簡單就是愛 - 笨豬小慧simple's blog

雞翼~~我鐘意食~~~~
而且依家有現成樽裝瑞士汁賣，要整瑞士雞翼，話咁易啦~~

急凍雞中翼 -- 10隻
李錦記瑞士汁 -- 150mL
水 -- 200mL
薑 -- 1~2片
可樂 -- 1/3罐

做法：
1. 雞翼解凍，洗淨備用。
2. 大鍋放進瑞士汁、水、薑、雞翼(汁料要蓋過雞翼)，煮滾後轉小火，開蓋煮10分鐘。
3. 慢慢加入可樂，再慢火煮2分鐘，熄火，上碟。

貼士：
1. 樽裝瑞士汁，李錦記和淘大都有出，我比較喜歡李錦記，因為無咁咸。
2. 加可樂係精髓，令瑞士汁更sweet，雞翼更入味又快d冧，但切記可樂要逐少落，否則會有好多泡。
3. 鐘意食骨肉分離的口感，可以煮好後閂蓋焗10~15分鐘。
4. 切忌閂蓋煮，雞翼好易爛晒，賣相無咁靚啦~~
5. 剩下的瑞士汁可放入雪櫃保存1~2天，可翻用1~2次，整其他瑞士汁食譜^^


by笨豬小慧simple

小時候很喜歡吃的一味家常菜，o係一個唔知煮乜好的日子，突然醒起佢~~~

冰鮮雞脾 -- 2隻
金針 -- 10~15條
雲耳 -- 3~4片

醃料：
生粉 -- 1茶匙
鹽 -- 1茶匙
豉油 -- 1茶匙
花雕酒 -- 1茶匙
麻油 -- 少許

做法：
1. 金針、雲耳用水浸軟，約浸15~30分鐘。
2. 雞脾洗淨，斬件，下醃料醃10~15分鐘。
3. 洗淨(1)，揸乾水份；雲耳切走硬碇，再一開二。
4. 將(3)拌入(2)中，再平鋪在瓦碟上。
5. 凍水放(4)入電飯煲，飯熟時雞也一起蒸熟了。

貼士：
1. 唔用電飯煲，可以改用鑊蒸，大鑊煲滾水，放(4)隔水蒸25~30分鐘。
2. 金針有很多沙，又有硫磺味，如果洗唔乾淨會唔好吃，仲要揸乾水先用，否則蒸起會有酸味。可先撈少許糖辟酸。
3. 蒸起的雞又嫩又夠味，雞汁撈飯一流呀~~~
4. 雞的任何一部份都可以用呢個方法蒸咖^^


by笨豬小慧simple

大埔買海鮮好平，呢度7隻帶子，仲要大大隻，只是$20!!! 太抵食喇~~~

帶子(連殼) -- 7~8隻
蒜頭 -- 半個
豉油 -- 1湯匙
油 -- 1湯匙

做法：
1. 帶子洗淨去腸，瀝乾水備用。
2. 蒜頭去皮剁成蓉。
3. 帶子平放在碟上，每粒帶子放上大量蒜蓉。
4. 大鑊煲滾水，放下(3)，閂蓋隔水蒸5分鐘，帶子變白色和離殼即是熟了。
5. 倒走碟內的水，淋上豉油。
6. 燒滾油，淋在帶子上，即成。

貼士：
1. 帶子殼太大塊，我用雞骨剪刀剪細一點，方便用細一點的碟去蒸。
2. 加些粉絲一起蒸，更惹味^^
3. 喜歡辣的，可以加些少辣椒碎一起蒸


by笨豬小慧simple

呢味撈飯一流ga~~~ =q

蠔油燴肉碎豆腐

材料：
豆腐 -- 1磚
免治豬肉(半肥瘦) -- 300g(約$20)
蠔油 -- 2湯匙
水 -- 2湯匙
豆板醬 -- 1茶匙
麻油 -- 少許
油 -- 少許

醃料：
生粉 -- 1茶匙
鹽 -- 1茶匙
生抽 -- 1茶匙
油 -- 少許

茨汁：
生粉 -- 1茶匙
暖水 -- 1湯匙

做法：
1. 豬肉下醃料醃10分鐘。
2. 豆腐切成16小塊。
3. 燒熱鑊，下少許油，下豬肉炒至八成熟，撈起備用。
4. 下豆腐，輕力兜幾下，豆腐煮熱後，下(3)兜勻，然後下水和蠔油，閂蓋中小火熟至豬肉全熟。
5. 下豆板醬，兜勻，再下茨汁，兜勻，熄火，上碟。
6. 食用前落麻油。

