愛上煮飯，愛上LC，之後，一定愛上任何靚靚餐具。
但，動輒幾百元的瓷器餐具，我真係唔捨得買，打爛咗真係好好好肉赤ga~~~
(my nickname is MANDY，意思係「萬跌」，乜都跌得落地咁解=.=")
邊度有D又平又靚樣的餐具賣呢??
首選：AEON living plaza
乜都$12，而且是日本進口貨，質素都有番咁上下保證。
上星期逛了THE ONE的AEON living plaza，見到呢款蘋果shape盅仔，好可愛呀~~~仲要粒碇係匙羹啊~~果真美貌與實用兼備。
仲有水果形狀的碟仔，又係可愛100分!! 不過細隻咗d(手掌咁大隻jar)，唔知可以點用呢....
最最amazing就係彩色碗!!! 乜鬼同LC的碗咁鬼似!?? 但是才$12!!!
粉紅色湯勺和鑊鏟，加埋熊仔design，又係好可愛啊~~~
可惜是小童用，我嫌手柄短咗d...........
次選：IKEA
成日行「示範單位」見到d餐具擺得好鬼靚呀~~~恨不得搬晒回家!!
呢set粉紅碗碗碟碟真係太閃太殺人了!!! 中碟才$19.90!! 小碗也只是$17.90!!
最殺人的是波點粉紅色cake tower plate!!! 才$79.90，比淘寶更便宜，有冇攪錯!!
還有franc franc、淘寶、夜冷行 等 都是靚靚餐具入手好地方啊~~~
不過小慧定力好夠，多數window shopping，齋睇唔會敗。(當然有時鬼掩眼都會失手敗XD)
或者，我快手D打爛晒家中的餐具，咪可以買過囉，WAKAKAKAKA
by笨豬小慧simple
笨豬小慧simple 發表在 痞客邦 留言(4) 人氣()
好耐以前係酒樓食過，覺得咁整鮑魚好好味，今日又買到新鮮鮑魚，又試吓咁蒸。
朋友食完話比清蒸更惹味=q
(相關閱讀：清蒸鮮鮑魚)
蒜蓉豆豉蒸鮑魚材料：新鮮鮑魚(中式湯匙的size) -- 8隻
果皮 -- 半塊
蔥 -- 1棵
蒜 -- 2~3瓣
豆豉 -- 1茶匙
豉油 -- 1湯匙
油 -- 1湯匙
做法：1. 果皮用半碗水浸軟(要浸大約半小時)，方便出味。
2. 鮑魚用牙刷/百潔布刷洗外殼，去腸，洗淨瀝乾水，備用。
3. 蒜剁成蓉；豆豉浸一浸，用刀背拍扁；蔥洗淨，切段；果皮揸乾水，切幼條。
4. 蔥墊碟底，上面放鮑魚，殼向下，碟邊和鮑魚間的空隙放果皮。灑上蒜蓉和豆豉。
5. 煲一大鑊水， 水滾後放入(4)，隔水蒸約6分鐘。
6. 鮑魚熟後，倒走碟內的水。
7. 燒滾油，淋在鮑魚上，再淋上豉油，即成。
貼士：1. 蒸的時間如果唔sure，最好問一問魚檔阿姐，包無錯!!
by笨豬小慧simple
笨豬小慧simple 發表在 痞客邦 留言(0) 人氣()
街市有新鮮即開生蠔賣，為食小慧最鐘意蠔喇~~~
雖然好新鮮，但生食都有d怕，就整焗蠔啦~~~
蠔味好夠，夠大隻所以焗起仲好juicy，yummy =d
$12/隻，差唔多手掌咁大隻ga~~大埔墟街市d海鮮真係平靚正!!!
