2011年11月25(五)

今日的行程要去好多地方，又要換酒店，所以又係晨咁早的morning call，好眼瞓啊~~~


食完早餐後，就車咗去睇炭

我對眼好腫.............@-@

備長炭，好似有好多神奇功能：防潮、除臭、吸輻射、淨化.......
但，唔好諗住買，佢歸類易燃物品，上唔到飛機。
所以，嚟呢度，真係運吉..........


成間博物館都無咩好睇，反而呢碌樹咁高的備長碳好過癮 =p


幫d婆婆團友蓋的印仔，haha，我手勢好好啊~~~無浪費我幾年吸印仔的經驗呢~~~



又坐咗一個鐘頭車，嚟到黑潮市場

去日本我最鐘意行街市，又多野睇，又多野食，仲好乾淨舒服，最開心d野好平ga~~



剛剛夾啱時間，睇到吞拿魚解體show (即係劏魚囉)

師傅勁好手勢，唔洗10分鐘就將條完整的吞拿魚劏開做一舊舊，手起刀落，手勢非常純熟。
佢一邊劏，一邊用日文講解，但我唔識日文，一句都聽唔明，好彩同行團友有一位日文教師，有人翻譯，hoho
團友同我講，劏魚師傅話呢條魚太細，今次無toro賣.............原來咁大條都叫細，O咀..............
現場有得即場試食呢條吞拿魚，不過我同主人都唔打算買，無謂貪心試食了。


睇完show，當然周圍八吓啦~~~~街市真係好多正野賣ga~~


平都笑的新鮮魚生&壽司

大toro壽司2000yen有7件，$29一件!!! 平!!!
海膽刺身，5000yen有勁大板，而且super新鮮!!! (我係香港唔食海膽，變晒水，唔新鮮好鬼腥)

仲有自助BBQ海鮮

400yen有3隻蠔，嘩~~~抵到無朋友呀~~~仲有大大隻海老、蜆、帶子、魷魚.................
我見有好多日本人排隊買，然後去後面的food court坐底慢慢嘆，有埋爐俾你燒ga~~真係好方便!!


我同主人夾埋另一pair新婚團友買咗toro壽司、火炙帶子壽司、海膽刺身，正呀=q
(大家都係20111120結婚，仲又係住大埔tim~~~實在太有緣份了)


呢度盛惠7700yen，但真係新鮮到~~~香港食唔到!!
最勁係，板海膽係超多，鋪咗2~3層，第一次食海膽食到有膩的感覺!!! (仲要係4個人分的!!)
我自己覺得好抵食囉~~~hohoho

其實仲想食埋BBQ蠔，但接住就食lunch，自由時間又差唔多夠鐘，最後無買到嚟食>~<
(so sad, 早知就買啦~~你睇埋下面就知點解)


團餐，牛肉丼+壽司定食
(刺身船唔係我o地ga，係大埔之友加錢order的，但佢o地話差過街市o個d，好彩無order)

剛剛食完d正野，突然覺得枱面的食物唔多吸引，actually又真係唔算好味...........
早知，放棄呢餐lunch，自費係街市食到夠!!! >^< 依家勁後悔!!



食飽飽，無野做，去咗附近的歐陸公園影吓相。
裝修到好似廸廸尼，但好鬼細，仲要收錢(我當然有免費入場券先會死入去啦)，唔怪得無人行.......

公園無野好行，又行番入街市遊盪


去咗另一邊的蔬菜屋


d菜又平又新鮮，仲要係勁大棵!!!
大過塊面的大白菜、粗過小腿的大根!!! 成箱蜜柑只是4500yen!!!

如果大家有plan去和歌山，又有時間，不仿嚟吓黑潮市場，嘆吓平靚正海鮮
JR和歌山站有shuttle bus嚟ga，都算方便呢~~~



又坐長途車，到達兵庫縣神戶市郊 - 有馬。(成個朝早仲係和歌山縣)


有馬係溫泉渡假區，2年前自由行同屋企人嚟過玩，感覺唔錯啊~~

金之湯係有馬出名的泉水，鐵質含量高，有助祛風濕，可以免費浸腳，行到累就去鬆一鬆^^



但我同主人無去浸腳，入咗去「玩具博物館」參觀。(要入場費的，但跟團包咗)


入面跟我想像有D唔一樣(我以為有古今中外的玩具睇到)
原來只是木製玩具的展覽................not my cup of tea

唯有帶主人周圍行吓，感覺一下有馬啦~~~(我2年前同屋企人行過晒，so我做帶路)


係有馬御苑溫泉酒店對面的公園仔，終於見到紅葉喇!!