貼士：
1. 兜勻材料時必須一下一下慢慢地輕力地兜，以免豆腐散晒。
2. 如果煮起覺得太多水，步驟5前，揭蓋以大火煮一下，蒸發水份後再落豆板醬和打茨。


by笨豬小慧simple

家常小菜，最啱帶飯。

甜紅椒炒雞柳

材料：(2人份)
急凍雞扒 -- 1塊
甜紅椒 -- 1個
鹽 - -少許
糖 - -1茶匙
豆板醬 - -1茶匙
油 -- 少許

醃料：
生粉 -- 1茶匙
鹽 -- 半茶匙
豉油 -- 1茶匙

做法：
1. 雞扒解凍，去皮，切成小塊，下醃料醃15分鐘。
2. 甜紅椒洗淨，去錠，切半去籽，再切成小塊。
3. 鑊燒熱，下少許油，下(1)，煎炒至8成熟，撈起備用。
4. 鑊用廚紙抹乾淨，再燒熱，下少許油，爆炒(2)，炒冧後加鹽、糖調味。
5. 落(3)回鑊，炒至雞肉全熟，下豆板醬，兜勻，上碟。

貼士：
1. 想更健康，可用雞胸肉代替。
2. 甜紅椒也可用青椒、黃椒等蔬菜代替，炒的時候要快手大火，才能保持爽脆口感。
3. 我通常會去凍肉舖買已解凍的雞扒，省下解凍的時間，haha
4. 甜紅椒要揀肉厚的才好吃，買時比較一下，重身的就是厚肉的了。
5. 甜紅椒的皮皺皺的不要買，因為係唔新鮮，煮起沒有了爽脆口感。


by笨豬小慧simple

遇啱街市有平平平新鮮鮑魚賣，$50有12隻!!! 梗係要買啦~~~真係好好好食呀~~=q

清蒸鮮鮑魚

材料：
新鮮鮑魚(中式湯匙的size) -- 8~12隻
果皮 -- 半塊
蔥 -- 1條
豉油 -- 1湯匙
油 -- 1湯匙

做法：
1. 果皮用半碗水浸軟(要浸大約半小時)，方便出味。
2. 鮑魚用牙刷/百潔布刷洗外殼，去腸，洗淨瀝乾水，備用。
3. 蔥洗淨，切段；果皮揸乾水，切幼條。
4. 蔥墊碟底，上面放鮑魚，殼向下，碟邊和鮑魚間的空隙放果皮。
5. 煲一大鑊水， 水滾後放入(4)，隔水蒸6分鐘。
6. 鮑魚熟後，倒走碟內的水，淋上豉油。
7. 燒滾油，淋在鮑魚上，即成。

貼士：
1. 果皮不要直接接觸鮑魚肉，否則果皮味就會蓋過鮑魚肉的鮮味了。
2. 可先用牙籤/叉輕輕篤一下鮑魚，如果篤得入，就是熟了，否則宜逐分鐘加時翻蒸。
3. 鮑魚過熟會韌，所以蒸的時間要控制得洽到好處啊~~


by笨豬小慧simple

呢味係我的招牌菜!!!
連教我煮的媽咪都話我煮得好食過佢，老公更係食到舔舔脷=q

蕃茄洋蔥豬扒

材料：
急凍豬扒 -- 4塊
蕃茄 -- 3個 (中size)
洋蔥 -- 1個 (中size)

醃料：
生粉 -- 1湯匙
鹽 -- 1.5茶匙
生抽 -- 2茶匙
老抽 -- 1茶匙
油 -- 少許

調味料：
鹽 -- 1茶匙
糖 -- 1茶匙
黑椒碎 -- 少許
什錦香草乾 -- 少許

茨汁：
茄汁 -- 1湯匙
暖水 -- 1湯匙
生粉 -- 1茶匙

做法：
1. 豬扒解凍後，用刀背十字形地剁，剁鬆豬扒的筋，而且豬扒會變大和變薄一點。
2. 豬扒每面都仔細塗上醃料，醃30分鐘。
3. 洗淨蕃茄，其中兩個頂界刂十字，連皮用沸水煠5分鐘至蕃茄煮熟，撕走皮，切成蕃茄蓉。另一個切成8~10瓣(連皮)。
4. 洋蔥去皮洗淨，切成半圓形1cm闊的條狀。
5. 鑊燒熱少許油，煎豬扒，先煎熟兩面，再煎至8成熟，撈起備用。
6. 洗淨鑊，下少許油開鑊，下洋蔥炒至軟身，再下蕃茄瓣，蕃茄出水後加入蕃茄蓉，滾起加調味料。
7. 滾後加入豬扒，中火煮至豬扒全熟。
8. 加入茨汁，快手兜勻，熄火，上碟。

