簡單就是愛 - 笨豬小慧simple's blog

Le Creuset 24cm Oval 'Au Gratin' Dish 開光菜~~

買得太多材料，放到好滿呀~~~差D放唔晒 XP (所以最後放棄了青椒)

焗得好成功呀~~~芝士少少燶，但又無乾晒，仲有好多茄汁撈飯啊~~

焗豬扒飯

材料：(2人份) (LC 24cm~26cm baking dish)
急凍無骨豬扒 -- 2~3塊
蕃茄(中) -- 2個
洋蔥 -- 1個
青椒 -- 1個
隔夜飯 -- 2碗
薑 -- 2片(切粒)
蛋 -- 1隻
蒜 -- 3瓣(切蓉)
生粉 -- 2湯匙
Parmesan cheese - 大量

醃料：
生粉 -- 1湯匙
鹽 -- 1茶匙
生抽 -- 2茶匙
老抽 -- 1茶匙
油 -- 少許

調味料：
鹽 -- 1茶匙
糖 -- 1茶匙
黑椒碎 -- 半茶匙
什錦香草乾 -- 1茶匙

茨汁：
茄汁 -- 2湯匙
暖水 -- 1湯匙
生粉 -- 1茶匙

做法：
1. 豬扒解凍，刀背剁鬆，每面塗上醃料，醃30分鐘。
2. 蕃茄一開六再開半；洋蔥去皮切大片；青椒去籽切大片；蛋打勻成蛋液。
3. 易潔鑊下油，爆香薑，下冷飯炒鬆，逐少加入蛋液(分3次)，不停翻炒，至飯粒沾滿蛋液，剩起放在LC dish上。
4. 豬扒撲上生粉。洗淨鑊，下油爆香蒜，煎豬扒，先大火煎至兩面金黃色，再中火煎至8成熟，剩起放在飯面上。(如果想方便食用，煎好後就剪細豬扒)
5. 再洗淨鑊，下油爆香洋蔥、青椒，然後下蕃茄，出水後下調味料，兜勻後下茨汁，試味(唔夠味再加調味，太咸加茄汁)，汁變稠後熄火。
6. 將(5)淋在豬扒上。
7. 灑上大量芝士碎。
8. 焗爐220˚C預熱，放入豬扒飯焗15分鐘，至汁乾身和芝士轉金黃色，即成!!

貼士：
1. 如果沒有隔夜飯，也可用即煲飯，但要比平時少落1湯匙水，飯熟後即打開煲蓋(免倒汗水)，摷鬆飯，放涼和待水份蒸發，再用來炒。
2. 用易潔鑊炒飯和煎豬扒，可免黐底。每次洗鑊只需用濕的廚紙抹乾淨即可，很方便啊~~
3. 撲生粉再煎扒，就可以有脆脆口感，又能保存豬扒水份，免焗起後豬扒太乾。
4. 黃金炒飯有幾個炒法，我自己偏向先炒熱飯再加蛋液。



by笨豬小慧simple

試新o野，HAHAHAHA，好彩都算成功 =P

烏頭魚 -- 1條
檸檬 -- 1個
粗鹽 -- 半包

汁料：
蒜(切蓉) -- 2~3瓣
辣椒 -- 半條
白醋 -- 1小碟
糖 -- 1茶匙

做法：
1. 烏頭不要去鱗，只去走內臟，洗淨，抹乾水份，備用。
2. 檸檬洗淨，抹乾，切成薄片，塞入魚肚。

4. 焗爐250˚C預熱10~15分鐘，放入魚焗25分鐘。

5. 魚取出後，掃走鹽，揭起魚皮，即成。魚肉沾汁料食會更好味=q

圖片步驟：

1. 錫紙不用覆蓋整條烏頭，否則會出水，會變成咸魚啊~
2. 切記切記不用去鱗!!! 連皮連鱗焗才能成功!!
3. 如果焗到粗鹽變硬和轉啡色，就100分了!! 今次d粗鹽無轉色，香味唔夠。
4. 改沾泰式酸甜汁一樣好好味啊~~~


by笨豬小慧simple

媽媽生日大食會特別泡製的甜品。
(相關閱讀：媽媽生日大食會)

