豬小慧simple's blog

其實呢篇唔係D咩新野，反而係我第一次做姊妹時所著的裙，由於強差人意，絕對可以做日後揀姊妹裙公司的反面教材。

事發已經係年幾前的事，係金都邊間買已經唔記得了。呢件衫係度身造，新娘自已design，布料、車裁由姊妹裙公司提供。

首先，度身已經好求其，把尺唔啱位，又無拉平拉緊把尺嚟度，話晒姊妹裙都算貼身，咁度法，出嚟的尺寸，一定唔準。

試身的時候，發現有鬆，店長都話會改。收好之後就拎回家，我有試著。

都算一切正常，係背脊近pat pat位起角，因為塊裡布同面的雪紡布車埋時無鋪平所致，明顯係車工問題；加上鞋鞋地的雪紡，望落無咩高貴feel。不過唔洗我錢，算喇

另一個手工問題，就係裙腳，色丁部分的裙腳，竟然係用朴黐埋的!!!!好似小學生勞作堂咁，真係好兒戲!! 又係因為咁，個裙腳好硬，攪到條裙個shape好怪，D波浪好假，無晒飄逸感。

新衫買番嚟，我都有個習慣洗一洗先著，衛生好緊要嘛。點知，真係洗咗就出事，影上面張相時都算fit，洗完之後，唔知係唔係背脊D橡筋鬆咗，件衫好鬆，又因為係綁頸款，背脊塊布一跌，就係咁走光。

我初時以為因為我瘦，所以先晾唔起件衫，點知當日個個姊妹條裙都跌(大家的身型係高矮肥瘦都有)，個個結果都要黐膠紙!!! 可想而知，度身、用料係幾咁流。

件衫本來諗住做姊妹著完，到我妹妹結婚個日，我又可以著多次，慳番唔洗買衫。唉，著咗一次就勾爛咗喇

而且，原來呢件裙，盛惠$3XX!!!

度身、手工、布料，通通唔合格!! 已經唔係價錢問題咁簡單，係唔專業!!! 如果俾人知我做fashion designer畀D咁嘅質素的姊妹裙班姊妹著，真係拆自己招牌呀!!

所以，未攪結婚前，我已經同自己講，打死都唔幫襯金都的姊妹裙公司，親身試過，無謂搏。

以上純粹個人經歷和意見，如果大家曾經遇過好好的金都姊妹裙公司，歡迎回覆share吓，我都唔想人地因為我呢篇文攪到無得撈呀。

BY笨豬小慧SIMPLE