今月進度：

終於搵到MUA化奶奶和媽咪喇，即係話佢地兩老的裝身工程已經攪得七七八八，我又更加安安樂樂。

註冊的事已經confirm了，決定在奇妙姻典的幸福小教堂行禮，律師、用具、登記手續全由奇妙姻典安排，煩少好多野呢~~~

8個月尾去了MUA Bithia Lam的化妝班聚會，玩得真係好開心呀~~~諗諗吓，好唔好搵Bithia幫我化奶奶外母的妝呢？

呢排終於的起心肝再contact Bithia，問吓有冇化過媽咪妝，原來佢有接過呢類job，佢仲send咗d客樣俾我睇。

都ok呀，Bithia話，如果奶奶外母想，再化濃d都得。

去完佢的化妝班，見到佢的用具、手勢都好專業，而且價錢啱budget，所以就book佢幫我化奶奶外母了。

$350/位，晚宴(一妝一頭)

雖然唔係d咩熱門MUA，但自己試過妝，信心都多d。因為咁細單生意，我都怕搵出名的MUA，佢搵到其他大job會甩底，又怕幫襯金都/百利的化妝公司，佢見細單野俾個學師仔我，所以Bithia肯接job我真係好開心。

Bithia Lam的Yahoo Blog - http://hk.myblog.yahoo.com/bithia-lam

又攪掂多一樣，依家奶奶外母的扮靚靚project攪掂得七七八八，我又再安安樂樂了。

by笨豬小慧Simple

因為證婚的事，傾到大家面紅耳熱，吵咗幾鑊，幸好最後大家都可以互相理解，達成共識，決定在奇妙姻典行禮，多謝主人又俾豬仔任性一次。

奇妙姻典的幸福小教堂真係好靚呀~~~

可容納80人，連企位就100人，$3688租用30分鐘，包律師和司儀，再加$305擬結婚通知書登記費和$150行政費，總費$4143。

證婚呢part終於攪掂，雖然波折重重，不過學習到婚姻真係需要互相尊重、互相諒解、互相遷就，才可以長長久久。

希望各路好友，可以俾面出席，一同見證我倆的重要時刻!!!

其實book咗之後，主人都有微言，都嬲佢個句「你鐘意咪得囉」，但原來佢係擔心證婚時無咩人到，我會好失望，知道佢反對的原因是為我著想，之前的嬲都無晒啦。
最攪笑係，上星期主人突然同我講，其實我地另外攪行禮都幾好呀，事關佢去完同事的婚宴，親眼目睹係酒樓證婚係.........................好趕ga!!!

BY笨豬小慧SIMPLE

最近病到五顏六色，今日精神D，back day番D大件事先。

21/9/2010

終於拿到了我們的結婚介指!!!!

之前睇咗幾間金舖，都搵唔到大家都鐘意的款式(主人唔想有石，而我又不喜歡太粗的介指，望落去太似不鏽鋼了)，真係無諗過會係六福搵到。最重要啱budget，話晒以後會日日戴，買太貴整花咗好肉赤咁嘛。

最開心係，sales李生真係好好傾，佢仲教我地要揀介指底部係光面的，因為將來要改大小和翻新，磨沙面個種係做唔到ga!!呢D野真係佢唔教我，我地根本唔識，之前睇咁多間店，都無人教過我地。所以我覺得李生好pro，真係「以客為本」，要係度讚一讚佢呀~~~

諗起以後日日要戴住佢，就好開心了，心情輕飄飄的，好不真實啊。

by笨豬小慧Simple

今天，我地2個一齊請sick leave。

我因為腸胃炎，極度腹痛+暈厥，半夜call白車去了急症室；他因為本身感冒，再加上陪我去醫院攪咗成晚無得訓。

所以我地一齊在家休息。

一齊吃我煲的白粥。

同病相憐，是也。

by笨豬小慧simple

(其實救護員叔叔問主人是我的誰時，真有點期待他答「老公」，不過，真實的回答卻是「男朋友」，哎呀，為何不答「未婚夫」呢？)

上一回：除疤大作戰(一)

已經來到使用疤痕敵的第2個月，總結一下我的除疤作戰結果。

凹凸的疤痕明顯平伏了，紅紅啡啡的印也淡化了9成。雖然疤痕未至於完全消失，但畢竟這是兩年多前的疤痕啊，以現在的成績來說，我已經非常滿意
(請 ignore那個紅點，是昨天惡蚊的傑作!!)

對比一下未使用前的膝蓋，就明顯地見到除疤效果：

我的除疤小秘技：

1) 美白精華 - 將美白精華塗於疤處，加速淡印效果。
2) 磨砂 - 疤痕處做磨砂，去角質，又加速新陳代謝，疤痕自然快快bye bye啦。
3) 防曬乳 - 疤痕也要塗防曬，防止黑色素更加沉澱，要除疤所花的氣力就更少囉。

打完收工，多謝收看

今日秋意綿綿，清涼的天氣來到囉，記得出街時多帶件外套，免得著涼生病呀~~~

今日完成咗我地第一輯婚紗相!!