真係好容易整，連我呢位甜品白痴都成功整到，HAHAHA
而且有得玩又有得食，大家都食得好開心呀~~

法式焦糖燉蛋Creme Brulee

材料：(6杯份量)
淡忌廉whipping cream -- 250mL
牛奶 -- 250mL
糖 -- 50g
雲呢嗱條 -- 1/3 條
蛋 -- 3隻

焦糖材料：
白砂糖 -- 適量

噴火槍
打邊爐用gas -- 1支

燉蛋做法：
1. 先打發蛋，再加糖打勻，至糖完全溶解和蛋漿轉淡黃色。
2. 牛奶、淡忌廉倒入煲中。
3. 雲呢嗱條打平切半，用刀的尖端取出籽，放入(2)中，剩下的雲呢嗱條也一併放入煲中。
4. 中火加熱奶，見煲邊出現泡泡便熄火。(不能煮沸，否則乳脂會被分離出來)
5. 將(1)逐少加入(4)，攪勻。(唔好一次過落晒，邊落邊攪拌，小心蛋漿熟晒。)
6. 過篩，均分倒入焗杯內。
7. 用小匙撇走泡沫。
8. 焗爐200˚C預熱。
9. 杯放焗盤內，焗盤注入1/3熱水，150˚C焗40分鐘。
10. 出爐後室溫放涼，放入雪櫃冷藏最少2小時。

脆皮焦糖做法：
1. 由雪櫃取出燉蛋，將1~2茶匙砂糖灑在冰凍的燉蛋上，用噴火槍燒成焦糖，凝固後就成為焦糖脆皮了。

貼士：

1. 焗好後的樣子，邊邊有D起泡，haha，老咗少少啦~~~應該焗到一半時，取出蓋上錫紙，就唔怕焗燶。
2. 第2次整，焗到最後10分鐘，改用100˚C焗，就沒有焗過頭面層老晒的現象了~~
3. (其他食譜教，未試過)如果沒有噴火槍，可改用焗爐整焦糖。方法：灑上1~2茶匙砂糖，230˚C入焗爐，放在最頂一格，焗至面層轉金黃色即可。

4. 加了焦糖的燉蛋再放入雪櫃，脆皮焦糖會變回水(溶掉了)，味道一樣OK，只是欠了脆脆的口感。
5. 三天內要吃光!!! 蛋和奶的食品很易變壞啊，不易久留。

BY笨豬小慧SIMPLE

媽媽生日大食會特別呈獻。(相關閱讀：媽媽生日大食會)

呢個湯真係好啱大食會，既易整，又包含大量蔬菜，唔怕個個做晒食肉獸啦~~~
而且煲起d牛尾勁冧勁入味，好好食呀~~
變成一湯二食了^^ 又可以慳功夫唔洗整多樣食物，wahahaha

牛尾什菜湯

材料 (4~6人份量)：
急凍牛尾 -- 1~1.5磅 (約$40)
椰菜 -- 1個
蕃茄(中) -- 3個
蕃茄(大) -- 1個
甘筍 -- 1條
水 -- 2湯碗
鹽 -- 2~3茶匙

做法：
1. 牛尾剪走部分肥膏，汆水過冷河，瀝乾水備用。
2. 蔬菜洗淨。椰菜切粗條；蕃茄去綠切成大件；甘筍去皮切成大件。
3. 全部材料放入大煲，加水至蓋過所有材料，大火煲滾，再放入真空煲燜2小時。
4. 取出後，先用大火煲滾，轉小火煲30分鐘，加鹽調味，即成。

貼士：
1. 中型蕃茄夠酸但不夠汁；大型蕃茄肉厚多汁但不夠酸，所以混合使用，各取長處又互補不足。
2. 如果沒有真空煲，水滾後，可改以小火煲1.5~2小時。



笨豬小慧simple

9 月LC開倉買的18cm rectangular dish之開光菜 =p

香草白酒焗三文魚

(Le Creuset 18cm Rectangular Dish)

材料：
三文魚扒 -- 一塊(約300g)
車厘茄 -- 5~8粒
白酒 -- 2湯匙

醃料：
橄欖油 -- 1/2 湯匙
鹽 -- 1/4 茶匙
黑椒碎 -- 1/8 茶匙
新鮮百里香 -- 1/2 湯匙
新鮮迷迭香 -- 1/2 湯匙

做法：
1. 三文魚洗淨抹乾，放在LC Dish內，下醃料醃5分鐘。
2. 焗爐250˚C預熱。

3. 車厘茄洗淨，混和少許鹽、橄欖油，放在LC Dish兩側的空位。
4. 淋上白酒，入焗爐以150˚C焗25分鐘即成。

貼士：
1. 如果買不到新鮮的百里香和迷迭香，可用1湯匙的意大利什錦香草乾代替。
2. 低溫慢焗，魚肉外脆內滑，yummy。
3. 我怕魚扒太厚唔夠熟，再用200˚C加焗5分鐘。

