簡單就是愛 - 笨豬小慧simple's blog

朋友生日party特別呈獻~~~~不過好似買得太多料，唔係好夠水=p



羅宋湯

材料：(6~8人用)
牛柳 -- 半斤
蕃茄 -- 3~4個
薯仔 -- 1~2個
椰菜 -- 半個
甘筍 -- 1條
西芹 -- 半棵
月桂葉bay leaves -- 3片
檸檬 -- 1個
水 -- 約2湯碗
鹽 -- 2~3茶匙

做法：
1. 牛柳洗淨，切成大塊，汆水和過冷河，備用。
2. 所有蔬菜洗淨。
3. 薯仔、甘筍去皮，滾刀切角成大塊。
4. 蕃茄一開六，再每瓣中間切一刀。
5. 西芹去筋，切成1cm粗的粒粒。
6. 椰菜切去底部較硬的部份，再切成1cm粗的條狀。
7. 材料(1)~(6)放入大鍋中，加水至蓋過所有材料(但不要超過煲的8分滿)，加入bay leaves。
8. 檸檬切半，一半揸汁倒入鍋內，另一半再切半，連皮放入鍋內。
9. 大火煲至水滾，轉小火煲30分鐘，再放入真空煲燜2~3小時。
10. 取出後，用大火先煲滾，再轉小火翻煲30分鐘，落鹽調味，即成。

貼士：
1. 除牛柳外，可改用牛尾、牛展、豬骨、豬展等肉類代替。我買了冰鮮的牛柳，牛味都ok呀。
2. 我買了較大個又冧身的蕃茄，肉厚多汁但唔夠酸，所以加了檸檬汁補數；如果用細隻硬身的蕃茄，因為較酸，可以唔加檸檬汁。
3. 傳統食譜應該有洋蔥、青椒，但我的煲太細了，唯有將就將就，省略了=p
4. 如果唔用真空煲，大火煲滾後，轉小火煲1~2小時就可以了。

by笨豬小慧simple


羅宋湯Wiki百科：http://zh.wikipedia.org/zh-tw/%E7%BE%85%E5%AE%8B%E6%B9%AF

我同主人都喜歡吃海鮮，尤其蝦、蟹、貝類，但家中只有易潔鑊，除咗蒸和煠，都無其他煮法喇，所以真係好想買個炒得的鑊呀~~~

初初睇中咗陽極鐵的鑊，貪佢耐用又輕身，唔易黐底又可用鐵鏟，似乎好啱炒硬殼類食物喎，而且價錢好划算tim~~
某天踩中咗親子forum，D太太們大叫陽極鐵鑊唔好用，好似要開鑊o個D，又唔洗得，要養鑊等等，諗諗吓都怕自己handle唔到，打消敗家念頭了。

又某某天，係JUSCO發現一個平、靚、正的不鏽鋼鑊，當下決定，買!!!

$218有個30cm的Buffalo不鏽鋼鑊，雖然只有三層鋼，但價錢實在太抵，唔買對唔住自己。
而且size細細，塞得落豬欄的小小小廚櫃內，實在太fit我的要求喇~~~


當晚試煮炒蟹，好成功啊~~~~炒蟹真係非常美味:q
不過我第一次用完已經燒黑咗個鑊，費了我九牛二虎之力先省得番白。
(我仲發現我係省鑊高手，主人省咗2次都無乜起息，我一出手就省番白了，HOHOHO，全靠小時候阿媽成日煮燶野，省鑊功夫自細培養=P)
另外，用不鏽鋼炒菜，D菜香甜爽脆，好好食ga~~~主人食晒成碟皇帝菜咁制。


似乎廚具與日俱增當中......HAHAHA=.="


BY笨豬小慧SIMPLE

BB cream大家應該很熟悉了，價廉物美，所以大受歡迎，連歐美品牌都陸續推出，風頭真係一時無倆呀~~
但，BB cream造的底妝，有點死白，欠缺光澤感和立體感，而且牙膏狀的包妝，很難外帶補妝呢。

BB cream的翹楚 - MISSHA 新推出的Ultimate Radiance光影之美底妝系列，大大改善了傳統BB cream的問題啊

就是這兩樣喇：柔光明彩筆、水亮貼薄粉底

包裝非常cyber，幻彩閃閃啊~



先來一下產品介紹：

柔光明彩筆 HK$219/3g，SPF30 / PA++，共2色：No.1、No.2

集重點遮瑕和修正肌膚明亮度於一筆，令肌膚柔滑細緻，呈現剔透光澤，強化五觀立體感。

我試用的是自然色No.2。
(No.1偏白，似乎韓妹白肌才能handle呢......)