雖然得好少好少紅葉，但「小橋、流水、紅葉」的組合，實在太有詩意了

嚟到有馬，有一樣食物一定要買!! 因為其他地方唔會有，唔買就走寶，手信自用都好一流的。
「六甲山麓牛乳」，250yen的1000mL紙盒裝，味道香甜濃郁，真係好好味ga~~~我一口氣掃咗2盒!!

有馬的行程真係好匆忙，都未行夠買夠，就要上番車，去下一個地方了Y_Y



又坐個幾鐘車，我o地到咗神戶市的市區喇~

嚟到已經係夜晚了(其實只是大約6pm左右，日本的秋天真係好快日落=.=")

三宮Center街，商店街是也，又到shopping時間!
(但我比較想係自由食時間囉..................)


呢度有唔少和服店，款式新潮，而且價錢唔算好貴，我見有後生女著住和服入去買ga~
仲有唔少和布做的小配件，平平地買嚟做手信都唔錯啊


發現一間專做wedding stationary的店，wah~~~d結婚熊熊好靚呀~~~如果我未嫁，真係忍唔到手>0<

日元高企，真係無咩心情shopping >.<

發現DAISO!! (即是100yen店)，可以安心放血喇~~~

呢度好大好大，超級多野買，手信入貨好地方!!
我o地買咗糖、茶包、馬油hand cream..etc..........



行到累，忍唔住想食野
日本的中華菜肉包，我見d上班族叔叔係度食，又想試吓
味道都ok ga~~杯茶仲有免費添飲，才180yen


商店街其實有好多食肆和小吃店
神戶牛dinner set才3900yen!!!! 真係好想食呀~~~~
還有燒餅、TAO燒(我估係加咗蛋的祈福饅頭)等等等等，我想要自由食時間呀>^<



買完，導遊帶咗我o地去海邊，睇海景+神戶港塔

DSCN3160
難得呢個建於1963年的港塔無係神戶大地震時摧毀了
 
介紹：http://www.japan-i.jp/cht/explorejapan/kinki/hyogo/kobe/d8jk7l000000a66p.html



食晚餐喇~~~

今晚食燒肉放題
餐廳入面仲有唔少日本人tim~~呢度應該係做大眾生意


加料叫了松板牛~~~yummy =q



食飽飽，又行到累死，終於返酒店喇~~~(又坐咗2個鐘車)

住USJ hotel呀~~~~房間好大好乾淨，設備都算新 (不過又係無WiFi!!!)
張床繼續係twin bed.....唉..............
不過主人病到九彩，分床瞓，大家都瞓得舒服d


房間的對面，就係明天會去的Universal Studio Japan喇~~~yeah~


酒店附近有LAWSON，買定d乾糧，明天係USJ內當午餐 (導遊教的)
少不了買d奇怪零食試吓啦~~~(喉嚨位牙肉發炎的主人乜都食唔到, so得我食)
附近亦有好多食肆，睇定聽晚食乜先~~


嚟咗日本咁多日，終於再見到Rilakkuma
但..........點解你係夾公仔機入面T^T，我夾公仔好屎ga，即係帶唔到你回家囉Y_Y



同幾pair新婚團友行吓買吓，好快就10pm!!!

返房休息，主人累到立即瞓咗!!! 佢真係病得好緊要.........唉..............


by笨豬小慧simple
 


相關閱讀：
日本阪神蜜月之旅 - Day 1
日本阪神蜜月之旅 - Day 2






笨豬小慧simple 發表在 痞客邦 留言(4) 人氣()

▲top
去日式餐廳必叫的清酒煮蜆，原來都好易整ga jar，朋友食過大讚好味呢~~~



清酒煮蜆

材料：(18cm Round Oven)
蜆 -- 1斤
清酒 -- 100mL
雞湯 -- 200mL
牛油 -- 1湯匙
蒜 -- 2粒 (切蓉)