4. 長條形的三文魚扒原來很難找啊，最後在樓上搵到呢款急凍三文魚扒，價廉物美，無骨，去皮後就可烹調了。

by笨豬小慧simple

(2012年)今年大閘蟹豐收，D貨多到周街都有得賣(睇新聞先知，連深水埗某豆腐舖都有得賣=0=")
而且價錢勁平，羔又多，真係好難忍口呀~~~
(我勁LIKE大閘蟹=q)

樓下街市賣緊$20/隻，已經有半隻手掌咁大隻，平成咁，唔食對唔住自己啦~~
公毑價錢一樣，我o地買了2公2毑。
仲送埋紫蘇葉tim~~~魚檔的service實在太貼心喇~~~
其實仲有D大隻D，3.5吋直徑size只是$60隻，真係一人一隻當飯食都得!!!
但我第一次整，唔敢買咁大隻，都係買D細隻try吓先啦~~

做法：
1. 紫蘇葉浸軟，洗走泥沙，揸乾水備用。
2. 大閘蟹不用解開水草，用牙刷刷乾淨蟹身。
3. 大片的紫蘇葉放在碟上，蟹(連水草)再放上面，肚向上(咁熟咗D羔就會黐實蟹蓋)，每隻蟹上再放一小片紫蘇葉。
4. 隔水蒸20~30分鐘。
5. 蒸熟後，倒走碟內的水，剪走水草，上碟!!
6. 輔以食蟹轉用剪刀和長挖，方便拆蟹和食用^v^

貼士：
1. 紫蘇葉有解毒驅寒作用，而大閘蟹是寒涼濕毒，兩者互相抵消。
2. 食完蟹切勿再吃柿，會胃氣脹痛ga>^<

咪睇佢細細隻，揭開蟹蓋，D羔多到baba聲!!!
香甜的蟹羔，齒甲留香，真係食得好開心啊~~~HOHOHOHO

主人衰到食晒d羔同個蟹身之後，就唔拆d蟹腳食，佢話咁平，再買再食過=.="，但我覺得有d浪費食物囉.........


食完大閘蟹之後，再飲番杯黑糖薑母茶，驅一驅寒，成件事就完滿晒^口^

材料：
黑糖薑母茶磚 -- 1塊
片糖 -- 半塊
紫蘇葉 -- 1~2塊
水 -- 500mL

做法：
1. 小煲下500mL水、紫蘇葉，煲滾。
2. 下黑糖薑母茶磚、片糖，轉小火，不斷攪拌至糖全部煮溶。
3. 熄火，浸至食完蟹後食用。

貼士：

1. 黑糖薑母茶是主人的台灣手信，佢買呢款太辣，所以加片糖中和番辣味。
2. 薑茶一定要熱飲才有驅寒作用!!



BY笨豬小慧SIMPLE

買咗新的不鏽鋼鑊，可以炒海鮮喇~~~YEAH!!! (相關閱讀：不鏽鋼鑊)
中秋後，蟹就最肥美多羔，一於整炒蟹來開鑊!!!!!

第一次煮就成功，真係好美味呀~~~~
只是我被蟹拑夾了一下T^T受傷了，好痛Y_Y
而且新買的不鏽鋼鑊，第一次用就燒黑了，HAHAHAHA，果然五層鑊比較好=P

薑蔥炒蟹

材料：(2人份量)
花蟹 -- 2隻 (約共12両重)
薑 -- 5大片 (切絲)
蔥 -- 2棵 (切段)
紹興酒 -- 1湯匙
水 -- 半碗

汁料：
蠔油 -- 1湯匙
生抽 -- 1湯匙
糖 -- 1茶匙

做法：
1. 筷子由口插入蟹身，kill it >~~<
2. 洗淨蟹，輕輕刷刷殼。
3. 劏蟹：扭斷蟹拑，用刀背扑裂硬殼，方便入味和食用；去走腹部的奄，沖走排泄物；揭起蟹蓋，沖淨；去腮去腸，蟹身一開四，沾上少許生粉。
4. 燒熱大量油，下薑和白色的蔥起鑊，先爆蟹蓋，後加入蟹身，最後落蟹拑，中大火半煎炸地炒，小心蟹羔跌出。
3. 贊酒，加水和汁料，加蓋焗3分鐘至蟹熟。
5. 加入餘下的蔥，炒至收汁，即成。