筆頭是化纖毛筆刷，毛毛纖細柔軟

由於沒有使用說明書，花了點時間才掌握到使用方法呢。
先扭鬆筆頭，但不要扭轉太多，否則會擠出太多啊；然後按下筆頂的按鈕，就像原子筆一樣，遮瑕液就跑出來了^^，首次使用要多按2下。

很容易畫出遮瑕液，發現筆頭有點乾時，就要按筆頂一下，添加一點啦。

遮瑕液比膚色白一點，很濕潤，不算太杰，滿好推

試塗在手背
皮膚明顯白了，算是「提亮了」嗎? 遮瑕度也很滿意啊，手背的青筋近乎不見了

水亮透薄粉底液 HK$273/15g，SPF30 / PA++，共2色：No.21、No.23

透薄輕盈的質地，如空氣般透氣、輕薄、零負擔，蘊含多種亮肌成份，透過光影變化的原理，瞬間遮蓋毛孔及豆印，打造柔滑立體的皮膚，加入護膚配方，上妝同時保濕，令妝容時刻保持最佳狀態，臨床證實，可維持12小時不溶妝。

12小時不溶妝啊~~~超神咧，好吸引

打開後，不是粉餅，是盒裝的粉底液，很新穎。撕開透明貼紙後，有個小孔

用力按下去，小孔就會跑出粉底液了

粉卜也很特別，是雙面設計，一面肉色，另一面白色

兩面的手感有些不一樣，肉色那面比較黏手指頭，有點乳膠的感覺；白色那面卻是滑滑的，還有些短絨毛

側面看，粉卜蠻薄的，肉色的叫AIR puff，白色的叫NBR puff

原來兩面粉卜，用來打造兩種不同的底妝質感。
AIR puff打造出Moisturizing Effect，即是水潤光澤的底妝
NBR puff打造出Fitting Glow Effect，即是啞色底妝

我試的是No.23的自然膚色，擠出來時，覺得有些死白........希望上面不會太假啦
(No.21是偏白，韓妹白肌才能handle啊.....)

試用兩面粉卜塗，嗯，出來的效果沒有太多差別呢........而且粉卜很吸粉啊，很難推勻，我覺得用手塗好很多

粉底液的質地真的很水潤，塗後沒有乾紋現形(我沒塗hand cream)，明顯看到粉感，但又能透出原本的肌底，遮瑕又透亮，真的難得。




使用步驟：

1. skincare後，將明彩筆塗於要遮瑕和提亮的地方

局部遮瑕：
眼部可塗於眉骨位置，打造清晰的眉形；掃於眼底，可遮蓋黑眼圈；
面部可塗於雀斑、豆印的地方，作重點遮瑕；
鼻翼摺位也塗一點，改善泛紅暗啞，均勻膚色，亦能遮蓋粗大的毛孔；
唇部掃於咀角，改善暗啞，提升唇形

局部打亮：
掃一些在T-zone和下巴，增加臉部立體感

先用明彩筆掃上遮瑕液，再用手指印開，塗後，T-zone位明顯有光澤，提亮了不少。黑眼圈、雀斑也遮蓋不少。

2. 如有需要，再在眼下補上遮瑕膏。(我用的是Maybelline mineral concealer)

3. 擠出紅豆大小的粉底液，分五份點於臉上，再用手底粉卜推勻

用後，夠保濕但不會痴立立，顏色跟膚色很接近，有光澤感，沒有死白呢。黑眼圈、雀斑亦進一步遮蓋了。

4. 喜歡乾爽能的sis，可加少許loose powder定妝；想更有立體的輪廓，可加上shading powder。

12小時不溶妝，試一試就知!!

早上出門前化妝後，10小時零補妝!!!
臉上的胭脂還在啊~~~平常的話，老早溶光光了。用紙巾抹臉頰，還是肉色的，粉底沒有溶掉啊。只是額頭、筆翼有些出油。


用後感：

柔光明彩筆 - 聽到名字已經覺得很厲害，明彩筆啊~~不是YSL的熱門產品嗎?? 現在不用$300就可以到手，真的很感動啊T^T。超喜歡它遮到黑眼圈但不會攪到眼紋現形!! 好物!!

水亮透薄粉底液 - 包裝真的很可愛，盒裝的BB cream，haha，太有趣了吧!! 遮瑕和透亮同時做到，完全解決了傳統BB cream厚妝死白的問題，只是附贈的粉卜太吸粉，要省用唯有用手塗啦~~~另外，粉盒沒有設計另一格放粉卜，衛生有點欠缺呢.....