做法：
1. 蜆浸水最少1小時，待吐沙。撈起，用牙刷/百潔布刷洗外殼。
2. 落牛油，中火燒熱LC煲，牛油溶後，加入蒜蓉炒香。
3. 落清酒和雞湯煲滾。
4. 加入蜆(水要蓋過蜆)，閂蓋，煮大約5~10分鐘，至蜆開口即成。

貼士：
1. 怕太咸，可加50mL清水。
2. 也可改用花甲(有條橙色的"脷")
3. 煮好後，唔開口的蜆是死了，不能吃，要撈走啊~
4. 清酒，我用咗呢款cheap野，都已經好夠酒香

$33 / 200mL，惠康，抵!!!
之後再煮，家中無清酒，改用真露(韓國燒酒)，一樣得!!



BY笨豬小慧SIMPLE

笨豬小慧simple 發表在 痞客邦 留言(1) 人氣()

▲top
2012年9月22日(六)


呢日我同主人都放假，決定晚餐食韓燒!!! LC Grill 要開光喇~~~



要預備的材料，都好簡單：泡菜、生蒜、豬五花腩片、生菜、白飯、韓國BBQ甜辣醬

右上角的生醃八爪魚，真係超級好味呀~~~~~~~~食到停唔到口 =q
仲要係尖咀韓國街阿豬媽出品，大埔新街市竟有舖頭獨家分銷。


LC Grill真係好掂，火力平均，唔怕燒到d肉乾晒，坑紋更有助隔去肥油，唔怕食油浸肉啦~~

之前仲擔心d油會彈到周圍都係，好彩亦無發生。


韓式BBQ的正宗食法，就係生菜包!!! 我去韓國旅行時，燒肉店的阿豬媽教我ga~~

一塊手掌大小的生菜，包住一塊肉、一啖白飯、少少甜辣醬、一塊泡菜、一塊生蒜，
包好後，要一啖塞入口食晒!!!!
yummy~~~真係好滿足呢~~~^v^



主人仲話，有埋呢塊LC Grill，連韓燒都唔洗出街食了~~hahaha




by笨豬小慧simple

笨豬小慧simple 發表在 痞客邦 留言(2) 人氣()

▲top
2012年9月21日(五)

一年兩度的LC開倉，攪到last day呢日先得閒去=.=" (好明顯我唔算die heart fans)

約到少女A陪我血拼，請假都要去!!! 而且剛巧主人放假，當然叫埋佢去，幫我睇水+運貨啦~~


9:30am到達香港富豪酒店，唔知係唔係last day，無咩人排隊，LUCKY ^^
排頭20位仍然係日本太太團，佢o地真係買極都仲可以買，厲害!!!

10:00am，正式入場!!


場面真係好墟陷@0@


人山人海，多人到連D貨架都遮晒咁制

D日本太太團好快手，不消10分鐘，已經獵咗好多野，坐咗係地下慢慢check貨


根據少女A的證詞，今日已經唔算多人了，佢去上次3月的開倉，多人到行唔到路@0@
而且，根據少女A的經驗，stoneware最快賣晒，所以要先攻stoneware，之後再睇煲、pan等。

我o地的策略好成功啊~~~
一入到場，我就跟住D日本太太行，佢地獵咩，我又跟住獵，完全唔執輸呀，hahaha
基本上，真係見咩就獵，都無時間諗自己係唔係真係想買=P

好彩有帶主人嚟，獵得咁上下，成手都拎住貨，就可以放低俾佢睇住，然後又出去再掃貨!!

今日係last day，好多靚色靚size都賣晒喇，我好想要的26cm buffet casserole仲要番唔到貨!!
靚藍色當然無晒啦~~好彩仲有cassic紫，都算有D安慰。


有時係唔係「寶物尋歸底」!??? 竟然有Pale Rose Mini Heart Rakemins Set !!??
我聽到D人大叫有粉紅色，即刻搶番件俾鐘意粉紅的少女A，不過size太細唔啱心水，最後係手指罅漏走了~~~~~

玩到11am，就埋單了~~
今次開咗10個cashier，所以俾錢都好快~~
之後，仲有職員幫我地join VIP，聽聞下次開倉會係private event了，可能walk-in真係得番D貨尾喇。




我今次好忍手，只係買咗千多元jar~~~我都估唔到自己可以咁克制 ^罒^


晒冷先^v^


Cherry Red 18cm Rectanguler Dish   原價$338  開倉價$110  折合67% off

一入場就掃清晒，手快有手慢無，不過唔係我想要的blue，所以買住一隻先啦~


Cassis Ramekins 2 set   原價$198  開倉價$90  折合55% off

靚色，必掃!!