貼士：
1. 我家中沒有紹興酒，改用了花雕，一樣美味啊~~
2. 死蟹肉質會變水，所以要買游水的。
3. 如果唔識kill蟹，也可以叫魚檔幫手劏，但回家要立即煮。



BY笨豬小慧SIMPLE

秋冬時節天氣乾燥，口乾舌燥，多痰又有幾聲咳，係時候要補一補，潤一潤。

川貝，止咳化痰，清熱散結；雪梨，生津止渴，清熱潤肺；
川貝燉雪梨滋潤化燥，寧肺止咳，最啱感冒唔清，久咳唔斷尾。
加埋通鼻塞一流的薄荷葉，食完又潤又爽，吸啖氣都通順d!!

雪梨 -- 1個
川貝粉 -- 1茶匙
蜜糖 -- 1~2茶匙
開水 -- 1茶匙
薄荷葉乾 - 1茶匙

做法：
1. 雪梨洗淨，於近莖部的1/5位置切開，當蓋子備用。
2. 用鐵湯匙挖去芯，將雪梨造成杯形。
3. 薄荷葉用少許水浸泡一下，洗去污糟嘢，揸乾水備用。
4. 雪梨杯放入川貝粉和水，攪勻後加入蜜糖，最後放薄荷葉。
4. 雪梨蓋上(1)，用數支牙籤固定，小心移放在飯碗裡。
5. 將(4)放進大煲，加水到飯碗一半的高度，水滾後以慢火燉2小時即成。

貼士：
1. 寒咳人士不宜服用。(即指逢晚上就咳、痰為透明色的人)
2. 此饌專治肺燥痰多，感冒咳嗽久醫無效的人，吃後痰易咳出，痰量減少，多吃2~3劑就可完全清痰喇~
3. 川貝味帶苦，不喜歡苦味的人，可以多加些少蜜糖，但切勿太多，甜食易惹痰。
4. 可用冰糖6g(大約手指公指頭的size)代替蜜糖。
5. 先墊廚紙/蒸架在大煲底，可防止飯碗在煲內翻倒。
6. 川貝在中藥房有售，可買原粒，叫藥房幫忙磨成粉，或者直接買粉狀的。薄荷葉乾也可在中藥房買到。
7. 小心留意煲乾水，每隔30分鐘查看一下，如乾水請加熱水進大煲。


by笨豬小慧simple

整得鹵水牛展，唔爭在整多樣鹵o野

鹵水豆腐

材料：
炸豆腐 -- 1磚
鹵水汁 -- 250mL
水 -- 2杯

做法：
1. 炸豆腐切成1.5cm的厚片，放入煲滾的鹵水汁中，煮至汁翻滾即可。
2. 熄火浸15分鐘，即成。

貼士：
1. 我因為懶，買了現成的炸豆腐做。想講究D，可買普通的豆腐切件，走油至金黃色，自製成炸豆腐。
2. 鹵水汁，我當然用番鹵水牛展用剩o個D啦，HAHAHA


BY笨豬小慧SIMPLE

主人的家鄉菜，依家有現成鹵水汁賣，即管試吓煮先^^

鹵水牛展

材料：
急凍金錢展 -- 1條
李錦記鹵水汁 -- 半支
花椒 -- 少許
八角 -- 少許
冰糖 -- 1~2大舊
薑 -- 1片
水 -- 半支 (跟鹵水汁的份量一樣多)

做法：
1. 牛展解雪後汆水，洗淨備用。
2. 鹵水汁加水(比例1:1)，煮滾，放入所有材料，再滾起後，轉中慢火燘1~1.5小時。

3. 撈起牛展，鹵水汁留下待用，放涼後放入雪櫃冷藏。
4. 牛展放涼後，用保鮮紙包裹扎實，放入雪櫃冷藏最少2小時。(雪硬後方便切片)
5. 食用時，取出牛展切薄片，煮滾鹵水汁，淋上即可。

貼士：
1. 支裝鹵水汁比較咸，建議加水溝淡，再加入花椒八角增加香味。
2. 花椒八角建議放入茶包袋中，才放入鍋煮，我忘記呢一步，煮好後要逐粒花椒夾走呢......
3. 要邊煮邊試味，發覺太咸，可加冰糖調味。
4. 鹵水汁可以循環再用，撇走油後，入保鮮袋冷藏於冰箱，會愈養愈好味ga~~再用時煮滾補回香料和豉油就可以了。