貼士：
1. 煠蕃茄時，注意水不要高過蕃茄界刂過的地方，否則蕃茄會走味啊~~
2. 豬扒煎至金黃色會更香口好吃。
3. 煮蕃茄時會不斷出水，所以我沒有加水進去煮。但如果想多些汁撈飯，可以在調味前加1/4碗水。


by笨豬小慧simple

老公鐘意食倉魚，唔想清蒸，可以試吓用豆豉蒸。
其實倉魚同豆豉好夾ga~~~~

倉魚 -- 1條 (比手掌略大的size)
薑片 -- 3~4片
豆豉 -- 1茶匙
豉油 -- 1湯匙
油 -- 1湯匙

做法：
1. 魚洗淨，去走剩餘的鰓、腸和肚內血塊，瀝乾水，放在一個窩形的瓦碟上。
2. 薑片放一片入魚肚，其他鋪在魚身上面。
3. 豆豉洗淨，稍稍用菜刀拍扁，均勻鋪在魚身上。
4. 待電飯煲水滾(噴出蒸氣)，放進魚，隔水蒸；飯熟時魚也熟了，取出魚。
5. 小心倒去魚汁，取走肚內的薑片，淋上豉油。
6. 燒滾油(要出煙)，淋到魚上。

貼士：
1. 怕魚唔熟，可在魚下面墊一隻小匙羹，晾起魚身會更易熟透。
2. 如果不用電飯煲蒸魚，可改用鑊蒸，用鑊加水到差不多蒸架的高度，水滾後放入魚隔水蒸3~5min


by笨豬小慧simple

(3個月前) 終於有電飯煲喇~~~可以煲到飯，有d正正常常的家常菜吃了。
職業靚太一定要學識蒸餸!! 用電飯煲同時蒸餸+煲飯，簡單、快捷、美味^^
半個鐘頭就有得食喇~~~

梅菜蒸肉餅

材料：(2人份)
免治豬肉(半肥瘦) -- 300g
甜梅菜 -- 半棵
生粉 -- 1茶匙
鹽 -- 半茶匙
生抽 -- 1茶匙
油 -- 少許

做法：
1. 梅菜先用水浸5~10分鐘。
2. 梅菜洗淨，揸乾水份，切碎成小粒，備用。
3. 豬肉依次與生粉、鹽、生抽、油、梅菜碎拌勻，醃5分鐘。
4. (3)平鋪在瓦碟上，造成肉餅樣。
5. 凍水放(4)進電飯煲，隔水蒸，飯熟時肉餅也一起熟了。

貼士：
1. 未下豉油前，用力撻一撻整舊豬肉，蒸出來的肉餅的口感會實d，似d剁的肉餅。
2. 洗梅菜時要逐塊葉擘開洗，因為梅菜隨街生曬，有很多沙。
3. 可按個人喜好改用咸梅菜，做法效果其實一樣的，只是我比較喜歡甜梅菜^v^


by笨豬小慧simple

大排檔名菜，最近街市新鮮蜆又靚又平，一於試吓自己炒番碟!!!

蜆 -- 1斤
蒜 -- 半個
豆豉 -- 1茶匙
辣椒 -- 半隻
油 -- 1湯匙
米酒 -- 1茶匙

做法：
1. 蜆放入大盆，注水至蓋過蜆，放置最少1小時，待蜆吐沙。
2. 蜆用牙刷/百潔布輕刷外殼，洗淨，瀝乾水備用。
3. 蒜剁成蓉。豆豉洗淨，用刀拍打以便出味。辣椒洗淨去籽，切成小粒。
4. 大火燒鑊，下油，油熱後下蒜蓉、豆豉、辣椒碎，一同爆香。
5. 然後下蜆，快手兜勻(4)的材料，轉中火翻炒，至全部蜆開口熟透。
6. 轉大火，鑊邊贊酒，兜勻，熄火，上碟。