Cassis 33cm Rectangular Grill   原價$1748  開倉價$720  折合59% off

老公勁鐘意呢個grill，而且size剛剛好，比Grill Pan skillet更啱心水



Cobalt Blue 24cm Oval 'Au Gratin' Dish  原價$1328  開倉價$290  折合78% off

呢樣折得最多!!!! 少女A話可以整2人份的焗豬排飯，又可以上明火，咁平，買埋先得。



掃完貨，又可以悠閒地嘆番個lunch，真係好爽呀~~~

Caffe Habitsu，呢期勁喜歡^ ^


by笨豬小慧simple

笨豬小慧simple 發表在 痞客邦 留言(3) 人氣()

▲top
2012年7月23日(一)

呢日，相信唔少香港人都記得，因為半夜打十號風球!!! 13年無掛過喇~~~
(但, 2009年唔係都有過10號風球咩??點解新聞講係13年??)




呢日因為感冒，請咗sick leave。出面又橫風橫雨，除咗睇醫生之外，都無出過街，在家休息。


食完藥瞓醒，就見到豬欄個廳變成咁。

兩條小河由櫃底流出嚟@0@

梳化下面仲積咗個水氹.........=.="

救命!!!!!! 我屋企水浸呀~~~~~~

當時5點幾，剛剛掛咗八號風球。


抹完地，即刻周圍檢查仲有邊度入水。

發現.......................廳個窗台完全濕晒!!!!


我要暈了@~~@


我一邊啐啐唸，一邊清理入水。
真係好慘，當日老公返夜，得自己一個清理，真係好狼狽T^T


拎晒成屋的毛巾、唔要的Tee，zip係窗台和櫃邊，希望兜得住d水

仲開行個抽濕機，吹住個電視櫃，我真係好驚會浸爛or發霉呀~~~


不過，不幸中的大幸，睡房、廚房都無咩事。
窗邊無入水、窗台上的衣櫃都好安全。
(如果睡房都淪陷埋，我真係會癲)



冷靜之後，開始火都嚟!!!!

2009年睇樓當日，剛剛打完風，間屋無入水ga，因為上手業主係外牆做咗新的防漏。
2010年，屋苑大維修，拆晒外牆，重舖紙皮石。
今日，工程完咗唔夠1年，間屋就入水!!!!
呢間死人工程公司，將我間唔入水的屋都整到入水，
好好好嬲呀~~~~ >^<


原本做好防漏的牆身，被工程公司攪一攪，由唔入水變入水

幅牆濕晒，明顯見到水漬，灰水油漆仲有d撲起咗!!



梳化附近的木地板，俾個水氹浸一浸，發脹翹起晒!!!


影底晒做證據，明天一落波就call管理處，我要投訴!!!



10:30pm，老公終於返到屋企。
佢話係街連企都企唔穩，出面真真正正風大雨大!!
(佢返到嚟，我個心先定d jar)



11:45pm，十號風球懸掛

廳d玻璃窗吹到震晒，好驚呀~~~呢鋪真係要「黐膠紙」!!!


1am左右，瞓覺。
但真係太大風，大門吹到呯呯聲，點攪都係咁.............嘈到瞓唔著...............


第二朝，7am起床。
雨勢明顯減弱了，已經改掛八號風球，而且已經公佈咗11am會落波，噢...............又要迫車返工.............=.="

睇番新聞先知，
今次呢個風，真係好勁。
將軍澳有新屋苑勁入水，屋主成晚換毛巾，無得瞓 (幸好我間屋只係少少水浸，臨瞓前檢查一次，入水唔算好嚴重，我仲有得瞓唔洗扭毛巾扭通宵)
藍灣半島爆晒玻璃!!! (幸好我只係幅牆有d油漆撲起咗)
塌樹，港鐵停駛，過千人要係車站過夜 (幸好我老公返得到屋企，陪住我過呢個恐怖的晚上)