(點解電腦打唔到正體的"展"字呢...........=.=")

BY笨豬小慧SIMPLE

朋友生日party特別呈獻~~~~不過好似買得太多料，唔係好夠水=p



羅宋湯

材料：(6~8人用)
牛柳 -- 半斤
蕃茄 -- 3~4個
薯仔 -- 1~2個
椰菜 -- 半個
甘筍 -- 1條
西芹 -- 半棵
月桂葉bay leaves -- 3片
檸檬 -- 1個
水 -- 約2湯碗
鹽 -- 2~3茶匙

做法：
1. 牛柳洗淨，切成大塊，汆水和過冷河，備用。
2. 所有蔬菜洗淨。
3. 薯仔、甘筍去皮，滾刀切角成大塊。
4. 蕃茄一開六，再每瓣中間切一刀。
5. 西芹去筋，切成1cm粗的粒粒。
6. 椰菜切去底部較硬的部份，再切成1cm粗的條狀。
7. 材料(1)~(6)放入大鍋中，加水至蓋過所有材料(但不要超過煲的8分滿)，加入bay leaves。
8. 檸檬切半，一半揸汁倒入鍋內，另一半再切半，連皮放入鍋內。
9. 大火煲至水滾，轉小火煲30分鐘，再放入真空煲燜2~3小時。
10. 取出後，用大火先煲滾，再轉小火翻煲30分鐘，落鹽調味，即成。

貼士：
1. 除牛柳外，可改用牛尾、牛展、豬骨、豬展等肉類代替。我買了冰鮮的牛柳，牛味都ok呀。
2. 我買了較大個又冧身的蕃茄，肉厚多汁但唔夠酸，所以加了檸檬汁補數；如果用細隻硬身的蕃茄，因為較酸，可以唔加檸檬汁。
3. 傳統食譜應該有洋蔥、青椒，但我的煲太細了，唯有將就將就，省略了=p
4. 如果唔用真空煲，大火煲滾後，轉小火煲1~2小時就可以了。

by笨豬小慧simple


羅宋湯Wiki百科：http://zh.wikipedia.org/zh-tw/%E7%BE%85%E5%AE%8B%E6%B9%AF

買咗D急凍大蝦碌，整有味蝦啱晒~~

中蝦 -- 6~8隻
蒜 -- 2粒
薑 -- 2片
生粉 -- 1~2湯匙
油 -- 2湯匙

汁料：
老抽 -- 1茶匙
生抽 - 1茶匙
雞粉 -- 1/3 茶匙
糖 -- 1/2 茶匙

做法：
1. 蝦洗淨，剪去鬚、角和腳，背部剪開，去腸，用廚紙吸乾水，備用。
2. 蒜頭切粒；薑切絲。
3. 蝦沾上薄薄的生粉，下油熱鑊，加入蝦走油，半煎炸至8成熟(約煮3~5分鐘)，撈起，廚紙吸油，備用。
4. 倒走多餘的油，爆香蒜和薑。
5. 加入汁料和大蝦，煮至收汁即成。

貼士：
1. 食得健康D，可以skip走油的步驟，爆香薑蒜後，直接落蝦炒熟，再落汁料。


BY笨豬小慧SIMPLE

之前第一次整土匪雞翼，都算成功啦，味道有7成似。(相關閱讀：[食譜] 土匪雞翼)

我要精益求精，試食多次譚仔三哥的土匪雞翼，原來我就係差個陣麻麻痺痺的味道!!!

於是，就產生咗呢個改良版的食譜。味度終於有9成9似喇~~~~
(只係差炭烤味，不過在家做唔到炭爐BBQ咧)

雞翼 -- 1磅
孜然粉 -- 3~4茶匙
川椒粉 -- 1~2茶匙
黑芝麻 -- 大量

醃料：
生粉 -- 1茶匙
雞粉 -- 1茶匙
孜然粉 -- 2茶匙
鹽 -- 1茶匙
糖 -- 半茶匙
生抽 -- 1茶匙
酒 -- 1茶匙
胡椒粉 -- 少許
蒜粉 -- 2茶匙

做法：
1. 雞翼解雪，洗淨， 用醃料醃過夜。
2. 白鑊炒香黑芝麻，放涼，備用(建議入樽/罌仔)
3. 焗爐200˚C預熱。焗盤鋪雙層錫紙，掃少許油。
4. 雞翼排好在焗盤上(皮向下)，灑上適量孜然粉、川椒粉、黑芝麻，入焗爐焗10分鐘。
5. 反轉雞翼，重覆步驟4一次。