貼士：
1. 蜆浸水時可加1茶匙鹽，幫助蜆吐沙。不過今次d蜆好新鮮，我無落鹽助吐沙，蜆又無咩沙。
2. 去到步驟(5)，我怕蜆乾炒難熟，加了1湯匙溫水，令蜆快d熟。
3. 海蜆已夠咸味，所以我無加鹽。喜歡濃味的可以熄火前試一試味，再按喜好加鹽調味。
4. 鐘意食辣的，可以按喜好增加辣椒的用量。我怕辣，只用半隻辣椒，有少少辣味提升味道而已。
5. 煮完開唔到口的蜆即是死了，不能吃唷!!


by笨豬小慧simple

半年前的入伙party，我整的私房小吃^^ (亦為新的焗爐開光，多謝兄弟A的入伙禮物啊)

雞中翼 -- 1磅
鹽 -- 1茶匙
生抽 -- 2茶匙
老抽 -- 1茶匙
黑椒碎 -- 少許
什錦香草乾 -- 2茶匙
蜜糖 -- 1湯匙
油 -- 少許

做法：
1. 雞中翼解凍後洗淨，瀝乾水份，加入鹽、生抽、老抽、黑椒、香草，醃最少2小時。
2. 焗盤鋪上兩層錫紙，焗爐190˚C預熱5~10分鐘。
3. 焗盤塗少許油，平鋪雞翼(皮向上)，放入焗爐焗15分鐘，之後反轉再焗15分鐘。
4. 將焗爐加熱至220˚C。
5. 雞翼兩面掃上蜜糖，焗5分鐘。
6. 再兩面掃蜜糖，反轉再焗5分鐘，轉金黃色即可。

貼士：
1. 掃蜜糖前，先用牙籤篤一下雞翼，看看熟未(無血水為之熟)，未熟可加焗5分鐘。
2. 我在雞翼入焗爐前再灑上香草碎和黑椒碎，製成品更香口啊~
3. 雞翼醃過夜當然更入味啦~~


by笨豬小慧simple

咁啱雪櫃有食剩的打邊爐肥牛，唔好浪費食物，炒香佢做餸，又一餐喇。

烹煮連準備的時間只需15分鐘，堪稱快靚正家常菜!!!

肥牛片 -- 150g
大蔥 -- 1條
薑 -- 2片
鹽 -- 1/2 茶匙
糖 -- 1/2 茶匙
油 -- 適量
豆板醬 -- 1茶匙

做法：
1. 肥牛事先溶雪解凍。大蔥切去根、頂部較老的部份，洗淨，斜切成1.5cm闊的圈圈。
2. 大火燒熱鑊，下油，油熱後下薑，爆香。
3. 下大蔥快炒至軟身，落鹽、糖調味。
4. 將大蔥堆到鑊邊，留空間下肥牛，快手揚開，翻炒至八成熟，再與大蔥兜勻，中火煮2分鐘左右至肥牛全熟。
5. 落豆板醬，兜勻，熄火。

貼士：
1. 我用的是日本大蔥，用中國京蔥都可以啊~
2. 老公食過番尋味，之後變化食譜，用半棵西芹代替大蔥，一樣美味。
3. 肥牛來不及溶雪，可用微波爐的解凍功能幫助一下^^


by笨豬小慧simple

聖誕節home party一人一味大食會，我揀咗整蛋糕^^

整的過程有少少蝦碌，好彩味道都唔錯，hehe。




朱古力慕士蛋糕 chocolate mousse cake


材料：(8吋/20cm圓模)

朱古力海棉蛋糕
Duncan Hines Devil's Food Cake Mix -- 1盒
蛋 -- 3隻
水 -- 1 1/3 cup (約340ml)
橄欖油 -- 1/2 cup (約125ml)

朱古力慕士
黑朱古力磚 -- 100g
淡忌廉 -- 200g
魚膠片 -- 1片
糖 -- 20g

裝飾
無糖朱古力粉 -- 3~4湯匙
顏色糖漿 -- 1小支
士多啤梨 -- 1盒
糖 -- 1茶匙
魚膠片 -- 半片
熱水 -- 1~2湯匙


工具：

8吋圓模 -- 1個
大size不鏽鋼碗 -- 2個
湯碗 -- 1個
煲(size要放得落一隻湯碗) -- 1個
電動打蛋器
麵粉篩
量杯
磅
膠刮刀
麵包刀
忌廉塗抹刀
蛋糕紙