咁大個女，終於明白打風，真係要準備好多野，太多突發野會發生。
韋森特，我會記住你。



後記：
打去管理處投訴，我當然有做到啦。call咗2日，管理處的職員終於得閒聽到電話。
一如所料，佢都係廢蹹一輪hea我。
我當然唔會咁順攤，你要工程公司d人上門check多次，我咪等你囉。
約第一次，放飛機；約第二次，終於有條友上門。
檢查係平日，唯有交俾老公follow。
唉...............信錯人啦。講少句je，佢竟然無叫工程公司d人睇埋幅入水的牆，淨係識得叫人睇窗台。
好喇，人o地有得賴啦，話我o地d窗膠邊老化，所以入水，唔關佢地事囉。
老公聽完又照收貨.....................
有冇攪錯呀，間屋係自己ga，點可以咁樣就算數!!!
然後同我講，「我唔慣同人坳數，唔似你呀」「你又唔講明，我點知je」
大佬，d野你有眼睇，你同我講你唔知發生咩野事!!??
而且，我同人坳數好失禮你咩，道理係自己呢邊，點解唔據理力爭!!!
我都知，工程公司就算知關佢o地事，都唔會幫我o地做d乜，但唔係咁樣就可以俾佢不負責任!!!
我嬲到，唔出聲，我無野講...............你都唔上心，我咁勞氣都只會傷身。
>~~~<
遲吓好天嘅，又心情到嘅，咪唧番d玻璃膠當補鑊囉..............但等你主人大少整，真係唔知等到幾時了





by笨豬小慧simple







笨豬小慧simple 發表在 痞客邦 留言(0) 人氣()

▲top
LC開煲菜!!!


客家炆豬肉

材料：(18cm Round Oven)
連皮豬五花腩 -- 1斤
蒜 -- 3粒
蔥 -- 1棵
豆卜 -- 5~6個
南乳 -- 1磚

汁料：
熱水+煠豬水 -- 適量
生抽 -- 1湯匙
老抽 -- 1湯匙
米酒 -- 1湯匙
片糖 -- 半塊

做法：
1. 五花腩整塊出水，冷水沖一下過冷河。水隔渣，留用。
2. 豬肉切大件；蒜拍扁；蔥切段；豆卜沖水去油，揸乾水，切半。
3. LC煲下少許油，中火燒熱，下豬肉煎硬四面，迫出油份，撈起備用。
4. 倒走部份豬油，爆香蒜和南乳，放回豬肉兜勻，加水蓋過豬肉，再加入其餘汁料，滾起轉慢火炆50~60分鐘。
5. 豆卜加入(4)，再炆10~15分鐘。
6. 試味後按喜好加鹽調味。
7. 最後放蔥，關火加蓋焗5分鐘，即成。

貼士：
1. 豬五花腩最好買一條肉過，而且叫肉檔叔叔幫忙去走豬毛，否則都可以用鋏逐條拔走，當然麻煩好多啦。
2. 豬肉出水後，可用菜刀輕輕刮豬皮，都可以去走豬毛。
3. 加煠豬水，可以增加味道，否則全用清水都可以。
4. LC煲收汁非常快，要時刻注意乾水，如果乾水了，半杯半杯地逐少加回熱水。
5. 如果加入豆卜前太多水，開大火蒸發水份後，再加豆卜和調味。
6. 豆卜快冧，要後落，而且不可以煮超過15分鐘，否則散晒無野食了。
7. 唔用豆卜，可改用3~4片木耳代替，要先浸軟切半。


客家炆豬肉，一定要有南乳，才算正宗啊~~~炆好後肉冧皮滑，一D都唔肥膩，送飯一流!!!


BY笨豬小慧SIMPLE

笨豬小慧simple 發表在 痞客邦 留言(2) 人氣()

▲top
2012年7月10日(五)

LC，即Le Creuset，法國琺瑯鑄鐵鍋，顏色靚、易潔、耐用、傳熱快、炆燉焗炒炸蒸都得，明火電爐焗爐通通入得。

見到好多煮婦blogger都有入貨，睇到我流晒口水呀~~~
加上20112011B2B都有用，見過少女A用一次，呢個煲真係啱晒我啊~~~我就係差一個炆得又炸得的煲。
主人開頭見個煲咁貴，初初都反對，但見識過LC的好用後，佢非常支持我買呀~~