貼士：
1. 孜然粉多數用來醃羊用，印尼食品店有售。
2. 川椒就是四川菜麻辣味道的來源，我在大埔的雜貨店買到，或者賣印泰食材店會有卦。可用花椒粉代替^ ^
2. 唔用焗爐，可改用鑊煎，先大火煎脆兩面，再轉中火煎熟雞翼，邊煎邊加黑芝麻和川椒粉。
3. 酒我用了花雕，用紹興酒或米酒都可以。
4. 如果食得辣，可加少許辣椒粉。



by笨豬小慧simple

呢個湯非常滋潤，呢排天氣乾燥，真係好啱飲!!!

雪耳，又名「平民花膠」，含豐富骨膠原，女士多吃，皮膚自然靚靚。
乾的雪耳應該是淡黃色的，太白的可能落咗漂白劑，食咗無益ga，唔好買。size其實無咩所謂，當然愈大隻，就愈貴，又唔怕滾到溶晒啦。

蘋果雪梨雪耳豬展湯

材料：(4~6人用)
蘋果 -- 2~3個
雪梨 -- 2~3個
雪耳(大) -- 2個
豬展 -- $20
南北杏 -- 2湯匙
蜜棗 -- 2粒
水 -- 約2湯碗
鹽 -- 2~3茶匙

做法：
1. 雪耳用水浸發，浸軟後仔細洗淨，剪走底部較硬的地方，一開4~6瓣，瀝乾水備用。
2. 豬展洗淨，汆水，過冷河，備用。
3. 南北杏先浸一下，洗走灰塵、硫磺，倒走水備用。蜜棗沖洗備用。
4. 蘋果、雪梨洗淨，一開六，去莖去芯。
5. 所有材料放入大煲中，加水至浸過所有材料(但不要超過煲的8分滿，免滾瀉)，大火煲至水滾。
6. 放入真空煲燜2~3小時。
7. 取出後，再用大火翻煮至水滾，加入2~3茶匙鹽調味，即成!

貼士：
1. 雪耳隨街生曬，沾滿很多沙石，所以要仔細反開每塊瓣清洗啊~
2. 雪耳可用黃耳代替，價錢平D，食療效果差唔多jar，只是口感無雪耳咁滑。黃耳顏色是土黃色，size細隻D，瓣是圓圓地一粒一粒咁樣。
3. 沒有真空煲，可用小火煲2小時，即成。

BY笨豬小慧SIMPLE

一田大減價時，買咗盒急凍中蝦，最啱整有味蝦，hahahaha

焗的時候已經香味四溢，食完直情齒甲留香~~~
但因為用上大量牛油烹調，肥死人ga~~~實在不宜多吃=P

蒜蓉牛油焗蝦

材料：
急凍中蝦 -- 10~12隻
蒜頭 -- 半個
有鹽牛油 -- 大量
黑椒碎 -- 少許

做法：
1. 蝦解凍，剪去鬆、角、咀、腳、尾，再於頂部由頭到尾剪開，去腸，洗淨抹乾，備用。
2. 蒜頭剁成蓉。
3. 燒熱煎pan，下一半牛油，熱溶後，下蒜蓉爆香。
4. 焗盤鋪上兩層錫紙。蝦平鋪在焗盤上，灑上黑椒碎，每隻蝦放滿(3)，再將另一半牛油均分放滿。
5. 將(4)放入焗爐，180˚C焗10分鐘，至蝦轉橙色即成。

貼士：
1. 賣相好一點可加些香茜、蔥花做裝飾。
2. 我剪蝦時，有D尾部無完全剪開，焗起後變得曲曲了。
3. 想蝦保持筆直，焗前用牙籤穿過蝦身定形，焗好後再取走牙籤。


BY笨豬小慧SIMPLE

譚仔三哥名菜「土匪雞翼」，依家在家都可以整到喇~~~其實唔係好難ga jar。
整起後香味撲鼻，聞到已經想食=q，都有7成似ga~~~~

土匪雞翼

材料：
雞翼 -- 1磅
孜然粉 -- 3~4茶匙
小茴香 -- 1~2茶匙(磨碎)
黑芝麻 -- 大量

醃料：
生粉 -- 1茶匙
雞粉 -- 1茶匙
孜然粉 -- 2茶匙
鹽 -- 1茶匙
糖 -- 半茶匙
生抽 -- 1茶匙
酒 -- 1茶匙
胡椒粉 -- 少許