做法：
(蛋糕)
1. 焗爐180˚C預熱。
2. cake mix倒入大碗中，加水、油，用電動打蛋器(用麵粉攪拌棒)以慢速打勻。
3. 加蛋，用電動打蛋器(用麵粉攪拌棒)以慢速打勻。
4. 中速打麵糊2分鐘。
5. 圓模鋪好蛋糕紙，倒入一半麵糊，凳平。
6. 放入焗爐焗30~35分鐘，焗好後脫模，用架晾起放涼。另一半麵糊重覆步驟(5)~(6)去焗。
(慕士)
7. 魚膠片用半碗水浸軟。
8. 黑朱古力磚搣碎，放入湯碗中。
9. 湯碗放入煲中，加入熱水(水位不可以高過湯碗)，以小火隔水煮溶朱古力，其間要不斷攪拌，溶晒熄火。
10. 加入一半淡忌廉(50g)和魚膠片，隔水煮溶。
11. 另一半淡忌廉加糖，放入大碗，用電動打蛋器(用打蛋棒)打至企身。
12. (10)加入(11)，打至企身。
(組合)
13. 蛋糕切走拱起的部份(用以整平個蛋糕)，其中一個的頂塗0.5cm厚的慕士，蓋上另一個蛋糕。
14. 餘下的慕士塗勻整個蛋糕，放入雪櫃冷藏最少1小時。
(裝飾)
13. 蛋糕面篩上朱古力粉。
14. 顏色糖漿寫字。
15. 士多啤梨洗淨，去葉，切半，鋪滿蛋糕。
16. 魚膠片浸軟，1湯匙熱水整溶，加糖，淋在生果面，用來定型。
17. 放入雪櫃再雪1小時，就可食用。


貼士：
1. 1盒cake mix可以整2個8吋大的蛋糕，但我只得一個蛋糕模，所以分開咗2次焗，再切去頂，組合埋一個。
2. 如果怕蛋糕唔熟，可先用牙籤篤入中間位，抽出後如果沒有濕的粉黏住牙籤，即係蛋糕熟透了。
3. 我第一次焗有少少唔熟，就逐次加焗1分鐘，補焗2次就攪掂了，一次補焗太耐，驚會燶啊。
4. 食譜的慕士唔太夠，唔夠我塗晒成個蛋糕，下次再整分量要加倍。


by笨豬小慧simple

情人節homemade大餐的前菜，簡單易整，連爐都唔洗開!!! 依家夏日炎炎，非常啱食。

三文魚刺身 -- 8~10片
新鮮香茜paisley -- 1小棵
Ricotta芝士 -- 100g
沙律菜 -- 1包
乾什錦香草 -- 少許
橄欖油 -- 1湯匙
意大利黑醋 -- 2茶匙
鹽 -- 少許
黑椒碎 -- 適量

做法：
1. 鮮香茜只取葉，切碎，加入乾香草，與芝士拌勻，作為釀料
2. 三文魚捲成花狀，中間空位釀入芝士餡，備用
3. 沙律菜洗淨，澀乾水份，再稍稍撕碎，鋪上碟，將(2)放在中間
4. 橄欖油、意大利黑醋、鹽混合成汁料，均勻淋在沙律菜上，全碟灑上黑椒碎，完成

貼士：
1. 我買不到Ricotta芝士，用法國軟芝士代替，味道一樣ok!
2. 汁料小心不要淋到三文魚，醋會使魚肉變得霉霉地



by笨豬小慧simple

今年情人節想挑戰要焗的點心!!! 最簡單就係整朱古力曲奇。

本來想自己買齊所有材料整，但發覺整少少都要買好多野，有好多都用唔晒，我又唔係成日整餅，D野就咁擺到過期真係好浪費，所以決定買佢就算了。(其實咪又係懶)

背面仲有詳細做法，新手都一定整到

box set入面包括了大部份所需材料：曲奇粉(入面有麵粉、發粉、鹽、糖等)、可可粉、杏仁片、朱古力粒、心型餅模、包裝用品20套。

唔洗周圍撲材料，仲幫你校好晒份量，真係好方便。

自備材料：水、雞蛋1隻、牛油50g

做法：(真人show!!)

