簡單就是愛 - 笨豬小慧simple's blog

開始肚凸凸，不過分唔到究竟係BB、肚腩的肥膏、定屎屎=P，仲著到skinny jeans，其實著咗衫睇唔出有bb呢，仲未見肚。

明顯地瘦咗!! 連媽咪都話我碌脾瘦晒!! 梗係啦, 咁大個女都無見過自己合埋腳大脾中間有罅ga

嘔的情況已受到控制, 因為頂唔順去咗睇中醫, 醫師開咗d開胃健脾的中藥俾我食, 食完之後, 真係有番d胃口, 雖然仲會嘔, 但起碼唔似之前飲水都嘔, 都叫有半肚飽先嘔dd出嚟。

仲問咗醫師，究竟大肚係唔係要戒口? 佢的答案非常出人意表

海鮮<<== 呢樣嘢好多人都話大肚唔食得，中醫就話，魚、蝦都可以食，仲好有營養tim~(yeah 蝦 is 賣飛佛)，只係要避免食無鱗魚，蟹就一定一定唔可以食!

生果<<==又有人話寒涼，中醫就話，生果咁有益又點會唔食得呢~~只係芒果、榴槤、木瓜係千萬碰不得，芒果濕毒，易引起BB皮膚敏感；榴槤濕熱，不單BB易有敏感，孕婦太燥伯易便秘；木瓜會引起宮縮，孕婦食咗會作小產。

補品<<==大肚要進補? 中醫就話，唔好咁快補呀~~~初期懷孕一星期食一、兩次桑寄生蓮子蛋茶就夠安胎，如果要補，陀滿3個月才可開始，花膠、人蔘都只需一個星期食一次，但陀到7個月就要停進補，否則適得其反，會生得好辛苦；燕窩吃不得，太多激素喇

綜合醫師所講，大肚都唔洗戒口戒得太清喎

(一定唔食得組)：蟹(濕毒+寒涼)、無鱗魚、魚生(有寄生蟲，尤其三文魚)、貝類(多重金屬)、木瓜、薏米、雲耳、木耳、花椒(呢5樣會引起宮縮)、芒果、榴槤(勁濕毒)、燕窩(多激素)、軟雪糕、frozen yogurt(未經完全急凍，易有李斯特菌)、連冰的凍飲(d冰可能用生水造)、肝臟(太多維他命A會生畸胎)、綠茶、可樂(有色素)、酒

(食少少都得組)：豆漿、豆腐、蝦、冬瓜、山楂(會宮縮ga~但今次醫師開畀我的藥有，佢話份量好少無問題，幫我開胃等我食到嘢，so far飲完藥又真係開胃咗)、梨、Hagaan Dazs雪糕、雪凍的飲品(當然拎出嚟攤暖少少好d啦)、牛、羊、咖啡(最多一日一杯)、普洱茶(夠正氣)、朱古力、汽水、泡菜(含有大量益生菌，幫助便便)、辣

(食多多都ok組)：蛋、奇異果(金果味道甜d =q)、蘋果 or any生果、奶(如果飲唔到可用豆奶代替)、雞(但唔好食雞翼尖，d雞的打針位)、海魚、菜(尤其綠葉菜，含有豐富葉酸)

不過講真，當你食乜嘔乜，食得落又唔嘔番出嚟，真係拿拿林食多幾啖兼偷笑啦，仲理得佢食唔食得咩

15/5/2014(四)

好辛苦咁捱咗3個幾星期，又可以見吓BB喇~~~約咗私家醫生照閃閃

(老公要返工今次無份睇BB lu)

由於上次產檢實在太太太貴，我o地決定轉醫生!!

左問右八，經妹妹介紹終於搵到個價錢、地點、會診時間都ok的女醫生(一定要女醫生，我覺得由男醫生做檢查好尷尬)。

又因為咁，未夠3個月，老公公司的同事已經知道晒佢就做爸爸，唉..........

鄧悅翹 Dr. Rebecca Y.K. Tang

地址：九龍尖沙咀漢口道28號香港亞太中心5樓507-508A室

電話：39070152, 39070153

診症時間：(Mon-Fri) 10am-1pm; 3pm-7pm、(Sat) 10am-3pm、(Sun, PH) CLOSED

診金：$750(包括見醫生、照超聲波、相片2張、DVD1張)，藥、化驗另收費

近公司，放工去都趕得切，唔想下下請病假去睇，費事啦~~又可以慳番d病假。

預約了6:30pm，早咗少少到，姑娘同我做初次登記和磅重量血壓。

47.5kg<<比未有B前輕咗2.5kg，

之後就呆等咗1小時，等到好眼瞓呀..........我差唔多係last嗰個見醫生。

入房同醫生傾咗陣歇，好快就入另一間房照超聲波喇~~

雖然我嘔到七彩食唔到嘢瘦晒，但BB係有長大ga~~隔咗3個星期無見已經大粒咗好多^^

BB size CRL1.38cm (大約一塊指甲的大小), 7w5d, 預產期改咗12月27日

心跳150bpm, 雖然唔算大聲但好有生命力的心跳聲 (仲有d似青蛙叫的哇哇哇哇XD)

yeah~~又過一關!!

不過媽媽好笨，醫生問我睇唔睇到「閃閃」，我真係睇唔到邊度閃，醫生無我咁好氣，轉咗thermo detect mode我就見到中間位置有點紅色，醫生話呢度就係血流量最多的地方，即係心臟喇~~咪閃下閃下囉。哈哈=.="新手媽媽係矇d，好火羅..........

上次睇的楊醫生抽咗分泌去化驗，驗到我有念珠菌，好辛苦咁塞咗一星期藥(勁大粒藥，塞到好鬼痛)

今日問埋鄧醫生，仲洗唔洗抽分泌化驗，佢話唔洗，呢d念珠菌女性好commen會有，只要無臭臭分泌物，其實OK的，同埋平時正常清潔就可以，唔需要額外護理。

問一問就放心晒，老公上次聽到report嚇死佢。

so far今次的診症好滿意，鄧醫生同姑娘都好nice，診所環境、儀器都唔錯，可以長睇佢喇~~~(閉，唔記得問下次應該幾時去覆診tim)

望住BB張相片，寧舍開胃，我竟然食到大半碗拉麵 仲去埋H&M shopping~~~ 開開心心回家去^^

by笨豬小慧simple