做法：
1. 雞翼解雪，洗淨， 用醃料醃過夜。
2. 白鑊炒香黑芝麻，放涼，備用(建議入樽/罌仔)
3. 焗爐200˚C預熱。焗盤鋪雙層錫紙，掃少許油。
4. 雞翼排好在焗盤上(皮向下)，灑上適量孜然粉、小茴香、黑芝麻，入焗爐焗10~15分鐘。
5. 反轉雞翼，重覆步驟4一次。
6. 上碟後再灑上少許孜然粉。

貼士：
1. 孜然粉、小茴香多數用來醃羊用，印尼食品店有售。
2. 唔用焗爐，可改用鑊煎，先大火煎脆兩面，再轉中火煎熟雞翼，邊煎邊加黑芝麻和孜然粉。
3. 酒我用了花雕，用紹興酒或米酒都可以。
4. 因為我唔食辣，所以skip咗花椒粉/辣椒粉，食得辣可以加番d，應該仲香口



by笨豬小慧simple

原來依家金寶湯出咗好多罐頭醬汁，非常方便我呢d職業靚太，簡單快脆又煮起一餐。

食譜參考：http://www.campbellskitchen.com.hk/zh/carbonara-mushroom-and-bacon-pasta/

材料：(2人份)
金寶卡邦尼蘑菇醬汁 -- 1罐
意粉 -- 半包(約200g~250g)
洋蔥 -- 半個
煙肉 -- 3條
蘑菇 -- 3粒
水 -- 1大煲+1/5罐
鹽 -- 1茶匙
黑椒碎 -- 少許
片裝芝士 -- 1塊

做法：
1. 煲滾一大煲水，放入意粉，放鹽，煮至剛剛全熟(即意粉芯變軟，約煮8~10分鐘)，倒去熱水，意粉過冷河，瀝乾備用。
2. 洋蔥去皮切粒；煙肉切粒；蘑菇切薄片。
3. 先爆香煙肉，撈起，再爆香洋蔥和蘑菇，蘑菇變軟後，下煙肉回鑊。
4. 下卡邦尼汁，加少許熱水入罐頭，攪幾下後倒埋落鑊，轉小火，快手兜勻成汁。
5. 汁滾起後，下撕碎的芝士、意粉和黑椒碎，兜勻，即成。

貼士：
1. 一次過落晒d意粉撈汁會好難兜勻，建議分幾次落，同用筷子兜，就唔怕d意粉斷晒。
2. 唔落片裝芝士，可於食時加d芝士粉，一樣咁正=q


by笨豬小慧simple

看似複雜，其實做法非常簡單的食譜。
煮起骨肉有少少分離，肉冧汁濃，老公主人食到舔舔脷~~yummy :q

金沙骨 -- 4條
薑 -- 2片
乾蔥 -- 2粒

醃料：
喼汁 -- 1湯匙
生抽 -- 1湯匙
糖 -- 半茶匙

汁料：
喼汁 -- 4湯匙
茄汁 -- 2湯匙
片糖 -- 半塊
水 -- 2碗

做法：
1. 金沙骨洗淨抹乾，用醃料醃10分鐘。
2. 薑切片；乾蔥切絲。
3. 燒熱鑊，下油，油熱後下薑、乾蔥炒香。
4. 下金沙骨，大火煎至四面金黃色。
5. 加水浸過所以金沙骨，再下其餘汁料煮滾。
6. 蓋上鑊蓋，轉中慢火炆30分鐘。
7. 開蓋轉大火，煮至收汁，即成。

貼士：
1. 金沙骨用急凍貨比較伐算，我找不到急凍，所以買了貴d的新鮮的一字骨腩排，再叫肉檔師傅一開八(所以我醃料要加倍)。
2. 金沙骨要用每條約長8~12cm的size
3. 收汁前記得試味，唔夠味可以加少許鹽，太酸就加糖。


by笨豬小慧simple

2012父親節特別呈獻。

焗芝士肉醬意粉

材料：(4~6人份)
免治牛肉 -- 300g
免治豬肉 -- 200g
蒜頭 -- 3瓣
洋蔥 -- 半個
蕃茄 -- 2個
意粉 -- 1包
鹽 -- 少許
Kraft碎芝士 -- 適量