有水喉射住，當然要敗啦~~~

我miss咗3月的開倉，以為要吊癮到9月開倉先可以擁有，點知LC係6月尾攪咗個2週年活動，只要生日日期或月份有"2"字，就有5折!!!
真係天助我也呀~~~~


入門必備 - 18cm Round French Oven

少女A介紹啱煮2人份的炆餸、煲仔飯、少油炸野，而且細細地，才能入到我家的小焗爐呢(不過要飛走個蓋)。

半價後，$1190!!!
雖然比開倉貴少少，但唔洗迫又有大把顏色揀，多$290都抵俾啦~~

揀咗我至愛的藍色，Cobalt Blue，隻色真係愈睇愈靚呀~~心心眼了~~




入面係奶白色的琺瑯

LC煲係外層琺瑯，芯係熟鐵，所以都幾重，小小的18cm已經有3kg重!! 拎到我死死吓
而且琺瑯會摑花，唔用得鐵鏟、鐵羹，又唔可以用鋼絲刷，遲D要去買木鏟了。
不過都好易清潔，用熱水浸一陣，用海棉輕輕抹吓，就乾淨晒了~~~感覺保養清潔同用易潔鑊差唔多，唔算好麻煩。



買完LC煲，仲唔洗排隊食埋豚王，今日真係好好好滿足呀~~~

真係幾好味呢~~塊叉燒有塊面咁大塊，仲要係有2塊!!! 食完飽死我了




期待星期日開煲!!! 我已經諗到煮乜喇~~~


特別嗚謝：A&G的帶路和俾意見~~~^^，無你O地我真係買唔成呢~



BY笨豬小慧SIMPLE


Le Creuset HK：http://www.lecreuset.com.hk/


笨豬小慧simple 發表在 痞客邦 留言(1) 人氣()

▲top
2012年6月21日(四)

生日正日，當然要「去玩‧去癲‧去Ocean Park」啦~~~
生日優惠，變成$150 for two!!! 抵到拎假去都值!!
而且好好彩，天陰陰但無落雨，唔熱又有陣風。


其實，我有成十幾年無嚟過海馬公園喇，依家真係變晒樣，d格局好似廸廸尼。
雖然少咗d本土特色咁，但d路變得平坦又寬闊，係好行咗嘅。


一到埗，最近的展覽館就係《海洋館》
入面d野，同十幾年前差唔多，都係勁多魚(尤其鯊魚)，不過少咗個玻璃管隧道，唔可以近距離睇到d魚的肚腩，震撼力大減。
好彩有隻超超超大的長腳蟹，加番d WOOOW指數。(比我係日本買回來吃的那隻蟹仲要大!!)
其實入面好黑，d路又暗斜，主人話帶仔嚟參觀時，都有試過佢地仆倒>~<


離開海洋館，緊接的就係souvenior shop (個個展覽館都係呢d格局，真係好廸廸尼)
d公仔都幾可愛呀~~~~(樂樂企鵝呀~~~)
最攪笑係個鯊魚頭箍，係咁 "咬" 住我o地個頭，咬到主人想買佢番屋企(我當然stop佢啦，唔好製造垃圾)



海馬公園的主打已經唔係魚，而係國寶熊貓!!!
當然要去會一會佢啦~~~
佢O地的懶樣真係出神入化，比人類仲識嘆，D pose真係能人所不能呢~~~唔怪得有人以為D熊貓係人扮的。


入到四川館，真係嘩嘩聲呀~~~小熊貓真係超級可愛啊~~~~
短短的咀、肥肥的手手、大大的尾巴，真係cute到暈呢~~~^0^
記得BB時媽咪親手整咗隻咁樣的公仔俾我，我仲以為係貍貓tim，hahaha


唔通生日有運行!!?? 同到小熊貓影相呀~~~~



新開的懷舊街，令我諗起難兄難弟。
呢度食野算幾平的了。
原來纜車站改咗係呢邊，不過勁多人排隊，又唔係未坐過，無謂同D自由行迫啦~~~
改去坐海洋列車。但入面扮水浸的scene，真係好派膠=.="



過咗對面，新開的過山車無咩人排隊，叫主人去玩啦~~(我有畏高，機動遊戲唔好預我了)
點知佢話無人陪佢玩，佢唔玩了，怕咩醜喎

對面山真係無咩值得參觀，水母館、中華鱘館、加州館，好快就行完。
但唔見咗我好想睇的企鵝，唔通俾D海獅食晒!!??? (我後尾先知，遲D開冰極世界，D企鵝搬咗竇=.=")

夾到時間，睇海豚show
但...............真係有D唔人道，野生海豚唔會成日跳出水面囉，仲要180度自轉再撻番落水，最騎呢係要條海豚跳上台俾人摸!!??邊有水中生物會想上水ga，自殺O個時就會喇。
睇完好心蹹V_V


5PM，行完~~~~dinner time


食到我勁想食的風月堂呀~~~YEAH!!