下次再整，唧d沙律醬再焗，仲惹味(不過肥死=p)
芝士焗蠔材料：半殼生蠔 -- 2隻
蒜蓉 -- 1茶匙
牛油 -- 1茶匙
什錦香草乾 -- 適量
黑椒碎 -- 少許
parmesan cheese 碎 -- 大量
粟粉 -- 1湯匙
做法：1. 用水沖洗蠔肉及殼，再以廚紙吸乾水。
2. 焗爐200˚C預熱。
3. 焗盤鋪上雙層錫紙，放上蠔，如果蠔放唔穩，摺起少量錫紙做個座頂住隻蠔。
4. 易潔pan加少許橄欖油，燒熱，下牛油熱溶，再下蒜蓉炒香，放在蠔肉上。
5. 依次序灑上黑椒碎、粟粉、芝士、香草，放入焗爐焗12~15分鐘。
貼士：1. 用麵包糠焗起會脆口d又唔會出咁多水，但我家沒有麵包糠，又唔想專登去買，所以用粟粉代替，結果有一隻蠔都出水。
2. 用mozzerella cheese就無咁咸，同埋焗好後可以吃到一絲絲的口感。
by笨豬小慧simple
笨豬小慧simple 發表在 痞客邦 留言(1) 人氣()
我敢講，呢個餸可以叫做「中式沙律」，wahahahaha~~~
酸酸甜甜咁，幾開胃ga~~~依家夏日炎炎真係啱晒呀~~~
我好鐘意食^0^
涼拌手拍青瓜材料：起釘青瓜(大) -- 1條
蒜 -- 半個 (切蓉)
鎮江醋 -- 2湯匙
生抽 -- 1湯匙
糖 -- 1 1/2茶匙
豆板醬 -- 1茶匙
麻油 -- 1茶匙
做法：1. 青瓜浸水最少半小時，用以去走沾在瓜皮上的農藥、泥、有機肥料等。
2. 青瓜切頭尾，用來打圈磨瓜身，直到起泡。頭尾唔要，洗走泡泡。
3. 青瓜打平切半，用鐵匙羹挖走瓜囊和種籽。
4. 青瓜一開二~三，放入大的保鮮袋，用菜刀或碌麵粉的木棒拍打至碎開成一口的size。太大舊的，可再切細。
5. 將(4)倒入大碗，加入餘下材料，拌勻，醃15分鐘。
6. 雪凍後吃會更美味。
貼士：1. 青瓜要選用起釘那種日本青瓜，表皮滑溜溜的中國青瓜口感無咁爽脆啊~ 選用溫室青瓜就生吃都安心
2. 鎮江醋酸中帶甜又有酒香，最適合作涼拌菜；次選是紹醋；浙醋、白醋卻太酸了，不太適合呢。
3. 每次煮青瓜，都要記得磨瓜身到起泡，才能去走澀味。
4. 青瓜入袋再拍，就可免瓜汁四濺，整完要猛抹廚房就無謂啦^罒^
5. 原食譜是用辣椒油的，但我不太能吃辣，改用了豆板醬。
by笨豬小慧simple
笨豬小慧simple 發表在 痞客邦 留言(3) 人氣()
我非常喜歡吃勝瓜，清清甜甜的味道，好好味。但主人唔喜歡食勝瓜，又話硬又話有銀........=..=