1) 發勻雞蛋。

2) 室溫放軟牛油，之後切粒，用膠刮刀搓成一pat。

3) 加入一半的蛋漿和全部的曲奇粉，用打麵粉器攪勻。

4) 將撈好的粉平分成2份。

5) 其中一份加入可可粉和3湯匙的水，搓成粉團；另一份只加2.5湯匙水，也搓成粉團。

6) 預留5g的杏仁片和2湯匙的朱古力粒備用，其餘的杏仁片壓碎，和朱古力粒平分到2個粉團中，用膠刮刀搓勻。

7) 碌平粉團成4~5mm厚的皮，用保鮮紙包住，放入雪櫃雪1小時。

===== 跟住去咗洗野，同食咗個下午茶 ======

8) 焗爐170度預熱。

9) 用心型餅模cut出曲奇粉團。

10) 嘩!!! 開始成形喇重覆碌平和cut模的步驟，直至粉團用盡為止。

11) 之前用剩的蛋漿用來掃在餅面，隨意加上之前留起的杏仁片和朱古力粒做裝飾。

12) 放入焗爐，焗8~12分鐘。(公式做法係咁寫，我實際焗了7~8分鐘就剛剛好)

13) 焗起!!! 先放在網架上唞涼。

14) 前前後後攪咗3小時，終於成功!!!!! 包好佢就攪掂

~~~完成~~~

因為屋企無焗爐，只有多士焗爐仔一個，時間方面要自己好好控制。第一盤焗得太耐，攪到燶晒唔要得；第2盤又焗得唔夠時間，唔脆；最後一盤先成功，時間剛剛好，唔算好燶又夠脆。唔怪得要預50塊的份量啦，送得出的只有20塊，HAHAHA

不過我整得好開心，係口感差咗少少，至少MUJI出品，味道唔會有大問題。

最開心，當然係男友收到時高興的樣子啦~~~

將來有自己屋企，我一定要買個焗爐(起碼焗到雞個D)，再努力整多D唔同花款的點心，HOHOHO，食肥老公!!!!

下星期一就是情人節了，各位美人準備好禮物了嗎？

每年我都會準備手作的食物，作為給親愛的他的情人節禮物，既省錢又可表示心意，一舉兩得。

說得是情人節吃的禮物，當然和朱古力有關，今次整的是

朱古力芝士蛋糕

材料(5吋模)：

忌廉芝士   140g
朱古力   70g
忌廉   200g
魚膠粉   5.5g + 1茶匙
熱水   1湯匙 + 50mL
糖   55g
海綿蛋糕   適量
士多啤梨   3~4粒
裝飾用品   適量

用具：

5吋蛋糕模
碗(2大2小)
電動打蛋器
刀
膠刮刀

步驟：

1) 5.5g魚膠粉用1湯匙熱水整溶，攪拌至完全溶解。

2) 朱古力切細塊，隔熱水整溶，加入50g忌廉和(1)的魚膠粉溶液。

3) 150g忌廉坐冰打起備用。

4) 忌廉芝士加糖打軟。然後加入(2)朱古力溶液和(3)已打起的忌廉。

5) 海綿蛋糕切成1吋厚，鋪在餅模內造成餅底。

6) 將(4)的材料倒入餅模中。

7) 放入雪櫃雪2小時。

8) 士多啤梨切薄片，鋪滿在餅面，可以加上自備的其他裝飾品。1茶匙魚膠粉用50mL熱水整溶，淋在蛋糕裝飾上，放入雪櫃再雪1小時。

9) 脫模：用熱毛巾包住餅模，用牙籤插入邊位繞一圈，慢慢拿走模具。

完成!!!

士多啤梨啫喱糖是我特意買來的裝飾品因為寫住I LOVE YOU好啱用。

所需時間：約4小時
材料費：約HK$150

小貼士：

- 改用魚膠片效果會更好，記得先用熱水浸軟。
- 將材料加入餅模後，記記大力"登"個模幾下，一來可以整平餅面，二來可以整走入面的空氣，切開後個餅唔會有窿，賣相靚d。
- 可改用消化餅/去餡oreo/粟米片etc....做盒底。材料：餅75g、牛油30g。方法：餅入保鮮袋，用硬物壓碎；牛油隔熱水整溶，加入餅碎拌勻，再平鋪於餅模內。
- 想健康d，可改用低脂忌廉。

SWEET VALENTINE!!!

有情人的你 甜甜蜜蜜!!!

單身的你  蜜運全開!!!

第一次的煮食文，希望大家多多支持，也想你留言和推推啊~~~

一年一度的情人節又到了。情人節快樂！
首選的禮物當然是朱古力啦。要表現誠意和愛意，非手造朱古力莫屬。

松露朱古力(Truffes au Chocolate)簡單又易造，初次挑戰的朋友都一定成功。