Missha官網：
香港 - http://www.missha.com.hk
韓國 - http://shop.beautynet.co.kr/missha/shop_event.php?part_code=116003014001

2012年11月17日(六)

早上book咗做body check(多謝老公唔嫌悶，陪我等^^)，攪掂晒之後，就係沙田拍拖閒蕩。
無意中發現Citysuper有Le Creuset的counter，仲有日本特別色coastal blue賣tim呀~~~

見到靚色，真係忍唔到手，買咗!!

少少地，買咗一set兩個ramekin，$147，有75折又係靚色，敗!!

買到至愛的藍色，真係好好好開心啊~~~

底部的貼紙寫住coastal blue，hohoho



sales仲透露，12月會返到少量粉紅色的貨，stoneware和oven都會有，希望到時有時間去昅昅啦~~



by笨豬小慧simple

倆小口，洗得少少米，唔想用電飯煲，不如用LC煲整煲仔飯啦~~
飯、餸一take過攪掂!!
LC煲煮飯真係好快，15分鐘就有得食喇~~~而且好有米香，飯又吸晒排骨D汁，超超超好味呀~~~

(18cm Round Oven)
排骨 -- 200g (約$20)
米 -- 1量杯
水 -- 1飯碗
辣椒 -- 1隻 (去籽切粒)

醃料：
生粉 -- 1茶匙
鹽 -- 1茶匙
生抽 -- 1~2茶匙
油 -- 少許
蒜 -- 2~3瓣 (切蓉)
豆豉 -- 1茶匙 (沖水拍扁切粒)

做法：
1. 排骨洗淨，瀝乾水份，加醃料醃10~15分鐘。
2. 米洗2~3次後，倒入LC煲，加水，大火煲滾，水滾後攪拌一下，加蓋轉小火。
3. 飯太約煮5分鐘後，開半蓋看一下水位，如果見米已經轉大粒，水只在米粒間噗噗噗，就加入排骨。
4. 再煮5~8分鐘後，開半蓋檢查一下，如果肉轉晒色、米收水了，就灑上辣椒，閂蓋熄火焗3~5分鐘，即成。

貼士：
1. 下排骨後，如果覺得太少水，可以加一點點熱水，以免飯熟乾水了，排骨卻未熟。
2. 步驟(4)時，可將筷子插入飯中間，如果筷子不是濕濕地，就表示已經收水了。
3. 如果怕滾瀉，可用筷子晾起煲蓋。
4. 想食得更有風味，食用時可以加煲仔飯豉油，不過我懶買，無加呀~~
5. 米的量杯用番電飯煲附贈o個個，水：米=1：1的份量，唔同牌子的米，水量可能要加減一下，試煮多幾次就知ga la


BY笨豬小慧SIMPLE

我有化妝返工的習慣，無他，只係唔想呀烏咁見人，儀容anytime都好重要ga~~~

雖然我又未到5mins化好個妝出門口，但10mins內化個簡簡單單見得人的日妝，都想跟大家分享一下。

平日都以淡妝為主

務求快靚正見得人，我最鐘意買colour palette，尤以大地色最易掌握

呢位KATE eyeshadow palette好正，$108有晒眼影、眉粉，好用又省錢
可惜已經停售T^T，攪到我用晒買唔番>^<

左邊3格係眼影，全部帶殊光，我會用最左手面的米色做highlight
右邊2格係眉粉，啞色的，最右手面的淺啡色，可以做埋鼻影tim~

平日我的化妝品就係咁多jar~~非常簡單
Jill Stuart eye jelly、Maybelline mineral concealer、戀愛魔鏡mascara、Kiss Me眼線液筆、Borjouis烘焙胭脂、Clinique loose powder、KATE eyeshadow

化妝步驟

1. 我只用sofina防曬乳做base，然後全面掃上Clinique loose powder，黑眼圈就用Maybelline mineral concealer遮一遮