醃料：
生粉 -- 1茶匙
生抽 -- 1湯匙
老抽 -- 1茶匙
酒 -- 1茶匙
喼汁 -- 1茶匙
黑椒碎 -- 少許
油 -- 少許

汁料(A)：
蕃茄 -- 3~4個
洋蔥 -- 半個
蒜頭 -- 3瓣
茄膏(小) -- 半罐
香草 -- 2湯匙
黑椒碎 -- 1湯匙
糖 -- 1茶匙
鹽 -- 少許


先做蕃茄醬底(A)
做法：
1. 蕃茄界刂十字，水煮熟後，去皮剁成蓉。
2. 蒜頭、洋蔥剁成蓉。
3. 下油燒熱鑊，爆香蒜蓉和洋蔥蓉。
4. 拌入蕃茄蓉，轉慢火煮，滾起後下茄膏和香草、黑椒、糖、鹽。
5. 收水成醬狀即成，撈起備用。

貼士：
1. 洋蔥、蕃茄、蒜頭用攪拌機打成蓉，方便快捷。
2. 試味後如果唔夠酸，加醋或喼汁；如果太酸，加糖；如果唔夠茄味，加茄汁；如果太淡，加鹽。
3. 呢部分要濃味D，撈埋肉之後先唔會過淡。


然後製作肉醬(B)
做法：
1. 牛肉和豬肉拌勻，加醃料，醃15~30分鐘。
2. 蒜頭剁碎，蕃茄、洋蔥切小粒。
3. 下少許油燒熱鑊，爆香蒜粒和洋蔥粒，撈起備用。
4. 再下油燒熱鑊，炒肉至8成熟，下(3)回鑊，兜勻後下蕃茄粒，出水後下(A)，煮至蕃茄粒半溶狀態。
5. 按喜好再加香草、黑椒碎、鹽、糖調味。


煮意粉(C)
做法：
1. 煲滾一大煲水，下意粉和鹽，煮約8分鐘至全熟，撈起，過冷河，瀝乾水備用。

貼士：
1. 意粉剪開，芯變半透明即是熟透。


焗意粉(D)
做法：
1. 焗爐200˚C預熱。
2. 焗盤放入意粉，鋪上(B)，再灑上大量芝士碎，放入焗爐焗15~20分鐘，即成。

貼士：
1. 如果意粉太乾，加肉醬前倒少許水進意粉，以免焗起意粉太乾身變硬。
2. 如用錫紙盤，下意粉前盤底掃少許油，以免意粉黐盤底。



我鐘意早一兩天整定肉醬和意粉，食的時候用焗爐加熱就可以了，非常方便^^。
焗之前，肉醬和意粉要取出雪櫃先解凍，才能徹底焗透。


BY笨豬小慧SIMPLE

買咗焗爐都好少用，真係於心有愧=.=
放長假，不如煮d高難度菜色，仲要用到焗爐嘅!!! wakakaka

梅頭豬肉 -- 200g (約$20)
蜜糖 -- 2湯匙
暖水 -- 1茶匙

醃料：
花雕酒 -- 1茶匙
生抽 -- 2茶匙
老抽 -- 1湯匙
叉燒醬 -- 1湯匙
麻油 -- 1茶匙
乾蔥頭 -- 2個 (切碎)
鹽、糖 -- 少許

做法：
1. 豬肉洗淨抹乾，用手掌輕拍數次，再用叉刺上許多小洞，幫助豬肉鬆筋，免韌。

2. 豬肉擦上醃料，醃最少6小時。
3. 焗爐200˚C預熱，焗盤鋪上雙層錫紙，掃上少許油。
4. 豬肉平放焗盤，焗約15分鐘，之後反轉再焗15分鐘。
5. 蜜糖以暖水稀釋，掃上豬肉，改用220˚C焗5分鐘。

6. 反轉豬肉，重複步驟(5)，約1~2次，上色即成。
7. 叉燒稍稍放涼，切厚片，上碟。

貼士：
1. 豬肉最好買長條形的，方便切件；肥瘦比例3:7或4:6的，太瘦易韌，太肥易膩。
2. 花雕酒可用紹酒、玫瑰露代替。
3. 刺豬肉的步驟好重要，即管大力d粗魯d，拮舊肉耐d，我都嫌自己太斯文，燒起的叉燒仲有少少筋。
4. 豬肉醃過夜仲入味，怕太咸可以先不加鹽，燒之前再加鹽撈一撈。

5. 我喜歡蜜糖味，所以掃咗2次蜜糖，燒起邊位燶燶地仲正呀~~=q



今次的自製叉燒好成功!!! 只嫌太細舊，2個人食有d唔夠喉!!

by笨豬小慧simple