簡單就是愛 - 笨豬小慧simple's blog

5月的我太勤力了(=.=")，blog漏咗呢件大事。

2011年5月13日(五)

本來約咗尋日上去品果香港office揀相，點知主人掛住佢的社工盃籃球比賽，約晒人練波，唔記得咗好早之前已經約好睇相，我呢位好太太當然只有「讓路」啦(真係有D嬲呀，咁重要嘅事都唔記得!!)，好彩主人都知衰咗，自己打去品果改時間，好彩改到，就原諒你啦。

講番揀相先。

其實我地之前就揀好35張要入相簿的相片，只係用咗3日，估唔到快成咁。

方法好簡單，就係各自睇晒2XX張相之後，mark底鐘意的相#，綜合結果之後，已經篩淨50張相左右，於是我print晒出嚟，平舖出嚟睇好似會易D揀，結果有D差唔多pose和景色的相又篩走埋，咁就淨番37張了。

本來諗住如果$80/張，凸2張都買咗佢入相簿啦，但品果的職員竟然提意我地唔好買，因為多2張相只會加入現有的相簿中，唔抵喎。

但原來艱辛的事情，係揀邊D相入邊本相簿、油畫、簽名布等等。

我地有：
18"相簿 x 1 - 入24張相
12"相簿 x 1 - 入20張相(有10張repeat大相簿)
24"x30"油畫連框 x 1(相片不用repeat相簿)
九宮格掛畫 x 1(9張相repeat相簿)
簽名布(1張相repeat相簿)
水晶座(3張相repeat相簿)

職員教我地先揀10張入細相簿，咁會易D入手。但顧慮到排版問題，初時都唔知點決定好，幸好職員從旁細心引導，佢拎D相簿sample俾我地睇，知道大約一跨頁要揀2~3張相同景色的相，大約係1女單或1男單+1雙人照，知道撓門之後，我地就由景色入手，果然好快揀到5張出嚟了。另外職員又提醒我地，細相簿因為size細，大頭相或半身照都比較適合，我地又聽佢的意見揀D個人大粒D的相入細相簿了。

不過就咁都用咗差唔多半小時了。

之後就到揀邊D相要repeat，又係好頭痕，又要考慮同之前揀個D夾唔夾到，當然影得好靚個D先repeat啦，最後多數repeat都係拉市海景的相

係揀入相簿個時，我地都快快手揀埋油畫和簽名布要用的相。

進度良好地又過了半小時。

九宮格掛畫改了質地，變大了很多，有成張枱咁大，小小小豬欄實在無地方放得落，我更加唔想用嚟做摺枱俾人係我塊面上面食野打牌=.="，主人更話將來爛咗都唔知丟唔丟好，原本打算放棄佢轉其他野，職員話呢款亞格力畫(新的九宮格畫)係佢地的主打產品，加錢做要RMB18XX，但我地真係想要都要唔到，除非改番舊design的木框(每邊細起碼2")，職員都好熱心立即聯絡成都品果，好好彩仲可以轉舊版，仲要係主人鐘意的啡色。呢part揀相開始求其(耐性開始下跌)，揀咗3set有女單男單雙人照的景色的相片就算了。

最後到水晶座，職員提我地因為材質係透明的關係，要揀D顏色sharp和豐富的相片，造出嚟效果先突出，好彩我件黃色晚裝和當日的super藍天呀~~好容易就KO呢part了。

之後到油畫外框和相簿款式，有D可惜無咩款俾我地揀，就係職員的建議下，揀了金色有D坑紋的粗畫框(忘記影相)和打橫的相簿，封面放相+亞格力，另外我要求加名和結婚日期，估唔到係無人試過要加，幸好聯絡完成都品果後，可以加呀~~

準時完成所有揀相事項，6:30pm走得!!

非常滿意品果職員的服務，態度好nice，非常耐心地協助我地揀相，又可以係適當時候俾到意見我地，我估佢對大部分產品都好熟，當有D野佢唔sure時，又立即幫我地問成都品果，做事非常有效率，我要俾10個LIKE佢呀

一個月後可以睇第一校排版了，唔知會排成點呢

其實有D相要細執一下，我要唔要係佢地排之前講聲先呢

但有樣野蝕咗，回到家我check番，傾package個時有話包10"畫板，但張底單無寫，結果我地就無咗lu，所以各位sis落單個時要check清楚張單寫齊晒D item未。

晚餐去了一直想試的明洞Express食。

食飽飽見有時間，去了VA運吉，主人嫌貴，D款又偏王子feel，唔啱key，睇完相簿就閃人。
$1680/1套(包括外套、西褲、背心、腰封、呔)+$500 upgrade(絲絨、jacquard、真絲色丁等)
$3360/2套(同上+包upgrade)
恤衫另+$480訂造

BY笨豬小慧SIMPLE