2. 之後，整個眼窩用中指印上Jill Stuart eye jelly，閃閃地，眼妝打底啱晒，又可防溶妝


3. 先用左2的深啡色掃於雙眼皮位，眼尾向上blend開，掃成C形；左3的淡啡色掃在眼窩餘白的地方；眼窩中間、眉骨處用手指點上少許左1的米色

4. 夾翹眼睫毛，掃上2~3層mascara

5. 沿睫毛邊緣畫上眼線

6. 右1和右2的眉粉要混色來畫眉，由中間開始畫到眉尾，只用右1的淺啡色畫眉頭

7. 左2的深啡色畫下眼瞼的2/3位置，左1的米色畫眼頭＞字做打亮，也要掃mascara在下眼睫毛

8. 左1的米色打亮鼻樑，右1的淺啡色用來打鼻影，掃在眉頭底凹處至鼻翼

9. 斜上地掃上Borjouis胭脂，掃成餃子形，可以修飾包包面

鐘意可以揸d lip gloss~~~攪掂!!! 出得門口喇~~~


其實日日化，好快功多藝熟^v^，日日靚住咁返工，心情都暢快d啦~~~

20112011BG2B，因為一個婚禮，大家成為好朋友。
並且成立了「婚合會」，閒時攪吓聚會，聯誼聯誼，希望我o地的友誼，婚前婚後一樣keep in touch。

2012年5月12日(六)

K剛剛坐完月，趁佢仲放緊產假，我o地去家訪喇~~~


怕人多，嘈親莊大爺，所以分咗兩批人去探B。我就join咗第2輪=)

莊大爺係女士的心口瞓得超冧，尤其o係A的懷抱XD

佢真係好肥好得意呀~~~~超級鬼馬，盡得父母的優良遺傳^0^



2012年6月30日(六)

今次chanwong吹雞，去食德國菜


當然要配啤酒啦~~呢款麥味中帶有果香，非常好飲!!

德國菜又點少得豬手

陳生recommand的炸豬扒，但厚咗d，唔夠正宗

香腸拼盤，個mustard好好味=q

希臘沙律??? 有黑橄欖嘅.............

之後意猶未盡，再去甜品工房食糖水


發覺呢排都好難約齊全部婚合會成員出席聚會，無計，大家婚後都各有各忙，我自己都好忙呢......希望仍然keep到一個月一次的meeting啦........



2012年7月13日(五)

一個月一次的飯聚，好開心莊大爺都出席呀~~~~認真俾面^0^

去了老富昌食，初時聽個名，仲以為係酒樓，點知係食fushion西餐，hahaha

莊大爺o係女士的懷抱內，個樣特別冧


一嚟到就扯wing wing的領口，攪到wing wing差d走光，莊大爺，你好猴擒呀XD

你睇佢個大爺樣，幾爽XD

一去到A的懷抱，莊大爺條頸立即無力，係咁鑽A的心口，G送上一個怒睥~~~~

反觀男士抱抱，莊大爺唔多鐘意，一臉不爽


主人抱抱，莊大爺條頸即刻發力，死唔想埋身，仲要拎轉面，「我睇你唔到」

G唔抵得莊大爺鑽A的心口，立即接過嚟抱，莊大爺即時變得木無表情
(為免莊大爺真樣爆光，用keropi遮面，大家自行想像佢的表情啦~)

莊大爺應該最鐘意王志的懷抱，食住手指瞓著咗!!!!
王志亦成功fight低我o地班女子組，成為莊大爺的天王椅，K比都想邀請你幫佢o地手湊仔XD

幾次的meeting都唔記得影大合照，難得今次記得影，但漏了揸機的K比一家..........>..<



by笨豬小慧simple

歡樂時光過得特別快，又係時候講bye bye。
5天4夜的honeymoon，話咁快就到咗last呢日喇~~

今日繼續自由行時間。

食完USJ Hotel的美味早餐後，攪埋check-out，導遊就車咗我o地去一個大阪必去的地方。

道頓堀、心齋橋

兩年前已經自由行同屋企人嚟過，今次我無帶旅遊書仔一樣識行^0^

難得可以同固力果大隻仔影到相，多謝新婚團友揸機

道頓堀，其實係一條食街

必食有：赤鬼章魚丸、河豚料理、金龍拉麵、四天王拉麵

因為太多人排隊了，我o地全部都無食!! (所以唔好問我邊d好食d，係咩味等等....)
但齋睇d 3D燈箱招牌，已經覺得好勁好有氣勢!!!

行行吓，見到日本馬會，今日係跑馬日，入面好多人咁。
唔知香港人買得唔得呢?? 中咗點分錢呀??

呢間野，唔係金龍拉麵的分店，係一間機舖，大家唔好攪錯
(仲見到d日本黑幫係呢間野行出嚟=~=)

話咁快，就行到嚟戎橋喇~~

河邊兩岸都係食肆，聽導遊講，呢邊d餐廳平過大街o個d咖

我o地留肚，只因想試呢間「一蘭」拉麵

千奇百趣都有介紹過，好食之外，佢最趣的地方係，一人一個partition食麵，話咁先唔會有disturb，先食得出最好的味道喎.......