由11:30am玩到6pm才走，成個人散晒呀~~不過好開心好滿足

makeup：Clara

photo：Ivan

多謝你地的細心和專業，尤其Ivan，非常有耐性教我地2個木頭公仔擺pose，真係少D心血都影唔成，辛苦晒。

晏晝掛住影相都無咩落肚，影完就去了葵芳新都會的韓食家開餐，2個人竟然食得晒以下3大碗美食!!

埋單只是$103，好好味，又夠正宗，真係好抵食呀!!

一個月後睇相，唔知影成點呢？好期待成品呀~~

by笨豬小慧SIMPLE

今日完成咗我地第一輯婚紗相!!

又開心又難忘，快D記低佢先

過程

原本約好10:30am，尋晚8pm左右Mona Lisa打電話來說想改11am，當然無問題，晏D仲好，我地由大埔去馬灣真係好遠，晏少少起身仲好啦。

8:30am起床，9:15am落樓下大家樂食個豐富早餐，因為都知中午未必有時間有心情食lunch，早餐食飽D先。10am出發，火車轉地鐵再轉NR332，今日唔知點解特別多人搭港鐵，上上落落花了好多時間。11:30am終於到馬灣了!!

去到立即有人帶我入房化妝，由美女Clara負責，而主人就去咗換衫。Mona Lisa仲安排咗locker俾我地擺野，不過我地帶的喼擺唔落，唯有放係地下，手袋先鎖入locker。點知主人唔記得拎鎖匙，好彩職員幫我地拎番jar，HAHA，我地倆個好矇呀。

化妝大約1hr終於攪掂，可以換衫喇，首先著A-line珠片婚紗。換好衫就行番出房set頭，攪掂晒都差唔多1pm了，主人等到訓著幾次，HAHA。攝影師Ivan已經等咗好耐，但我肚餓，所以一邊食餅一邊同佢傾點影，真係唔好意思。

首先影bar枱景，我同主人都未warm up，成對木頭公仔咁，笑容好生硬呀~~~~~係度影咗好多相之後，我地就轉去另一間房，入面有幾個唔同主題的牆，主人影完公仔之後，就無咁僵硬啦，開始影得好smooth，而我因為細時做過吓model仔，擺擺吓pose都記得番點影會靚，所以係呢間房好快就影完喇。

之後就換另一件有鋼紗的婚紗，主人就改咗著背心，當換咗衫囉。我地去了一間有張白色梳化和白色牆的房，影咗一輪就轉去影鋼琴。本來Ivan想我坐係琴上面，但條裙太冼，坐極唔穩，影咗一張呢個pose就算了。大約5pm左右，我地就出露台影，影了藤枱仔、心心架、帆布床，但無影水池韆鞦，有d可惜呢。

5:30pm左右影晒，Clara幫我抹走D勁濃的紫色眼影，變番個正常人咁走，就咁出街一定嚇死人。

6pm，攪掂，收工!!

感想

化妝師Clara和攝影師Ivan真係好細心又專業，無因為我地係免費單而偷工減料，落足120分力，好抵讚!!

主人今日都好抵錫，等咗咁耐又無黑面，又識得係我轉妝時拎餅俾我食，影到成面汗都無怨言，你的默默付出令我好感動呀~~~~真係覺得你比以前更加錫我不過主人擺pose的時候好攪笑，成日左右調轉晒，塊面又唔知另邊好，係唔係好緊張呢？尤其擺鼻貼鼻pose，大家都要忍笑，又要定格，真係好難做，但主人都好努力配合，辛苦晒你。

有鋼紗的婚紗真係好好好重!! 好似有千斤力聚晒落條腰度，尤其做拗腰動作，真係要出好多腰力!!! 同埋唔知係唔係又瘦咗，上次fitting明明好啱身，今日著2件衫，2件都sher落嚟.........=.="

小貼士

1) 帶齊所有不包事項，免得無辜消費。
2) 帶D餅乾、麵包等乾糧，影到肚餓時可以食少少，頂一頂。食得落又食得快可以叫職員幫你叫茶餐廳外賣，但我地影到無咩心機食lu，所以無叫到。
3) 著件易除的衫，我就著了沙灘長裙，因為化好妝才換衫的，免得整化個妝。
4) 新郎最好gel埋頭去，或者自己帶gel頭用品，個度得spray，唔係好啱男仔gel頭用。
5) 如果想用花做頭飾，要自己帶，佢地無絲花/鮮花做頭飾，最多得白色的假花，做唔到花仙子效果ga。

想睇花絮就告訴我ADD你吧。

BY笨豬小慧Simple

明天就影pre-wedding，最後check多次有冇買/帶漏野。

取消咗黑色西裝，主人改著背心，另外唔帶公仔去影喇。所有野都ready!!!pack喼，做mask，訓覺!!

by笨豬小慧simple

雖然影到手指的機會少之有少，但都唔想平平板板 raw nail 囉。

我唔鐘意出去整甲，真係怕衛生問題，所以我要靚就自己油

大家覺得點都見得吓人卦......

事先聲明，唔係gel甲，係真甲嚟ga!!!

by笨豬小慧Simple