不過我唔理得佢咁多，照煮XD(廚房係我嘅，煮乜食乜我話事，wakakaka)，至多搭d菇，等佢都有得夾吓啦
上湯浸什菇勝瓜
材料：勝瓜 -- 1條
雞脾菇 -- 2棵
薑 -- 2~3片
蒜蓉 -- 1茶匙
史雲生清雞湯 -- 250mL
水 -- 1碗
做法：1. 勝瓜洗淨，切去頭尾，切走每條凸起的尖尖位，斜切成半吋闊的厚片。
2. 雞脾菇洗淨，切成半吋闊的厚片。
3. 下少許油燒熱鑊，爆香薑片和蒜蓉，再下勝瓜和菇快炒一會兒。
4. 下清雞湯和水，水滾後轉小火，煮5分鐘，加蓋熄火浸約5~10分鐘，至勝瓜變軟即可。
貼士：1. 揀勝瓜有d技巧，太輕身、外皮太硬的太老了，會有好多銀；要揀墜手、表皮乾燥，上下"發"勝瓜時仲有韌度的才新鮮啊~
2. 煮當日因為雞脾菇便宜，所以用了雞脾菇，其實咩菇都得，例如：金菇、秀珍菇、草菇、白蘑菇、啡蘑菇、大啡菇、雪耳、雲耳等。
3. 用魚湯都得ga~(當然用濃湯寶就快靚正啦)，但怕腥就唔好了。
4. 其實呢味餸可以有好多配搭和變化，例如轉湯底、改瓜類、加瑤柱、蝦米、粉絲等，變化出屬於自己的食譜^^
by笨豬小慧simple
笨豬小慧simple 發表在 痞客邦 留言(0) 人氣()
某天的一人晚餐，唔想落街食就炒烏冬啦，咁啱雪櫃有泡菜和豬肉片，忽發奇想可以整韓式泡菜炒豬肉喎~~~
好好味呀~~~=d
韓風泡菜豬肉片炒烏冬材料：(1人份)
即食烏冬 -- 1包
泡菜 -- 半碗
洋蔥 -- 半個
薄切豬肉片 -- 4~5塊
韓式BBQ甜辣醬 -- 2~3湯匙
鹽、糖 -- 適量
醃料：生粉 -- 1茶匙
生抽 -- 1茶匙
鹽 -- 半茶匙
油 -- 少許
做法：1. 豬肉片下醃料醃10分鐘。洋蔥去皮切大塊狀。
2. 易潔pan下少許油燒熱，下豬肉片炒至轉色。
3. 下洋蔥炒至開始變軟，下少許鹽、糖調味。
4. 下烏冬，用筷子快手摷散，炒至烏冬變軟，下泡菜炒。
5. 最後下韓式BBQ甜辣醬，炒至所有材料沾到醬轉做紅紅的顏色，即可上碟。
貼士：1. 如果可以，加d醃泡菜的汁會更好味(我有加呀~~~因為食埋呢轉d泡菜就食晒喇，所以加埋d汁唔好嘥，hahaha)
2. 鐘意食辣、好食得辣的，可以加埋辣椒粉或切碎的辣椒，我唔太食得辣，所以唔加喇。
3. 豬肉片用打邊爐的薄切黑豚肉片就最啱，快熟，又唔會鞋口。
by笨豬小慧simple
笨豬小慧simple 發表在 痞客邦 留言(0) 人氣()
肥媽節目《食平D》有一集介紹大啡菇做平價扒餐，過幾日就見街市有Portobello mushroom賣喇~~
$27有2大隻~~~好抵食!!