可惜，又係太多人排隊，超級唔鐘意排隊的我，又放棄無食到了。
(事後問番食咗的團友，佢o地都話好食，但又未好食到排勁耐隊嚟食囉)

過埋戎橋，就到心齋橋喇~~

嚟呢度當然係shopping啦~

sanrio、disney(唔去東京都有日本disney精品^0^)、Uniqlo、Zara、Evisu、大丸百貨、不二家cafe、藥妝店............等等等

不過yen真係太高，購物意慾好低，我o地又話咁快行完心齋橋筋

心齋橋尾，過埋大馬路，轉右，就見到Tokyo Hands

入面有d似city super和log-on

係美容counter見到呢部toner mist maker 真係好想買呀~~~

但計埋rate後，同香港JC shop的標價差唔多，so，又無買了

章魚丸機，幾得意，但我唔識整個蛋漿，睇完就算了=p

迷你朱古力噴泉機，如果未嫁，可能我會買嚟放係candy corner

sake，有大有細，仲有綜合sample mix，而且好平咁(mix細細支，一包有5~6支，都係2XXXyen jar)

我猛叫主人買d番香港，點知佢又唔買(佢鐘意飲酒ga)，返到香港又呻笨了，蠢死



係Tokyo Hands運完吉，我o地又沿路行番轉頭，去搵食喇~~

登登登登~~~去KANI道樂 食蟹!!!!

叫了一個2人前lunch set，5800yen

非常豐富呀~~~蟹腳刺身、冷蟹腳、網燒蟹腳、天婦羅蟹腳，差唔多所有蟹腳的煮法都食晒!
仲有壽司、湯、茶碗蒸、甜品

加埋優美的環境和良好的服務，貴少少都抵俾啦~~

呢餐真係好滿足呀~~~



食飽飽，就去機場了

雖然我o地好似咩都無買，但又爆晒喼咁番 XD

check-in後，先發現機場離境大堂仲多野買，手信的價錢同出面係一模一樣的!!!
仲有限量版kitty、唔貴但好似好好用的skincare tim~早知留番係呢度先掃啦>~<

返屋企喇~~日本bye bye了T^T

依家日本跟美國一樣，有防恐離境規定，過關前要丟晒d 100mL以上的液體和尖尖的利器

入閘後有d口乾，係coffee shop買咗杯凍咖啡啦~~~頂!!! 勁唔好飲>^<
早知o係自動販賣機禁110yen罐裝咖啡無咁嬲=^=+

CX回程的飛機餐，又係難食=^="
d飯乾晒，肉和d汁又怪味..........我食咗碗仔麵jar.........好肚餓...........



honeymoon終於完滿結束，呢個旅程唔算超級開心，又無想像中甜蜜，有少少遺憾啦。
對住病到死死吓的主人，真係忍唔住想炳佢一鑊!!! 去旅行可唔可以唔好死老豆咁款呢....攪到我好無癮。
又因為佢病咗，我o地去到邊都入藥房買止痛藥，導遊又好好人，介紹我o地買咩藥，但都好似無咩效咁.............(所以我對日本d藥開始多咗認識，同埋日本好多便秘藥賣，睇嚟日本人的腸胃真係好差....)
主人無咩胃口食野，咁我又唔好意思食啦..........唉........食少好多正野囉>^<
幸好，臨尾o個日，主人有番d精神，都算盡興啦(但會唔會遲咗少少呢....)

所以，我已經plan定，結婚一週年，一定要再去旅行，補償番呢個不堪回首的honeymoon!!!


不過，都有樣野值得開心一吓^^

我o地買咗隻雪場蟹做手信呀~~~~~(真係好大手筆呀~~~)

勁勁勁大隻，我單手都差d拎唔起 (sorry，四眼妹look獻醜了v_v)
導遊安排我o地臨上機前先拎走，入面的雪種就可以捱到明晚，咁大隻蟹，真係唔知點放入雪櫃
第2天，我將隻蟹一分為二，一半拎俾我媽咪，另一半分俾老爺奶奶
而且，隻蟹好好好味呀~~~~~~~~~~~~~




by笨豬小慧simple




相關閱讀：
日本阪神蜜月之旅 - Day 1
日本阪神蜜月之旅 - Day 2
日本阪神蜜月之旅 - Day 3
日本阪神蜜月之旅 - Day 4