材料：(8粒)
黑朱古力(可可含量70%)----------100g
牛油----------------------------------35g
淡忌廉------------------------------50mL
橙酒--------------------------------1茶匙
朱古力粉----------------------------適量

用具：
食物盒-------------------------------1個
可入微波爐的容器------------------3個
大碗----------------------------------1個
橡皮刮刀-----------------------------1把
透明膠手套--------------------------1對
篩-------------------------------------1個
迷你蛋撻紙--------------------------8個
紙盒----------------------------------1個

作法：
1. 微波爐大火(800W)叮朱古力20秒，共3次。再隔熱水煮溶。
2. 微波爐大火叮牛油40秒。
3. 微波爐大火叮淡忌廉20秒。
4. 將牛油加入朱古力溶液中，拌均。
5. 將淡忌廉加入朱古力溶液中，拌均。
6. 加入橙酒，拌均。
7. 放入食物盒室溫放涼。
8. 脫模分成8份，搓成圓球，篩上朱古力粉即成。

貼士：
1. 怕肥可用淡奶代替淡忌廉。
2. 可加入無鹽已焗果仁做夾心。
3. 可用咖啡酒或冧酒代替橙酒。
4. 可用防潮糖霜代替朱古力粉。

聖誕節又點少得蛋糕？第一次整jar。賣相味道都OK啦。

材料：(6吋蛋糕模)
消化餅----------------------------5塊
淡牛油----------------------------30g
忌廉芝士(cream cheese)----250g
糖----------------------------------60g
淡忌廉(whipping cream)-----220g
魚膠粉--------------------------2茶匙
熱水-----------------------------2湯匙
藍莓果醬-------------------------60g

步驟：
1. 牛油隔水熱溶。消化餅入保鮮袋壓碎。
2. 餅碎加入牛油溶液拌勻，壓實於蛋糕模內雪凍備用。
3. 淡忌廉6分打發備用。
4. 忌廉芝士加糖打發至糖溶解，加入藍莓果醬拌勻。
5. 魚膠粉加水溶解，加進芝士餡內，再加入已打起的淡忌廉攪勻，倒入餅模內，放入雪櫃凝固。
6. 熱毛巾包著餅模外面，小心脫模，蛋糕面淋上藍莓果醬和加上裝飾。

貼士：
1. 6分打發即忌廉打起至乳液狀，拿開打蛋器，淡忌廉成濃液狀，有水滴但打蛋器仍可黏住少許忌廉。
2. 消化餅可用相同重量的去餡oreo代替。
3. 脫模時遇困難怕整爛個餅，可插一支牙籤在餅邊，沿邊挖一圈，餅就容易脫出來。
4. 蛋糕最少雪3~4小時才可脫模。

(4人用)
材料：
青椒2個　牛肉$20　蒜頭1/4個

醃料：
生粉1湯匙　生抽1湯匙　油2茶匙　喼汁2茶匙

步驟：
1. 牛肉倒紋切條狀，下醃料醃15分鐘。
2. 青椒洗淨去籽，切成條狀。
3. 蒜頭去皮，切成小粒。
4. 大火燒熱鑊，下2湯匙油，油熱(出煙)下蒜粒爆香。
5. 下牛肉。先煎好兩面，再炒。
6. 牛肉炒至7-8成熟，撈起待用。
7. 下少許油燒熱。
8. 下青椒快炒，加1茶匙鹽。
9. 待青椒開始軟身，下牛肉炒勻。
10. 下小半碗水，加蓋數分鐘。
11. 收水上碟。完成。

小貼士：
1. 牛肉切忌用鹽醃，會使牛肉變韌。
2. 倒紋切牛肉，否則牛肉會變韌。
3. 如果喜歡吃爽口的青椒，可以不加水煮。
4. 想更有牛肉味，可加1-2茶匙的紅酒醃。