簡簡單單，焗咗佢囉=d
第一次整，都算成功，只是淡口咗少少，下次調味要重手d。
焗波特菇(Portobello mushroom)
Portobello mushroom -- 2隻
煙肉 -- 2片
洋蔥 -- 半個
mozzarella cheese -- 2片
鹽、黑椒碎 -- 適量
做法：1. 菇去蒂，用濕廚紙抹乾淨。
2. 焗爐200
˚C預熱。焗盤鋪錫紙，掃上橄欖油。
3. 煙肉、洋蔥、菇蒂切碎成小粒。
4. 易潔pan下少許橄欖油燒熱，先炒煙肉粒，待出油後，下洋蔥粒、菇蒂粒炒至軟身，熄火備用。
5. 菇反轉底向上，放在焗盤，掃上橄欖油，下鹽、黑椒調味，再鋪滿(4)，最後放上芝士片。
6. 放入焗爐，以180
˚C焗20~30分鐘。
貼士：1. 用mozzarella cheese貪佢有一絲絲的口感，其實用其他cheese都ok ga~
2. 肥媽教菇用濕布抹吓就可以(當然要確保係勁新鮮啦)，用水沖洗會無晒菇味。
3. 菇掃油可以避免菇焗到變黑炭，尤其菇邊，記得掃多D油。
by笨豬小慧simple
笨豬小慧simple 發表在 痞客邦 留言(0) 人氣()
김밥，讀音「kimbap」，中文譯做「韓式紫菜飯卷」，簡單d講，即係韓風壽司囉。
kimbap可算係韓國家常菜，基本上個個阿朱媽都識整，通常做簡便的外帶lunch，加埋泡菜和咖啡，咁就一餐ga la。kimbap的口味也千變萬化，腸仔、吞拿魚、泡菜、什至碎牛肉都可以做餡料。
有時去尖沙咀shopping，為爭取時間敗家，我會去金巴利街的韓國媽媽度買條kimbap邊行邊食，不過$25/條，都幾貴啊~~~食得幾次，就諗不如自己試吓整啦。
母親節party特別炮製~~~
一次過整咗10條!!!! 堆到成座山咁高XD。味道可算有9成似，麻油味剛剛好，飯又夠軟，餡料配搭perfect，真係好好味!!!
韓式紫菜飯卷 kimbap 김밥材料：(5條份量)珍珠米 -- 2杯
水 -- 2碗
韓國紫菜(大) -- 5片
蛋 -- 2隻
甘筍 -- 半條
蟹柳 -- 4條
菠菜 -- 2棵
韓國香腸 -- 5條
黃色醃蘿蔔 -- 5條
醃牛蒡 -- 5條
調味料：麻油 -- 1湯匙
鹽 -- 1茶匙
韓國食材，o係金巴利街有幾間韓國超市可以買到。
韓國香腸、醃蘿蔔、醃牛蒡我選了轉for包kimbap的款式，長度剛剛好是一片紫菜的闊度，已經切好晒一條條，非常方便啊~~
除咗以上3樣材料之外，其他都用超市買到貨色就算了，我非常慳家ga~~=p
1. 洗米，煲飯。飯熟後立即摷鬆，待仍暖暖地時拌入調味料。放涼，備用。
2. 菠菜洗淨，切去根部，煲水焯熟，揸乾水，加半茶匙鹽、1茶匙麻油撈勻調味。
3. 蛋打成蛋漿，煎成蛋卷，稍放涼後，切成長條狀。
4. 甘筍、香腸、蟹柳(一開三)，全部切成長條狀，用滾水焯熟，澀乾水備用。
5. 醃蘿蔔、醃牛蒡倒走包裝內的水份。
材料準備好晒，可以捲喇~~~
6. 將飯分成5等份。竹蓆鋪上保鮮紙，上面放紫菜，將一份飯平鋪在上面。
飯盡量薄一點而且要平均啊~頭尾留一些空間。
7. 每樣材料放一條在飯面上，菠菜可以多放點，約4~5片葉啦。
餡料要放近自己那邊，貼住飯的邊緣位。
8. 然後由近自己的地方開始向上捲，第一下要用紫菜連飯包實所有餡料(大約用了半張紫菜)，用力壓實，不要忘記頭尾都要壓一壓。然後鬆開少少竹蓆，俾少少力再向上捲，紫菜末端用手指揸上開水(事先要準備一碗飲用開水在手邊)，再捲一圈就能收尾。
捲好後，放在一隻長形碟上面。捲好晒，就可以切開喇~~~
9. 準備乾身的砧板，菜刀刀鋒用開水沾濕一下(否則會黏飯不好切)，先切走頭尾不太整齊的，然後切成約2cm闊一件。
貼士：1. kimbap冷藏過後，飯會變硬，口感不太好啦~~~所以最好即整即食!!