食物好味，餐具靚靚，HOHOHO，開心死^0^

仲有飯後甜品，好滿足!!



多謝主人，唔介意熱死，陪隻豬去Ocean Park，仲請隻豬食大餐。
好開心啊~~~~


BY笨豬小慧SIMPLE



相關閱讀：婚後第一個生日^0^




笨豬小慧simple 發表在 痞客邦 留言(3) 人氣()

▲top
2012年6月，笨豬小慧的生日月，節目當然一籮籮。

婚後的第一個生日，繼續精彩，繼續開心^0^


總共吃了3個生日蛋糕+1個壽包...............肥死嚟囉>.<



16/6(六) - 日航酒店high tea



主人預早團購了coupon，真係好乖仔啊~~ (豬小慧很喜歡high tea的說)
雖然食物一般，但倆口子悠閒地過，甜蜜勝過甜點啦~~~haha



21/6(五) - 海洋公園遊 (詳細看此)



23/6(六) - 損友來豬欄開生日P


都係大食會咁啦~~~最緊要成班fd開開心心癲一晚



24/6(日) - 是旦食餐生日飯@金饍



近期韓食係我o地的大愛!!!
本來諗住是是旦旦食餐飯，估唔到班fd揀咗間貴野@0@，就算買咗團購coupon都要破費啊~~~
亦多謝大家送我的生日禮物啊~~~(不過下年唔好送喇，一齊食到餐飯已經好難得，好滿足了^^)



7/7(六) - 朗豪酒店high tea with family


生日慶祝到7月都係第一次............又high tea只因阿媽想食，好明顯我係俾人藉口過橋啦




我諗，生埋B之後，我應該無晒呢d生日慶祝活動了，所以要珍惜現在可以慶祝的機會，玩盡佢!!!


by笨豬小慧simple

笨豬小慧simple 發表在 痞客邦 留言(1) 人氣()

▲top
[31/10/2012] 成功研煮改良版喇~~味道有9成似!!! 食譜按此

譚仔三哥名菜「土匪雞翼」，依家在家都可以整到喇~~~其實唔係好難ga jar。
整起後香味撲鼻，聞到已經想食=q，都有7成似ga~~~~



土匪雞翼

材料：
雞翼 -- 1磅
孜然粉 -- 3~4茶匙
小茴香 -- 1~2茶匙(磨碎)
黑芝麻 -- 大量

醃料：
生粉 -- 1茶匙
雞粉 -- 1茶匙
孜然粉 -- 2茶匙
鹽 -- 1茶匙
糖 -- 半茶匙
生抽 -- 1茶匙
酒 -- 1茶匙
胡椒粉 -- 少許

做法：
1. 雞翼解雪，洗淨， 用醃料醃過夜。
2. 白鑊炒香黑芝麻，放涼，備用(建議入樽/罌仔)
3. 焗爐200˚C預熱。焗盤鋪雙層錫紙，掃少許油。
4. 雞翼排好在焗盤上(皮向下)，灑上適量孜然粉、小茴香、黑芝麻，入焗爐焗10~15分鐘。
5. 反轉雞翼，重覆步驟4一次。
6. 上碟後再灑上少許孜然粉。

貼士：
1. 孜然粉、小茴香多數用來醃羊用，印尼食品店有售。
2. 唔用焗爐，可改用鑊煎，先大火煎脆兩面，再轉中火煎熟雞翼，邊煎邊加黑芝麻和孜然粉。
3. 酒我用了花雕，用紹興酒或米酒都可以。
4. 因為我唔食辣，所以skip咗花椒粉/辣椒粉，食得辣可以加番d，應該仲香口



by笨豬小慧simple


笨豬小慧simple 發表在 痞客邦 留言(3) 人氣()

▲top
«1...789 1011...62