2. kimbap非常適合郊遊野餐時食用啊~~~
3. kimbap的澱粉質、菜、肉的比例很符合營養金字塔的比例，非常健康啊~~
by 笨豬小慧simple
笨豬小慧simple 發表在 痞客邦 留言(1) 人氣()
近來大愛韓食!! (我中韓劇毒太深了，HAHAHA)
韓國人夏天會整人蔘雞湯補身，佢O地認為夏天食性溫的食物，更能強身健體，情況就似燒熱咗的石頭只能淋熱水，淋凍水反會令石頭裂開的道理一樣。
所以我都跟吓韓國傳統，夏天進補人蔘雞啦~~~
有真空煲，煮人蔘雞唔洗睇火，so good~~
第一次煮就成形，真係好開心呀~~~
切開雞後，聞到陣陣的人蔘味，仲有o個啖濃濃的雞湯，super yummy~~
雞入面釀滿糯米，連飯都唔洗另外煮呀~~~2個人食，飽晒!!
韓式人蔘雞湯材料：雞 -- 1隻 (約800g~1000g)
韓國人蔘 -- 2支
糯米 -- 半杯
紅棗 -- 5粒
栗子(細) -- 3粒
薑 -- 3片
蒜 -- 2粒
白果 -- 5粒
胡椒粉 -- 半茶匙
鹽 -- 1茶匙
水 -- 適量
米酒 -- 1湯匙
蔥花 -- 少許
做法：1. 糯米洗淨，浸泡最少3小時；雞洗淨，瀝乾水備用。
2. 紅棗浸軟，去核；白果、栗子去殼去衣；蒜切大粒；人蔘洗淨切段。
3. 糯米、3粒紅棗、1條人蔘、栗子、白果、薑、蒜 混合鹽和胡椒粉，塞入雞肚，用牙籤縫好開口。
4. 雞放入鍋中，加水至3/4煲，加入剩餘的紅棗、人蔘，煮滾後放入真空外煲燜2~3小時。
5. 取出內鍋，大火翻煮至水滾，加入米酒，試味後按喜好加鹽調味。
6. 食用前灑上蔥花。
貼士：
1. 今次用的人蔘是一田超市買回來的新鮮水蔘，$59有4支，每支有食指咁粗，用2支啱啱好，蔘味都好夠啊。或者去韓國街的超市買乾人蔘都得，先連同糯米浸軟，水就要用番呢D浸米水啊。
2. 也可以用蔘鬚、花旗蔘代替，當然風味差少少啦。
3. 糯米改用溫水浸45分鐘，以縮短準備時間。
4. 栗子的衣非常難清除，睇完《蘇GOOD》教，用溫水浸栗子半小時，用毛巾包住栗子，前後前後咁碌，D衣就輕易去晒喇~~~(早D知我就唔洗批栗子皮批到手軟啦>~<)
5. 如果無真空煲，可改用細火煲1.5~2小時，用筷子試過雞煮至熟爛後，再加入米酒。
BY笨豬小慧SIMPLE
笨豬小慧simple 發表在 痞客邦 留言(0) 人氣()
雖然半年一次的LC開倉已經令我定期放一放血，不過LC呢條毒癮，真係隨時都有人引你發作。
就係兩次的開倉之間，我又手多多敗了LC
cassis soup bowl with lid 2 set
朋友去完英國旅行，見LC靚就敗，回港後又發現無咩用，所以我就"收養"咗喇 ^v^
(佢話LC係英國賣得平過香港，唉，攪到我都心思思好想去英國朝聖呀~~~~)
有蓋湯盅一直想敗，因為可以整燉湯!!! 家中無燉盅呀~~~
靚色、啱價、唔洗等開倉去迫，所以，買咗!!
剛剛放得入5L康寧煲
(下面墊一墊竹蓆筲箕，可以防止煲煲盅盅有太多碰撞而摑花)
有d想買隻細的cassis碟襯番tim......唔知幾時先會遇到呢................
by笨豬小慧simple
笨豬小慧simple 發表在 痞客邦 留言(4) 人氣()
笨慧廚房 (3)
